বঙাইগাঁওঃ লকডাউনৰ অন্ত পৰিবলৈ মাজত মাথো কেইটামান দিন বাকী থকা অৱস্থাতে অসমত পুনৰ দুজনকৈ লোকৰ দেহত ধৰা পৰিছে কৰ’না পজিটিভ। স্বাস্থ্য মন্ত্ৰী ড০ হিমন্ত বিশ্ব শৰ্মাই এক টুইটযোগে জনোৱা মতে বঙাইগাঁৱৰ এগৰাকী ১৬ বছৰীয়া কিশোৰীৰ দেহত আজি ধৰা পৰিছে কৰ’না ভাইৰাছৰ উপস্থিতি। 

আনহাতে, গোৱালপাৰাতো এজন লোকৰ দেহত বিয়লিৰ ভাগত ধৰা পৰে কৰ'না পজিটিভ। লোকজনৰ পজিটিভ ধৰা পৰাৰ সৈতে আছে নিজামুদ্দিনৰ সম্পৰ্ক।

ইয়াৰ লগে লগে ৰাজ্যত যোৱা ৫ দিনৰ পিছত কৰ’না আক্ৰান্তৰ সংখ্যা ৩৫ৰ পৰা ৩৭ গৰাকীলৈ বৃদ্ধি পালে। মন্ত্ৰীগৰাকীয়ে জনোৱা মতে আজি পজিটিভ ধৰা পৰা যুৱতীগৰাকীৰ ঘৰ বঙাইগাঁৱৰ শালমৰা অঞ্চলত। কিশোৰীগৰাকী নিজামুদ্দিন মাৰ্কাজলৈ যোৱা লোকৰ সৈতে পৰোক্ষ সংস্পৰ্শলৈ আহিছিল বুলি জনাইছে মন্ত্ৰী হিমন্তই।

উল্লেখ্য যে ইয়াৰ পূৰ্বে যোৱা ২৩ এপ্ৰিলত ধুবুৰীৰ এগৰাকী লোকৰ দেহত ধৰা পৰিছিল কৰ’না পজিটিভ। আজি পুনৰ এগৰাকীৰ দেহত কৰ’না ধৰা পৰিলেও ৰাজ্যত পৰিস্থিতি স্বাভাৱিক হৈয়ে আছে বুলি দাবী কৰিছে চৰকাৰে। স্বাস্থ্য বিভাগৰ মতে, কৰ’নাত আক্ৰান্তসকলৰ মাত্ৰ এজন মৃত্যু মুখত পৰিলেও ২৭ জনেই আৰোগ্য লাভ কৰিছে। 

মন্ত্ৰী হিমন্তই আজি টুইট কৰা মতে গোৱালপাৰা আৰু বঙাইগাঁৱত নতুনকৈ পজিটিভ ধৰা পৰা ৰোগী দুগৰাকীৰ সৈতে ৰাজ্যত আজিৰ তাৰিখত সক্ৰিয় কৰ’না পজিটিভৰ ঘটনা হৈছে মাত্ৰ ৯ টা। এই ৯ গৰাকী ৰোগীয়েও শীঘ্ৰে সুস্থ হৈ ঘৰলৈ উভতিব পাৰিব বুলি আশা প্ৰকাশ কৰে মন্ত্ৰীগৰাকীয়ে।