তিনিচুকীয়াঃ ক'ভিড-১৯ৰ বাবে দেশজুৰি অব্যাহত আছে লকডাউন। বন্ধ হৈ পৰিছে বাণিজ্যিক প্ৰতিষ্ঠান, যাতায়াত। গ্ৰীণ জ'নত শিথিল কৰি দিলেও অব্যাহত আছে উশাহ বন্ধ হোৱাৰ পৰিৱেশ।
এনে পৰিস্থিতিত স্বাভাৱিকতে ক্ষতিগ্ৰস্ত হৈছে সাধাৰণ দিন হাজিৰা কৰা শ্ৰমিক আৰু ক্ষুদ্ৰ ব্যৱসায়ীসকল। এইসকলক উদ্ধাৰৰ বাবে চৰকাৰে অদ্যপি লোৱা নাই বিশেষ ব্যৱস্থা।
কিন্তু ইয়াৰ মাজতে দেখিবলৈ পোৱা গৈছে অন্য এক ছবি। যিকোনো কথাতে থলুৱা খিলঞ্জীয়া অসমীয়াৰ ওপৰত মাধমাৰ পৰাৰ দৰে লকডাউনেও প্ৰকট কৰিছে তেনে এক ছবি। যি সময়ত তিনিচুকীয়া চহৰত পুৱাৰপৰা সন্ধিয়ালৈ পাচলি বেপাৰীৰ সঘন টিঘিলঘিলনি সেই সময়ত বিপদত পৰিছে অসমীয়া থলুৱা পাচলি বেপাৰী।
কাৰণ লকডাউনৰ বাবে তিনিচুকীয়া চহৰৰ উপকন্ঠ গ্ৰামাঞ্চলৰ কৃষক-পাচলি বেপাৰী চহৰত প্ৰৱেশ কৰিব পৰা নাই। জীৱন-জীৱিকাৰ তাড়নাত কোনোবাই পাচলি, মাছ-মঙহ অক’মান আনিলেও আৰক্ষীৰ বাধাৰ বাবে উভতি যাবলৈ বাধ্য হৈছে। কেৱল তিনিচুকীয়া চহৰ বুলিয়ে নহয়, জিলাখনৰ বহু ঠাইত অসমীয়া ক্ষুদ্ৰ ব্যৱসায়ীৰ ওপৰত লগোৱা হৈছে লকডাউনৰ বিধি-নিষেধ।
ফলত কৌশলেৰে অনা শাক-পাচলি অনা-অসমীয়া পাচলি বেপাৰীক সস্তাতে গতোৱাৰ গত্যন্তৰ নাই। কিন্তু অনা-অসমীয়া পাচলি বেপাৰীয়ে অত্যধিক দামত শাক-পাচলি বিক্ৰী কৰি আছে নিদ্বিৰ্ধাই।
অন্যহাতে লকডাউনৰ দিন ধৰি বন্ধ হৈ আছে তিনিচুকীয়াৰ সাপ্তাহিক দেওবৰীয়া বজাৰ। মন কৰিবলগীয়া যে জিলাখনৰ বিভিন্ন প্ৰান্তৰ গ্ৰামাঞ্চল, শদিয়াকে ধৰি সীমান্তৱৰ্তী অৰুণাচল প্ৰদেশৰ খুচুৰা পাচলি বিক্ৰেতায়ো দেওবৰীয়া বজাৰত ভিৰ কৰেহি।
দেওবৰীয়া বজাৰখন যেন তেওঁলোকৰ বাবে জীৱিকাৰ সম্বল, আশাৰ এগচি চাকি। পিছে অবিৰত লকডাউনৰ বাবে সম্প্ৰতি বন্ধ হৈ পৰিছে দেওবৰীয়া বজাৰ। বন্ধ হৈ পৰিছে খিলঞ্জীয়া অসমীয়াৰ জীৱিকাৰ সম্বল।
মন কৰিবলগীয়া যে এনে পৰিস্থিতিতো কিন্তু বহিৰাগত পাচলি বেপাৰীৰ কোনো অসুবিধা হোৱা নাই। ডেইলী বজাৰৰ পাচলি বজাৰ বন্ধ হৈ থাকিলেও চেনাইৰাম বৰ্ডিঙৰ সমুখভাগ তথা চহৰখনৰ অন্যান্য ঠাইত অনা-অসমীয়া পাচলি বিক্ৰেতাৰ ব্যৱসায় ৰমৰমীয়াকৈ চলি থকা দেখা গৈছে।