newsnextone.com | ডিব্ৰুগড়ঃ নাগৰিকত্ব সংশোধনী বিধেয়ক তথা বাংলাদেশৰ হিন্দু শৰণাৰ্থী অসমত সংস্থাপনৰ তীব্ৰ বিৰোধিতা কৰিছে অসমৰ দল-সংগঠন, সাহিত্যিক, বুদ্ধিজীৱী,সাংবাদিক জ্যেষ্ঠ নাগৰিক, গায়ক অভিনেতা-অভিনেত্ৰীয়ে৷ নিতৌ ৰাজপথলৈ ওলাই আহিছে সৰ্বসাধাৰণ৷ সমাজৰ কোনো প্ৰকাৰৰ লোক প্ৰতিবাদ নকৰাকৈ থকা নাই৷ সকলোৱে সোচ্চাৰ হৈ পৰিছে বিজেপি চৰকাৰৰ অসম ধ্বংসকাৰী সিদ্ধান্তৰ বিৰুদ্ধে৷
বিধেয়কখনৰ বিৰুদ্ধে প্ৰতিবাদ সাব্যস্ত কৰি আহিছে মুখ্যমন্ত্রী গৃহ জিলা ডিব্ৰুগড়ৰ ডিকমবাসীয়ে৷ শনিবাৰেও অসম জাতীয়তাবাদী যুৱ-ছাত্র পৰিষদৰ নেতৃত্বত ৰাজপথলৈ ওলাই আহে ডিকমবাসী৷ যুৱ ছাত্ৰ পৰিষদৰ নেতৃত্বত বিধেয়কখন বাতিলৰ দাবীত মুখ্যমন্ত্ৰীৰ ঘৰৰ সমীপত জোঁৰ সমদল কাৰ্যসূচী ৰূপায়ন কৰি মুখ্যমন্ত্ৰী সৰ্বানন্দ সোণোৱাল মুৰ্দাবাদ শ্ল’গান দি পৰিবেশ উত্তাল কৰি তোলে৷ সোণোৱালক তীব্ৰ সমালোচনা কৰাৰ লগতে বিভিন্ন শ্ল’গানেৰে প্ৰতিবাদ সাব্যস্ত কৰে সংগঠনটোৱে৷
