অতি হেঁপাহেৰে প্ৰস্তুত কৰা ব্যঞ্জন খনি অধিক সুস্বাদু বনাবলৈ প্ৰতিগৰাকী গৃহিনীৰে প্ৰথম পছন্দ জনপ্ৰিয় মছলা কোম্পানী এম ডি এইছ আৰু এভাৰেষ্টৰ মছলা। কিন্তু ভাৰতৰ এই জনপ্ৰিয় মছলাক লৈয়ে এতিয়া প্ৰশ্ন উত্থাপন কৰিছে হংকং আৰু ছিংগাপুৰে। হংকঙৰ খাদ্য সুৰক্ষা বিভাগে ভাৰতীয় কোম্পানী এম ডি এইচ আৰু এভাৰেষ্টৰ মছলাত কেন্সাৰ সৃষ্টিকাৰী পদাৰ্থ পোৱা বুলি দাবী কৰিছে।

হংকঙৰ খাদ্য সুৰক্ষা বিভাগে ভাৰতীয় কোম্পানী দুটাই প্ৰস্তত কৰা কিছুমান পেকেট মছলাত কীটনাশক ইথিলিন অক্সাইড পোৱা বুলি দাবী কৰাৰ পিছতে ভাৰততো এই জনপ্ৰিয় কোম্পানী দুটাৰ মছলাক লৈ অলেখ প্ৰশ্নৰ উত্থাপন হৈছে। অৱশ্যে হকঙৰ খাদ্য সুৰক্ষা বিভাগৰ এই দাবী খাৰিজ কৰি সম্পূৰ্ণ যাৱতীয় পৰীক্ষাৰ পিছতে বজাৰত নিজৰ মছলা বজাৰত মুকলি কৰি অহা বুলি মন্তব্য কৰিছে এভাৰেষ্ট মছলা কোম্পানীয়ে।

কিন্তু হংকঙৰ খাদ্য সুৰক্ষা বিভাগে কেতবোৰ পেকেট মছলাত কীটনাশক ইথিলিন অক্সাইড লাভ কৰা বুলি দাবী কৰি এনে মছলাৰ ক্ৰয়-বিক্ৰয় বন্ধ কৰিবলৈ আহ্বান জনাইছে। আনফালে ছিংগাপুৰতো এভাৰেষ্ট কোম্পানীৰ ফিছ কাৰী মছলাৰ বিক্ৰী বন্ধ কৰিবলৈ নিৰ্দেশ দিয়া হৈছে।

হংকঙৰ খাদ্য সুৰক্ষা বিভাগৰ চেণ্টাৰ ফৰ ফুড ছেফটিয়ে দাবী কৰে যে এম ডি এইচৰ মাদ্ৰাজ কাৰী পাউদাৰ, সম্ভাৰ মছলা মিক্সড পাউদাৰ আৰু কাৰী পাউদাৰ মিক্সড মছলাত কীটনাশক ইথিলিন অক্সাইড পোৱা গৈছে। এনে মছলা ব্যৱহাৰ নকৰিবলৈও সকলোৰে আহ্বান জনাইছে বিভাগটোৱে। চেণ্টাৰ ফৰ ফুড ছেফটিৰ খাদ্য সুৰক্ষা বিভাগে এনে মছলাৰ বিক্ৰী বন্ধ কৰিবলৈ আহ্বান জনাই কয় যে কেন্সাৰৰ ওপৰত গৱেষণা কৰা সংস্থাটোৱে ইথিলিন অক্সাইডক গ্ৰুপ ১ কাৰ্চিনোজেনত স্থান দিছে। উল্লেখ্য যে, কাৰ্চিনোজেন হ’ল এনে পদাৰ্থ, যিয়ে কেন্সাৰ হোৱাৰ আশংকা বৃদ্ধি কৰে।

ছিংগাপুৰত নিষিদ্ধ এভাৰেষ্ট ফিছ কাৰী মছলা

খাদ্য সুৰক্ষা বিভাগে খাদ্য সামগ্ৰীত থকা কীটনাশকৰ অৱশিষ্ট (Cap. 132CM) নিয়মৰ উদ্ধৃতি দি কয় যে ইয়াত থকা খাদ্য যদিহে ইয়াৰ ব্যৱহাৰ স্বাস্থ্যৰ বাবে ক্ষতিকাৰক বা বিপদজনক নহয় তেতিয়াহে বিক্ৰী কৰিব পৰা যাব।

জানিব পৰা মতে, হংকঙৰ চেণ্টাৰ ফৰ ফুড ছেফটিয়ে তিনিখন খুচুৰা দোকানৰ পৰা মছলাৰ নমুনা সংগ্ৰহ কৰিছিল।চেণ্টাৰ ফৰ ফুড ছেফটিৰ মুখপাত্ৰৰ মতে, হংকঙত খাদ্যত ইথিলিন অক্সাইডৰ দৰে কীটনাশক ব্যৱহাৰ কৰাসকলে সৰ্বাধিক ৫০ হাজাৰ ডলাৰ জৰিমনা ভৰিবলগীয়া হ’ব পাৰে। এই অভিযোগত দোষী সাব্যস্ত হ’লে জৰিমনাৰ লগতে ছমাহ পৰ্যন্ত কাৰাদণ্ডৰ শাস্তিও হ’ব পাৰে।

ইফালে ছিংগাপুৰে ইথিলিন অক্সাইড পোৱাৰ পিছত এভাৰেষ্টৰ ফিছ কাৰী মছলা বজাৰৰ পৰা প্ৰত্যাহাৰ কৰিবলৈ দেশৰ খাদ্য সংস্থাক নিৰ্দেশ দিছে।দেশৰ এই মছলাৰ আমদানিকাৰক মুটিয়া এণ্ড চন্স প্ৰাইভেট লিমিটেডক এই সামগ্ৰী বজাৰৰ পৰা উলিয়াই আনিবলৈ কোৱা হৈছে। লগতে ছিংগাপুৰৰ খাদ্য সংস্থাই গ্ৰাহকক এভাৰেষ্টৰ ফিছ কাৰী মছলা ব্যৱহাৰ নকৰিবলৈ পৰামৰ্শ আগবঢ়াইছে।

ছিংগাপুৰৰ খাদ্য সংস্থাই নিজৰ সিদ্ধান্তৰ সমৰ্থনত হংকঙৰ খাদ্য সুৰক্ষা বিভাগে জাৰি কৰা একে নিৰ্দেশনাৰ উল্লেখ কৰে, য’ত কোৱা হৈছে যে এমডিএইচ আৰু এভাৰেষ্টৰ ফিছ কাৰী স্পাইচৰ তিনিটা মছলাত কেন্সাৰ হ’ব পৰা উপাদান ধৰা পৰিছে।

কিয় কয় এভাৰেষ্ট কোম্পানীয়ে?

ছিংগাপুৰৰ খাদ্য সংস্থাই কয় যে সামান্য পৰিমাণৰ ইথিলিন অক্সাইডৰ পৰা কোনো ধৰণৰ তাৎক্ষণিক বিপদ নহয়। কিন্তু দীৰ্ঘদিন ধৰি ইয়াৰ ব্যৱহাৰে স্বাস্থ্যৰ প্ৰতি ভাবুকি সৃষ্টি কৰিব পাৰে। কিন্তু মছলা পেকেটত কীটনাশক ইথিলিন অক্সাইডৰ উপস্থিতি সম্পৰ্কীয় অভিযোগক লৈ নিউজ ৱেবছাইট ভিয়নক দিয়া উত্তৰত এভাৰেষ্টে কয় যে এই কোম্পানীৰ এক পঞ্চাশ বছৰীয়া ইতিহাস আছে আৰু আজিও ই এক সুনামধন্য ব্ৰেণ্ড।

এভাৰেষ্টে কয়, “আমাৰ সকলো সামগ্ৰী কঠোৰ পৰীক্ষাৰ অন্ততহে নিৰ্মাণ আৰু ৰপ্তানি কৰা হয়। আমি পৰিষ্কাৰ-পৰিচ্ছন্নতা আৰু খাদ্য সুৰক্ষাৰ মানদণ্ড কঠোৰভাৱে পালন কৰো। আমাৰ সামগ্ৰীসমূহৰ ওপৰত ইণ্ডিয়ান স্পাইচ ব’ৰ্ড আৰু এফ এছ এছ এ আইকে ধৰি সকলো সংস্থাৰ অনুমোদনৰ ছীল আছে।”

এভাৰেষ্টে লগতে কয়, “প্ৰতিটো ৰপ্তানিৰ পূৰ্বে আমাৰ সামগ্ৰীসমূহ ভাৰতৰ স্পাইচ ব’ৰ্ডৰ দ্বাৰা পৰীক্ষা কৰা হয়। বৰ্তমান আমি চৰকাৰী তথ্যৰ বাবে অপেক্ষা কৰি আছো। আমাৰ গুণগত নিয়ন্ত্ৰণ দলে এই বিষয়টো পুংখানুপুংখভাৱে তদন্ত কৰিব।”

উল্লেখ্য যে, এম ডি এইচৰ সম্পূৰ্ণ নাম হৈছে মহাছিয়ান দি হাট্টী। ভাৰতৰ ৰান্ধনীশালত পটাত পিহি মছলা গুড়ি কৰাৰ এক দীঘলীয়া আৰু কষ্টকৰ প্ৰক্ৰিয়াৰ বিপৰীতে গৃহনীক থাউকতে গুণগত মছলা যোগান ধৰাৰ লক্ষ্যৰে ১৯১৯ চনত স্থাপন কৰা হৈছিল এই মছলা কোম্পানীটোৰ। তাৰ পিছতে দেশৰ লগতে সমগ্ৰ বিশ্বজুৰি অভূতপূৰ্ব জনপ্ৰিয়তা অৰ্জন কৰি আজি বিশ্বৰ ভিতৰতে অন্যতম মছলা প্ৰস্তুতকাৰী হিচাপে নিজকে প্ৰতিষ্ঠা কৰিবলৈ সক্ষম হৈছে এম ডি এইচে। প্ৰতিদিনে ৩০ টন মছলাৰ গুড়ি উত্পাদন কৰা এই মছলা কোম্পানীটোৱে আজি আমেৰিকা, কানাডা, ব্ৰিটেইন, ইউৰোপ, জাপান আদিকে ধৰি বিশ্বৰ প্ৰতিটো কোণলৈ ভাৰতীয় সোৱাদযুক্ত মছলা ৰপ্তানি কৰি আহিছে।

আনহাতে টেগলাইন ‘বেষ্ট ইন টেষ্ট’ৰ বাবে পৰিচিত এভাৰেষ্ট স্পাইচেছ মছলা কোম্পানী স্থাপন কৰা হৈছিল ১৯৬৭ ছনত। বিগত ৫০ বছৰীয়া ইতিহাসেৰে সমৃদ্ধ এই কোম্পানীটোৱে ক্ৰমান্বয়ে ভাৰতৰ লগতে সমগ্ৰ বিশ্বৰ বজাৰ দখল কৰি ৬০ খনৰো অধিক দেশলৈ আজি ভাৰতীয় মছলা ৰপ্তানি কৰি আছে। গুণগত মানৰ প্ৰতি কোম্পানীটোৰ দায়বদ্ধতাৰ বাবে৮ বাৰকৈ ‘ছুপাৰব্ৰেণ্ড’ৰ মৰ্যাদা লাভ কৰিবলৈও সক্ষম হৈছে এভাৰেষ্টে। 

News Next One হৈছে 'Crowdfunding’ৰ জৰিয়তে পৰিচালিত নিউজ ৱেবছাইট। যদিহে বাতৰিটো পঢ়ি উপকৃত হৈছে আৰু পিছলৈকো এনেধৰণৰ তথ্যসমৃদ্ধ অধিক বাতৰি পঢ়িব বিচাৰে তেন্তে তলৰ ফটোখনত ক্লিক কৰি আমাক ১০ টকা, ২০ টকা, ১০০ টকা যিয়ে যেনেকৈ পাৰে তেনেকৈ সহায় কৰক।

Click to Read ►অনুগ্ৰহ কৰি আমাক 'বন্ধ হৈ পৰা' অথবা 'বিক্ৰী যাবলগীয়া' হোৱাৰ পৰা ৰক্ষা কৰক!

ইথিলিন অক্সাইড কি?

ইথিলিন অক্সাইড হৈছে ৰংহীন আৰু জ্বলনশীল গেছ। ইয়াক সাধাৰণতে কৃষি, স্বাস্থ্যসেৱা আৰু খাদ্য প্ৰক্ৰিয়াকৰণ উদ্যোগত ধূমপান, কীটনাশক আৰু বীজাণুনাশক প্ৰস্তুত কৰাত ব্যৱহাৰ কৰা হয়।ইথিলিন অক্সাইড মছলা আৰু অন্যান্য শুকান খাদ্যতো ব্যৱহাৰ কৰা হয়, যাতে অণুজীৱৰ দূষণ নাইকিয়া হয় আৰু পোক-পৰুৱা নিয়ন্ত্ৰিত হয়। বেক্টেৰিয়া, ভেঁকুৰ আৰু পোক-পৰুৱাৰ পৰা খাদ্যক ৰক্ষা কৰিবলৈ ইথিলিন অক্সাইড ব্যৱহাৰ কৰা হয়।

কিন্তু বহু স্বাস্থ্য সংস্থাই ইয়াক কাৰ্চিনোজেনৰ শ্ৰেণীত স্থান দিছে। কাৰ্চিনোজেনে কেন্সাৰৰ আশংকা সৃষ্টি কৰিব পাৰে।ইথিলিন অক্সাইডৰ বিপদৰ কথা বিবেচনা কৰি বহু দেশৰ খাদ্য নিয়ন্ত্ৰকসকলে খাদ্য সামগ্ৰীত ইয়াৰ ব্যৱহাৰ সন্দৰ্ভত কঠোৰ নিয়ম প্ৰণয়ন কৰিছে। এই দেশসমূহত ইথিলিন অক্সাইডৰ পৰিমাণ নিৰ্ণয় কৰিবলৈ কঠোৰ আইন আছে।

আমেৰিকাতো মছলাক লৈ প্ৰশ্ন

বহিঃৰাষ্ট্ৰত ভাৰতীয় কোম্পানীৰ মছলাক লৈ প্ৰশ্ন এয়াই প্ৰথম নহয়। ইয়াৰ পূৰ্বেও ভাৰতীয় মছলাক লৈ প্ৰশ্ন উত্থাপন কৰি আহিছে অন্য ৰাষ্ট্ৰই। ২০২৩ চনত আমেৰিকাৰ খাদ্য আৰু ঔষধ কৰ্তৃপক্ষই এভাৰেষ্টৰ সম্ভাৰ মছলা আৰু গৰম মছলা বজাৰৰ পৰা প্ৰত্যাহাৰ কৰিবলৈ নিৰ্দেশ দিছিল। এই মছলাবোৰ ছালমন’লা পজিটিভ পোৱা গৈছিল। এই বেক্টেৰিয়াই ডায়েৰিয়া, পেটৰ বিষ, জ্বৰ, মূৰ ঘূৰোৱা বা বমিৰ সৃষ্টি কৰিব পাৰে।

শেহতীয়াকৈ এছিয়া, আফ্ৰিকা আৰু লেটিন আমেৰিকাত শিশুৰ খাদ্য বিক্ৰী কৰা কোম্পানী নেচলেৰ সামগ্ৰীত অতিৰিক্ত চেনি পোৱা গৈছে। এই সামগ্ৰীসমূহৰ ভিতৰত আছে বিশ্বৰ সৰ্ববৃহৎ বেবী চিৰিয়েল ব্ৰেণ্ড চেৰেলাক। কেঁচুৱাক চেনি দিয়াটো ভাল নহয়।

মন কৰিবলগীয়া যে, চুইজাৰলেণ্ডৰ সংস্থা পাব্লিক আইয়ে আন্তঃৰাষ্ট্ৰীয় বেবী ফুড একচন নেটৱৰ্কৰ সহযোগত চলোৱা পৰীক্ষাৰ অন্তত দাবী কৰিছিল যে বিশ্বৰ সৰ্ববৃহৎ বেবী চিৰিয়েল ব্ৰেণ্ড চেৰেলাকত অতিৰিক্ত চেনী পোৱা গৈছে। পাব্লিক আইৰ এই প্ৰতিবেদনৰ পিছতো ভাৰতীয় কোম্পানীয়ে ৰপ্তানি কৰা খাদ্যক লৈ সমগ্ৰ বিশ্বত প্ৰশ্নৰ উত্থাপন হৈছিল।