তিনিচুকীয়াঃ সমগ্ৰ বিশ্বক কৰ’না মহামাৰীয়ে ভয়াৱহভাৱে জোকাৰি থকাৰ সময়ত সমগ্ৰ দেশৰ লগতে অসমতো যোৱা ২৪ মাৰ্চৰপৰা ১৪ এপ্ৰিললৈকে লকডাউন ঘোষণা কৰা হৈছে৷ এই লকডাউনৰ ফলত ইতিমধ্যে ৰাজ্যৰ শিক্ষা প্ৰতিষ্ঠানসমূহ বন্ধ হৈ আছে৷ লক ডাউনৰ সময়ছোৱাত যাতে শিক্ষাৰ্থীসকলৰ পঢ়া-শুনাৰ ক্ষতি নহয় তাৰ বাবে তিনিচুকীয়া জিলা প্ৰশাসনে ইতিবাচক পদক্ষেপ গ্ৰহণ কৰিছে৷
তিনিচুকীয়া জিলাৰ বিদ্যালয়সমূহৰ পৰিদৰ্শক বিতোপন হাজৰিকাই তিনিচুকীয়া জিলাৰ বিভিন্ন শিক্ষানুষ্ঠানসমূহৰ অধ্যক্ষ, প্ৰধান শিক্ষক তথা শিক্ষকসকলক লকডাউনৰ সময়ছোৱাত ছাত্ৰ-ছাত্ৰীসকলৰ শিক্ষাপ্ৰদানৰ ধাৰা অব্যাহত ৰাখিবৰ বাবে প্ৰযুক্তিবিদ্যাৰ সঁজুলি স্মাৰ্ট ফোন ব্যৱহাৰৰ জৰিয়তে ছাত্ৰ-ছাত্ৰীসকলক শিক্ষা প্ৰদান কৰাৰ বাবে আহ্বান জনাইছে৷ সেই অনুসৰি বিদ্যালয়ৰ ছাত্ৰ-ছাত্ৰী, পিতৃ-মাতৃ, অভিভাৱকৰ সৈতে হোৱাটছএপ গ্ৰুপ ক্ৰিয়েট কৰি শ্ৰেণী অনুযায়ী বিভিন্ন বিষয়ৰ পাঠসমূহৰ শিকনীয় বিষয়সমূহ যোগান ধৰিবলৈ নিৰ্দেশনা প্ৰেৰণ কৰা হৈছে৷
