99
আগৰতলাঃ উত্তৰ-পূব ছাত্ৰ সন্থা (নেছ’)ই আহ্বান জনোৱা উত্তৰ-পূব বন্ধৰ ফলত মঙলবাৰে স্তব্ধ হৈ পৰে অঞ্চলটোৰ আটাইকেইখন ৰাজ্যৰ জন-জীৱন। নেছ’ৰ আহ্বানলৈ সহাৰি জনাই প্ৰতিখন ৰজ্যতে আজি নাগৰিকত্ব সংশোধনী বিধেয়কৰ বিৰোধিতাৰে বন্ধ সৰ্বাত্মক ৰূপত পালন কৰা পৰিলক্ষিত হয়।
বন্ধৰ দিনটোত চুবুৰীয়া অৰুণাচল প্ৰদেশৰ ৰাজধানী চহৰ ইটানগৰত যান-বাহনৰ চলাচল সম্পূৰ্ণৰূপে বন্ধ হৈ পৰাত চৰকাৰী-বেচৰকাৰী সকলো কাৰ্যালয় তথা শিক্ষা প্ৰতিষ্ঠানৰ কাম-কাজ, পাঠদান ব্যাহত হৈ পৰে। একেদৰে মণিপুৰৰ ৰাজধানী ইম্ফলৰ লগতে সমগ্ৰ ৰাজ্যখনতে বন্ধৰ সৰ্বাত্মক প্ৰভাৱ পৰাৰ বাতৰি পোৱা গৈছে। মেঘালয় আৰু মিজোৰামতো বন্ধৰ সময়ছোৱাত স্তব্ধ হৈ পৰে জন-জীৱন।
