অপু্ৰ্ব বৰা, তেজপুৰঃ চাৰিদুৱাৰ ভোবোলা গাঁও নামঘৰত অনুষ্ঠিত শ্ৰীশ্ৰীব্ৰহ্ম সনাতন সংঘৰ ৮৬ সংখ্যক ৰাজ্যিক অধিৱেশনৰ লগত সংগতি ৰাখি চাৰিদুৱাৰৰপৰা বালিপৰালৈ ভাগৱত ভ্ৰমণ কৰা হয়।

বিভিন্ন জাতি-জনগোষ্ঠী-ধৰ্ম-বৰ্ণ নিৰ্বিশেষে সকলো শ্ৰেণীক একত্ৰিত কৰি শ্ৰীমন্ত শংকৰ-মাধৱদেৱে গঢ়িব বিচৰা সমাজখনৰ লগতে কলাগুৰুকে আদি কৰি বহুজনৰ চিন্তাৰ বৰ-অসমখনৰ সপোন সোমবাৰৰ অনুষ্ঠানটিৰ জৰিয়তে প্ৰতিফলিত হোৱা দেখা পোৱা গ’ল।

প্ৰতিকুল বতৰক নেওচি তিনিদিনীয়া এই কাৰ্যসূচীত ৰাইজৰ আন্তৰিকতা তথা উচাহ লেখত ল’ৱলগীয়া।

শোভাযাত্ৰাত কোচ, বড়ো, মিৰি, মিছিং, নেপালী, নিচি ,গাৰো  ইত্যাদি বিভিন্ন জাতি-জনগোষ্ঠীৰ  সহস্ৰাধিক ৰাইজ, ভকত-বৈষ্ণৱৰ অংশগ্ৰহণ, খোল,বাদ্য, হৰিনাম, কীৰ্তনৰ ধ্বনিৰে  শোভাযাত্ৰাৰ যোগেদি  সমগ্ৰ চাৰিদুৱাৰ, বালিপৰা অঞ্চলৰ আকাশ-বতাহ ভক্তিৰসেৰে মুখৰিত হৈ পৰা পৰিলক্ষিত হয় ।

উল্লেখ্যে যে, অনুষ্ঠানৰ প্ৰথম দিনাৰপৰা ক্ৰমে  ঊষা কীৰ্তন, আইমাতৃসকলৰ প্ৰতিনিধি সভা, দক্ষ যজ্ঞ আৰু সতীৰ দেহ ত্যাগ ভাওনা প্ৰদৰ্শন , ধৰ্মধ্বজ্জা উত্তোলন, সাংস্কৃতিক প্ৰতিযোগিতা, ভাগৱত পাঠ আদি বিভিন্ন কাৰ্যসূচী অনুষ্ঠিত হয়।