65
গুৱাহাটীঃ ব্ৰহ্মপুত্ৰ আমাৰ সকলোৰে আদৰৰ। অসমীয়াৰ জীৱনৰ স্পন্দন স্বৰূপ এই লুইতক লৈ অসমীয়াৰ কাহিনীৰ শেষ নাই। অসমৰ শৌৰ্য-বীৰ্য্য, জয়-পৰাজয়, হাঁহি-কান্দোন সকলোৰে সাক্ষী এই ব্ৰহ্মপুত্ৰ। সেয়ে হয়তো লুইতৰ সৈতে জড়িত প্ৰাচীন অসমীয়া সভ্যতা-সংস্কৃতিক বিশ্ব দৰবাৰত প্ৰতিষ্ঠা কৰাৰ বাবে ৰাজ্য চৰকাৰে বিশাল আয়োজনেৰে আৰম্ভ কৰিছে নৈকেন্দ্ৰিক মহোৎসৱ-নমামি ব্ৰহ্মপুত্ৰ মহোৎসৱ, ২০১৭।
‘মহামিলনৰ মহাতীৰ্থ’ আখ্যা পোৱা এই মহোৎসৱক লৈ বৰষুণৰ বতৰতো ৰাইজৰ মাজত ব্যাপক উৎসাহ পৰিলক্ষিত হৈছে। কিন্তু তাৰে মাজতে কেতবোৰ বিতৰ্কই উৎসৱটোক বিষয়টোৰ প্ৰতি সন্দিহান কৰি তোলাও দেখা গৈছে বহুতকে। কোনোৱে যদি গংগা-যমুনাৰ দৰে ব্ৰহ্মপুত্ৰক পূজা কৰাৰ এই ধাৰা প্ৰচলনৰ ফলত নৈখনত প্ৰদূষণৰ মাত্ৰা বাঢ়িব বুলি কৈছে, কোনোৱে আকৌ হৰিদ্বাৰৰপৰা পুৰোহিত অনাই পূজা কৰোৱাৰ নতুন পৰম্পৰাক সহজভাৱে ল’ব পৰা নাই।
