গুৱাহাটীঃ ঐতিহ্যমণ্ডিত লতাশিল বিহুৰ সম্ৰাজ্ঞী ২০১৯ প্ৰতিযোগিতা ফলাফল ঘোষণা কৰা হয়। লখিমপুৰৰ নীলম দোলাকাষৰীয়াই লাভ কৰে ২০১৯ বর্ষ বিহু সাম্ৰাজ্ঞী খিতাপ। মুঠ ১২ গৰাকী প্ৰতিযোগীৰ মাজৰপৰা লতাশিল 'বিহু সম্ৰাজ্ঞী' খিতাপ দখল কৰা নীলমে লাভ কৰে তৰামাই দাস সোঁৱৰণী নগদ এক লাখ টকা আৰু নেমকেয়াৰ হাস্পতালৰ চাকৰি। ইয়াৰ উপৰিও উপহাৰ হিচাপে লাভ কৰে ১০ গ্রাম সোণ, ৰেফ্ৰিজাৰেটৰ, টিভি, ৱাছিং মেচিনৰ লগতে বহু আকর্ষনীয় পুৰষ্কাৰ।

আনহাতে লতাশিল বিহু ৰাণী ২০১৯ খিতাপ দখল কৰে ডিব্ৰুগড়ৰ নিহাৰিকা শইকীয়াই। নিহাৰিকাই লাভ কৰে নগদ ৫১ হাজাৰ টকা, ট্ৰফী, পাঁচ গ্রাম সোণৰ মুদ্ৰা। একেদৰে বিহু কুঁৱৰী সন্মান সন্মান লাভ কৰিবলৈ সক্ষম হয় ডিব্ৰুগড়ৰ নিবেদিতা বৰাই। নিবেদিতাই লাভ কৰে নগদ ৩১ হাজাৰ টকা, ট্ৰফী লগতে পাঁচ গ্রাম সোণৰ মুদ্ৰা।

ইফালে গুৰুত্বপূৰ্ণ কথা এই যে পুনৰ বিতৰ্কৰ মাজত সোমাই পৰিছে লতাশিল বিহু সন্মিলনী। বিহু সম্ৰাজ্ঞী বিচাৰকৰ সিদ্ধান্তক বিৰোধিতা কৰিছে ১১ গৰাকীৰ প্ৰতিযোগীয়ে। বঁটা প্ৰদান কৰি থকা সময়তে লতাশিল বিহু সন্মিলনীৰ বিৰুদ্ধে মুর্দাবাদ ধ্বনি দিয়ে অসন্তষ্ট প্ৰতিযোগীসকলে। তেওঁলোকৰ দাবী যে বিচাৰকে ভুলকৈ ঘোষণা কৰিছে ফলাফল।

বিচাৰকে বিজয়ী ঘোষণা কৰা প্ৰতিযোগীয়ে যোজনা, তাল ভুল কৰাৰ বুলি অভিযোগ উত্থাপন কৰে ১১ গৰাকী প্ৰতিযোগীয়ে। তেওঁলোকে দাবী জনায় যে পুনৰ প্ৰতিযোগিতা পাতি ফলাফল ঘোষণা কৰিব লাগে। অন্যথা লতাশিল বিহু সন্মিলনী বৰ্জন কৰাৰ হুংকাৰ প্ৰদান কৰে বিহু দলসমূহে।

উল্লেখ যে এইবাৰ প্ৰথমবাৰৰ বাবে লতাশিল বিহু সন্মিলনীয়ে 'বিহু সম্ৰাজ্ঞী'ৰ বাবে প্ৰতিযোগীৰ বাছনি কৰাৰ বাবে আয়োজন কৰিছিল অসমৰ তিনি ঠাইত বাছনি শিবিৰ। সেই বাছনি শিবিৰসমূহৰপৰা ১২ গৰাকীক নিৰ্বাচন কৰি মূল প্ৰতিযোগিতাত অংশগ্ৰহণৰ সুবিধা প্ৰদান কৰা হৈছিল।