উঠি অহা প্ৰজন্মৰ মাজত ভয়ানক হাৰত দেখা দিয়া এক অনাকাংক্ষিত সামাজিক ব্যাধি হৈছে আত্মহত্যাৰ প্ৰৱণতা। এই ধৰণৰ নেতিবাচক মানসিকতা সমাজৰ পৰা নাশ কৰিবলৈ বিশ্বজুৰি প্ৰয়াস অব্যাহত আছে। ২০২১-২০২৩ বৰ্ষৰ বিশ্ব আত্মহত্যা প্ৰতিৰোধ দিৱসৰ ত্ৰিবাৰ্ষিক লক্ষ্য হিচাপে "কৰ্মৰ জৰিয়তে আশাৰ সঞ্চাৰ’’ক বিষয়বস্তু হিচাপে লোৱা হৈছে। পৰিৱৰ্তিত সময়ৰ ই এক শক্তিশালী আহ্বান। যুৱ সমাজক কামৰ মাজেৰে আগবঢ়াই নিবলৈ প্ৰচেষ্টা অব্যাহত ৰাখি বুজাবলৈ চেষ্টা কৰা হৈছে যে, আত্মহত্যা কোনো সমস্যাৰ সমাধান নহয়। সমাধানৰ বিকল্প হৈছে কেৱল কামৰ জৰিয়তে নিজক উৎসাহিত কৰি আমাৰ আশাবোৰ জীয়াই ৰখা। একমাত্ৰ কৰ্ম ব্যস্ততা আত্মহত্যা প্ৰতিৰোধৰ শক্তিশালী আহিলা।

বৰ্তমান সময়ত আত্মহত্যা এক বৃহৎ ৰাজহুৱা স্বাস্থ্য সমস্যা। দুৰ্বল মানসিকতাৰ বাবে এই ধৰণৰ প্ৰৱণতা সমাজত বাঢ়ি আহিছে। আত্মহত্যাৰ লগত কেৱল এগৰাকী ব্যক্তিয়েই জড়িত নাথাকে, ইয়াৰ লগত পৰিয়াল, সমাজ সকলোৰেই মানসিকতাত গভীৰ প্ৰভাৱ পৰি আৰু এচাম নতুনক নতুনকৈ মানসিক ৰোগী সৃষ্টি কৰিবলৈ ই বাট প্ৰশস্ত কৰিব পাৰে। 

যুৱ প্ৰজন্মক বৃত্তিগত শিক্ষা দিবলৈ চৰকাৰ দায়ৱদ্ধ হ'ব লাগিব। সকলোৱে চাকৰি পোৱাতো বা ভাল সংস্থাপন পোৱাতো সম্ভৱ নহয়। কিন্তু কাম কৰাৰ পৰিৱেশ সৃষ্টি কৰি দিয়াতো চৰকাৰ, সমাজ আৰু পৰিয়ালৰ দায়িত্ব। প্ৰতিযোগিতামুখী কৰি গঢ়ি তুলিবলৈ গৈ নতুন প্ৰজন্মৰ সপোনবোৰ ভুল বাটেৰে নি ধ্বংস নকৰি, আমি সকলোৱে তেওঁলোকক নিজৰ মাজতে প্ৰতিযোগিতা কৰিবলৈ শিকাব লাগিব। এইক্ষেত্ৰত 'নোপোৱাৰ বেদনা সহিবলৈ জীৱনমুখী শিক্ষা’ শৈশৱৰ পৰাই দিয়াৰ ব্যৱস্থা অতিশয় প্ৰয়োজনীয়। মৃত্যু এক শিল্প আৰু এই শিল্পক শিল্পী হিচাপে জীৱিত কালত উপভোগ কৰাটো প্ৰতিগৰাকীৰ দায়িত্ব আৰু কৰ্তব্য। চিকিৎসক, অভিযন্তা, অধ্যাপক হ'লেই মানুহ সফল নহয়। সফল হ'বলৈ সফলতা কি সেয়া বুজি জীৱনটো উপভোগ কৰিবলৈ জানিব লাগিব। টকা থাকিলেই মানুহ সফল নহয়। যিটো কামত মানসিক শান্তি থাকে, সেই কামহে সফল।

কামত ব্যস্ত মানুহ মানসিকভাবে শক্তিশালী হয়। তেনে মানুহৰ মন মগজুত নেতিবাচক চিন্তাৰ চৰ্চা নহয়। নেতিবাচক চিন্তাই যাতে মানুহৰ মনত ঠাই নাপায় তাৰ বাবে মনে বিচৰা কাম কৰা উচিত। কাম মানেই পইছা ঘটিব লাগিব তেনে নহয়। কামে কেৱল মানসিক সন্তুষ্টি দিয়ে। পৰিয়ালৰ কোনোবা যদি মানসিক ভাবে ভাঙি পৰিছে, তেন্তে তেওঁক শক্তিশালী কৰাটো আপোনাৰ-মোৰ সকলোৰেই মৌলিক দায়িত্ব আৰু কৰ্তব্য। 

নিষ্ঠা সহকাৰে যদি আমি সকলোৱে এই দায়িত্ব পালন কৰো, তেন্তে অনাকাংক্ষিত আত্মহত্যা সহজতেই ৰোধ কৰিব পাৰি। কোনো কামৰেই ডাঙৰ বা সৰু নাথাকে। কামক সংগ্ৰাম বুলি মানি আগবঢ়া জনকেই বীৰ বুলি কোৱা হয়। বিশ্ব স্বাস্থ্য সংস্থায়ো আত্মহত্যা প্ৰতিৰোধৰ বাবে বিশ্বৰ দেশ সমূহৰ লগত কাম কৰি আহিছে। এই অনুযায়ী ২০০৩ চনৰ পৰাই প্ৰতি বছৰে ১০ ছেপ্তেম্বৰৰ দিনটোত বিশ্ব আত্মহত্যা প্ৰতিৰোধ দিৱস পালন কৰি অহা হৈছে।

আমি জনা উচিত যে, আত্মহত্যাৰ বিকল্প হৈছে আত্মবিশ্বাস আৰু যাৰ আত্মবিশ্বাস আছে সিয়েই আত্মপ্ৰকাশ কৰিব পাৰে যিকোনো পৰিস্থিতিত। আত্মহত্যাৰ কাৰণ বোৰ জটিল। কিন্তু আলোচনা কৰিলে এইবোৰৰো সমাধান ওলাই। গতিকে প্ৰতিগৰাকীক মানসিকভাৱে আলোচনাৰ বাবে প্ৰস্তুত কৰাটো আমাৰ এক সামাজিক দায়িত্ব। প্ৰতিগৰাকী যুৱ প্ৰজন্মই ভৱিষ্যত সম্ভৱা। ইহঁতক বাট দেখাই সংৰক্ষণ কৰাটো প্ৰতিগৰাকীৰ দায়িত্ব। সহযোগিতা, সহমৰ্মিতা আৰু সমৰ্থনে এজনে আনজনক সাহসী কৰি তুলিব পাৰে। সুধাকণ্ঠ ভূপেন হাজৰিকাদেৱৰ ‘মানুহে মানুহৰ বাবে’ সেই কালজয়ী গানটো এই ক্ষেত্ৰত বৰ প্ৰাসংগিক।

এই পৃথিৱীখন সকলোৰে বাবেই সমান। গতিকে সকলোকে সমানে জীয়াই থকাৰ অধিকাৰ আমি ইজনে সিজনক দিবই লাগিব। মানুহৰ উচ্চাকাংক্ষী মনক নিয়ন্ত্ৰণ কৰিবলৈ আমাক মূল্যবোধৰ শিক্ষা লাগে। আমি জানিব লাগিব আমাৰ মুখৰ বাক্য বা শব্দৰ শক্তি কিমান? তাৰ বাবে প্ৰতিবাদৰ সুৰত চিঞৰি লাভ নাই। সমস্যা নাথাকিলে সফলতা নাহে। আৰু যদি বিনা সমস্যাৰে কাৰোবাৰ সফলতা আহিছে তেওঁ নিজক জুখি চাওক। কোনো মানুহ বেয়া নহয়। কেতিয়াবা সময় বেয়া থাকে। নিজৰ অভিজ্ঞতাৰ পৰা শিক্ষা লোৱাজনহে প্ৰকৃত মানুহ। আপোনাৰ ব্যৱহাৰেই আপোনাৰ পৰিচয়। এটা নামৰেই বিভিন্ন লোক থাকে কিন্তু তাৰ মাজতেই কিছুমান সফল আৰু বহুজন বিফল। 

অভিমানী মনটোক বহিস্কাৰ কৰি স্বভিমানী মনটোক স্বাগতম জনাব লাগে। তেনে কৰিলে মানুহ বিনয়ী হয়। সকলোতকৈ মূল্যবান হৈছে ভৰসা। ভৰসা যাতে আমি ইজনে-সিজনৰ প্ৰতি প্ৰতিদিনে কঢ়িয়াই ফুৰিব পাৰো, তাৰবাবে নিজক সংশোধন কৰিব লাগিব। ভৰসা হেৰুৱাই আজি যুৱ সমাজ ধ্বংসৰ মুখলৈ ধাৱিত গৈছে। বহুতে দিকবিদিক হেৰুৱাই আত্মহত্যা কৰিছে। এই সকলো হৈছে কেৱল মূল্যবোধৰ শিক্ষা নথকাৰ বাবেই। 

আজিৰ শিশুৱে এক-ডেৰ বছৰ মানৰ পৰাই টকটকাই কথা ক’ব শিকে, কিন্তু ক'ত কেতিয়া কেনেকৈ কথা ক’ব নাজানিয়েই বহু ল'ৰা-ছোৱালী বৰ্তমান বিপদত পৰে। ডিজিটেল পৃথিৱীত ল'ৰা ছোৱালীয়ে বহু কথা অপৈণত অৱস্থাতেই পৈণতসকলৰ দৰে শিকি লয়। পিছে এইটো শিকি নলয় যে, মানুহে মদৰ দোকানত বহি গাখীৰ খালেও তেওঁক মদাহী বুলিয়েই ক'ব। স্থান, কাল, পাত্ৰ সম্বন্ধে অৱগত নোহোৱাকৈয়ে নিজক উপস্থাপন কৰিলে যে বিপদ আমাৰেই হয়, সেই কথা আমি মানি নলওঁ। নতুন প্ৰজন্মক স্থান, কাল, পাত্ৰৰ জ্ঞান দিয়াটো জ্যেষ্ঠসকলৰ কৰ্তব্য।

News Next One হৈছে মুক্ত আৰু স্বতন্ত্ৰ সংবাদ প্ৰতিষ্ঠান। প্ৰতিদিনে একাধিক তথ্যসমৃদ্ধ তথা অনুসন্ধানমূলক বিতং বাতৰি প্ৰকাশ কৰিবলৈ আমাক সদ্যহতে প্ৰয়োজন মাহে ৫০ হাজাৰ টকাৰ। কিন্তু এতিয়া আমি শুভকাংক্ষীসকলৰ পৰা প্ৰতিমাহে সৰ্বমুঠ ১০-১২ হাজাৰ টকাকৈহে দান-বৰঙণি লাভ কৰিছো। ফলত আমি প্ৰতিদিনে মাত্ৰ এটা বাতৰিহে প্ৰকাশ কৰিবলৈ সমৰ্থ হৈছো। অনাগত সময়ত ৰাইজৰ স্বাৰ্থত আৰু অধিক বাতৰি প্ৰকাশ কৰিব পৰাকৈ আমি পঢ়ুৱৈসকলৰ পৰা সঁহাৰি লাভ কৰিব পাৰিম বুলি আশাবাদী। আমাক সাধ্যানুযায়ী সহায় কৰক।

Click to Read ►অনুগ্ৰহ কৰি আমাক 'বন্ধ হৈ পৰা' অথবা 'বিক্ৰী যাবলগীয়া' হোৱাৰ পৰা ৰক্ষা কৰক!

আমি মোহ তাত ৰাখিব লাগে যিটো আমাৰ বা যাৰ ওপৰত একমাত্ৰ নিজৰ অধিকাৰ আছে। অন্যথা এই মোহ ভংগৰ আলম লৈয়ে সমাজ বিশৃংখল হৈ পৰে। গীতাৰ জ্ঞান হৃদ‌য়ংগম কৰিব পৰা জনে জীৱনৰ কোনো ক্ষেত্ৰতে বিচলিত নহয়। বিগত কিছু বছৰৰ পৰা অভাৱনীয় হাৰত আমাৰ ৰাজ্যত বা দেশত আত্মহত্যাৰ তাড়না বৃদ্ধি পোৱালৈ চাই এনে কথাৰ প্ৰতি সকলোৱে গুৰুত্ব দিয়াতো প্ৰয়োজনীয় হৈ পৰিছে।

আত্মহত্যাৰ প্ৰৱণতা গুৰিতেই আঁতৰাব নোৱাৰিলে ই অনাগত সময়ত সন্ত্ৰাসৰ ৰূপ লোৱাৰ আশংকা থাকে। গতিকে, আমি সকলোৱে সামান্য সজাগতাই কাৰোবাক জীৱন ঘূৰাই দিব পাৰো। মনত ৰাখিব, এই বিশ্ব-ব্ৰহ্মাণ্ড এক সুস্থিৰ গতিৰে জগতৰ নিয়ম অনুযায়ী চলি আছে। আমি সকলোৱেই জগতৰ এই নিয়মৰেই অংশ। গতিকে আপোনাৰ মোৰ কোনো অধিকাৰ নাই আমি আমাৰ জীৱন অসময়ত ধ্বংস কৰাৰ। উশাহ আছে মানেই আশা আছে আৰু আশা আছে মানেই গোটেই পৃথিৱীখন মোৰ।

লেখিকা ড° শৰ্মা ৰাষ্ট্ৰীয় উচ্চতৰ শিক্ষা অভিযান, অসমৰ প্ৰগ্ৰেম বিষয়া

Disclaimer: The opinions expressed within this article are the personal opinions of the writer. The facts and opinions appearing in the article do not reflect the views of News Next One and News Next One does not assume any responsibility or liability for the same.