আমাক বিজ্ঞানভিত্তিক ভাৰতীয় সমাজ নে ধৰ্মত মজি থকা মধ্যযুগীয় সমাজ লাগে?

গুটেনবাৰ্গ আমাৰ শংকৰদেৱৰ প্ৰায় সমসাময়িক। গুটেনবাৰ্ৰ মৃত্যুৰ সময়ত শংকৰদেৱৰ বয়স হৈছিল ১৯ বছৰ। জাৰ্মানীত গুটেনবাৰ্গে আধুনিক ছপাশাল উদ্ভাৱন কৰি তাৰ ওপৰত বিভিন্ন পৰীক্ষা-নিৰীক্ষা কৰাৰ সময়ত আমাৰ শংকৰদেৱ ব্যস্ত আছিল অসমলৈ ভক্তিমাৰ্গ আমদানি কৰাত। কেৱল শংকৰদেৱেই নহয়, ষষ্ঠ শতিকাৰ পৰা ভাৰতীয় উপমহাদেশত আৰম্ভ হোৱা ভক্তিমাৰ্গে প্ৰায় ১৭ শতিকালৈকে এই অঞ্চলটোত কেৱল ধৰ্মীয় চিন্তা-ধাৰাক বিকশিত কৰা কিছুমান চিন্তাবিদ আৰু ধৰ্মীয় গুৰুৰ জন্ম দিছিল যেনে, আমি সততে নাম শুনি থকা কবীৰ, চৈতন্য মহাপ্ৰভু, তুলসীদাস, চন্দিদাস আৰু বহুজন সন্তলোক। দাক্ষিণাত্যত আৰম্ভ হৈ পৰৰ্ৱতী কালছোৱাত উত্তৰ ভাৰত লগতে ওড়িশা, বংগ আৰু শেহত অসমলৈ শিপাই যোৱা এই ভক্তিমাৰ্গে ভাৰতীয় উপমহাদেশত ধৰ্মীয় ভিত্তিত সমাজ গঢ়াৰ বাহিৰে আৰু একো নকৰিলে।