ফলাফলৰ পিছতে আপ বিধায়কৰ কনভয়ত আক্ৰমণ, এজন নিহত

নতুন দিল্লীঃ দিল্লী বিধানসভা নিৰ্বাচনৰ ফলাফল ঘোষণাৰ পিছতে মঙলবাৰে নিশা ৰাষ্ট্ৰীয় ৰাজধানী ক্ষেত্ৰত সংঘটিত হয় গুলীচালনাৰ ঘটনা। এই ঘটনাত থিতাতে নিহত হয় আম আদমী পাৰ্টীৰ এজন স্বেচ্ছাসেৱক। আম আদমী পাৰ্টীৰ বিধায়ক নৰেশ যাদৱৰ কনভয়লৈ লক্ষ্য কৰি গুলী চলোৱাৰ ফলতে নিহত হয় স্বেচ্ছাসেৱকজন। নিহত স্বেচ্ছাসেৱকজন অশোক মান বুলি জনাইছে দিল্লী আৰক্ষীয়ে। এই ঘটনাত আহত হয় হৰেন্দ্ৰ নামৰ আন এজন আপ কৰ্মী।

আপৰ ৰাজ্যসভাৰ সাংসদ সঞ্জয় সিঙে সংবাদ মাধ্যমক জনোৱা মতে কালি জয়লাভৰ পিছতে পূজা দিবলৈ বুলি নিশাৰ ভাগত মন্দিৰলৈ গৈছিল বিধায়ক নৰেশ যাদৱ। পূজা দি ঘৰলৈ উভতাৰ পথতে অচিনাক্ত বন্দুকধাৰীয়ে যাদৱৰ কনভয়লৈ লক্ষ্য কৰি গুলীচালনা সংঘটিত কৰে। গুলীচালনাত বিধায়কজন কথমপি ৰক্ষা পৰে যদিও এজন আপ কৰ্মী নিহত হয়।