ৰাজস্থানৰ হিন্দু তীৰ্থযাত্ৰী মুছলমানৰ আশ্ৰয়ত

চামগুৰিঃ যুগ-যুগ ধৰি হিন্দু-মুছলমান সকলে ঐক্য-সম্প্ৰতিৰে বসবাস কৰি আহিছে নগাঁৱৰ পুৰণিগুদামত। হিন্দু-মুছলমানৰ জাউতিযুগীয়া সম্প্ৰতিৰ ধ্বজ্জাবাহক হিচাবে আজিও পুৰণিগুদামৰ ন’আলি মূৰৰ ৰাজপথৰ দাঁতিৰ বৰ মছজিদত শিৰ উচ্চ কৰি ঠিয় হৈ আছে এশৰো অধিক বছৰ গৰকা মিনাৰটো। 

মঙলবাৰে নিশাও হিন্দু-মুছলমান নিৰ্বিশেষে প্ৰবাহিত হৈ অহা ঐক্যতা-ভাতৃত্ববোধৰ অনুপম নিদৰ্শন দাঙি ধৰিলে পুৰণিগুদামৰ মুছলমান সমাজে। নিশা প্ৰৱল শীতৰ প্ৰকোপত পৰি দিকবিদিক হেৰুৱা এটি প্ৰায় এশজনীয়া হিন্দু তীৰ্থযাত্ৰীৰ দলক বৰ-মছজিদতে আশ্ৰয় প্ৰদান কৰিলে স্থানীয় মুছলমান ৰাইজে। বৰ-মছজিদৰ লগতে সংলগ্ন বাৰাণ্ডাতে নিশা নিৰাপদে কটাবলৈ সুবিধা কৰি দিয়াৰ বাবে পুৱা কেৱল মুছলমান লোকসকলকেই সমগ্ৰ পুৰণিগুদামৰ ৰাইজৰ ওচৰত কৃতজ্ঞতা প্ৰকাশ কৰিলে ৰাজস্থানৰপৰা অহা হিন্দু তীৰ্থযাত্ৰী দলটোৱে।