কোকৰাঝাৰঃ অসম প্ৰদেশ কংগ্ৰেছ কমিটীৰ সভাপতি গৌৰৱ গগৈৰ কোকৰাঝাৰ ভ্ৰমণ উপলক্ষে আজি কংগ্ৰেছে জিলাখনৰ বাওখুংগ্ৰী সমষ্টিৰ আদাবাৰীত এক জনসভা অনুষ্ঠিত কৰে। উক্ত জনসভাৰ অন্তত গৌৰৱ গগৈয়ে সংবাদ মাধ্যমৰ আগত কয় যে স্থানীয় বড়ো নেতৃত্বক বিজেপিয়ে সন্মান নকৰে। বড়ো নেতৃত্ব বিশেষকৈ প্ৰমোদ বড়ো আৰু হাগ্ৰামা মহিলাৰীক ৰিমোট কণ্ট্ৰ’ল হিচাপে ব্যৱহাৰ কৰিব বিচাৰে। তেওঁলোকে বিচাৰে যে দুয়োজনে আঁঠুকাঢ়ি তেওঁলোকৰ পৰা আশীৰ্বাদ বিচাৰক। প্ৰকৃততে বিজেপি দলৰ নীতি সেয়াই, যাৰ লগত হাত মিলায় তাকে দুৰ্বল কৰায় বিজেপিয়ে আৰু ইয়াৰ অন্যতম উদাহৰণ হৈছে অগপ। বৰ্তমান অগপৰ অৱস্থা তেনেকুৱাই হৈছে।

গৌৰৱ গগৈয়ে গৌৰৱেৰে কয় যে কংগ্ৰেছ হ’ল স্বাধীনতা আন্দোলনৰ পৰা জন্ম হোৱা দল। ৰাজনৈতিকভাৱে ত্যাগ কৰিব জানে কংগ্ৰেছ দলে। পূৰ্বতে ৰাজ্য আৰু কেন্দ্ৰত থকাৰ পিছতো আমি ত্যাগ কৰিলো বুলি মন্তব্য কৰি স্থানীয় নেতৃত্বক সন্মান কৰা বুলিও দাবী কৰে গৌৰৱ গগৈয়ে। আনহাতে সভাত গৌৰৱ গগৈয়ে কয় যে এতিয়া কংগ্ৰেছৰ কাৰ্যসূচীৰ পিছত কংগ্ৰেছবিৰোধীৰ বিপি বাঢ়ি গৈছে। বিৰোধীয়ে ভয় কৰা আৰম্ভ কৰোঁতেই বুজিব পাৰি যে কংগ্ৰেছ শক্তিশালী হৈছে।

কংগ্ৰেছে সদায় জনতাৰ লগত থাকি কাম কৰে বুলি উল্লেখ কৰি গৌৰৱ গগৈয়ে কয় যে পৰ্বতঝোৰাত আমি স্থানীয় ৰাইজৰ মনোবল বৃদ্ধি কৰিবলৈহে আহিছিলো। তাৰপিছতে মুখ্যমন্ত্ৰীয়ে পৰ্বতঝোৰাৰ প্ৰকল্পক লৈ প্ৰকল্পটো পৰ্বতঝোৰাৰ সলনি ধুবুৰী নাইবা গোৱালপাৰাত স্থানান্তৰ কৰাৰ ইংগিত প্ৰদান কৰিছে। মুখ্যমন্ত্ৰীৰ কথাৰ ভৰসা নাই বুলি উল্লেখ কৰি গৌৰৱ গগৈয়ে কয় যে মুখ্যমন্ত্ৰীয়ে হাজাৰবাৰ মিছা কথা কয়। নিৰ্বাচনৰ আগত এখোজ পিছুৱাই গৈছে কিন্তু নিৰ্বাচনৰ পিছত আকৌ দুখোজ আগবাঢ়িব বুলি মন্তব্য কৰি নিৰ্বাচনৰ পিছত পুলিচ লগাই আকৌ ভূমি দখল কৰিব পাৰে বুলি মত প্ৰকাশ কৰে গৌৰৱ গগৈয়ে। ভূমি পট্টা দিব বুলি ভূমি কিন্তু মামা-মামী, আদানি-আম্বানিকহে দিব বুলি মত প্ৰকাশ কৰে গৌৰৱ গগৈয়ে।

আনহাতে আদিবাসী উন্নয়ন আৰু কল্যাণ পৰিষদ আৰু কমতাপুৰ স্বায়ত্তশাসিত পৰিষদৰ অৱস্থা কি বুলি প্ৰশ্ন উত্থাপন কৰি গৌৰৱ গগৈয়ে মুখ্যমন্ত্ৰী হিমন্ত বিশ্ব শৰ্মাৰ মিথ্যাচাৰত ভোল নাযাবলৈ আহ্বান জনাইছে। বিটিচিৰ প্ৰতিটো সমষ্টিতে কংগ্ৰেছৰ প্ৰাৰ্থী সাজু হৈ আছে বুলি ভাষণত উল্লেখ কৰি সমষ্টিসমুহত পৰ্যবেক্ষক আহি ৰাইজৰ লগত আলোচনা কৰাৰ অন্ততহে সকলো চালি-জাৰি চাই চূড়ান্ত সিদ্ধান্ত লোৱা হ’ব বুলি উল্লেখ কৰে গৌৰৱ গগৈয়ে।  এয়াই মোৰ শেষ কোকৰাঝাৰ ভ্ৰমণ নহয়, মই আকৌ আহিম বুলি গৌৰৱ গগৈয়ে প্ৰতিশ্ৰুতি দি কোকৰাঝাৰ ভ্ৰমণ সামৰি বিয়লিৰ ভাগত গুৱাহাটীলৈ ৰাওনা হয়।

ইফালে, বাওখুংগ্ৰী সমষ্টিৰ অন্তৰ্গত নায়েকগাঁৱৰ কাক্ৰিঘোলাত আজিৰ দিনটোতে আৰু প্ৰায় একেটা সময়তে ইউপিপিএলৰ পূৰ্ব নিৰ্ধাৰিত হিতাধিকাৰীৰ এখন সভা অনুষ্ঠিত হয়। উক্ত সভাত বিটিচিৰ মুখ্য কাৰ্যবাহী প্ৰমোদ বড়োৱে কেন্দ্ৰ, ৰাজ্য আৰু বিটিচি পৰিষদীয় চৰকাৰৰ জনমুখী আঁচনিসমুহৰ বিস্তাৰিত বিবৰণ দি যোগ্য কোনো হিতাধিকাৰী যাতে আঁচনি তালিকাৰ পৰা বাদ নপৰে তাৰ ওপৰত গুৰুত্ব আৰোপ কৰে।

সভাৰ অন্তত সংবাদ মাধ্যমৰ আগত প্ৰমোদ বড়োৱে গৌৰৱ গগৈ আৰু হাগ্ৰামা মহিলাৰীক কঠোৰ সমালোচনা কৰি হাগ্ৰামা মহিলাৰীয়ে সদায় ওলোটা কথা কয় বুলি মন্তব্য কৰে। এইবাৰ বিটিচি নিৰ্বাচনত বিপিএফ দলে দুই-তিনিখনহে আসন পাব পাৰে বুলি মন্তব্য কৰি প্ৰমোদ বড়োৱে কয় যে হাগ্ৰামা মহিলাৰীয়ে নিজৰ সমষ্টিটোও এইবাৰ হেৰুৱাব বুলি মন্তব্য কৰে।

অসম প্ৰদেশ কংগ্ৰেছ কমিটীৰ সভাপতি গৌৰৱ গগৈৰ কোকৰাঝাৰ ভ্ৰমণে ইউপিপিএল দলৰ ক্ষতি কৰিব নোৱাৰে বুলি মন্তব্য কৰি বড়োলেণ্ড এলেকাত কংগ্ৰেছৰ দলীয় আৰু সাংগঠনিক স্থিতি নাই বুলি মত পোষণ কৰে। বহু আগতেই তেওঁলোকে ছাৰেণ্ডাৰ কৰিছে বুলি মন্তব্য কৰি শান্তি আৰু উন্নয়নৰ ৰাজনীতি কৰিবলৈ আহ্বান জনায় প্ৰমোদ বড়োৱে। ইপিনে কালি মুখ্যমন্ত্ৰী হিমন্ত বিশ্ব শৰ্মাই কেবিনেট বৈঠকৰ পিছত সংবাদমেল যোগে প্ৰতিবাদ অব্যাহত থাকিলে তাপ-বিদ্যুৎ প্ৰকল্পৰ স্থান সলনি কৰা হ’ব বুলি ঘোষণাৰ পিছত আজি প্ৰমোদ বড়োৱে প্ৰতিক্ৰিয়া প্ৰকাশ কৰিছে।

প্ৰমোদ বড়োৱে কয় যে তাপ-বিদ্যুৎ প্ৰকল্পক লৈ একাংশই ৰাজনীতি কৰিছে। যিসকলে প্ৰতিবাদ কৰিছে তেওঁলোকে কল্পনাও কৰিব নোৱাৰে ২০ হাজাৰ কোটি টকাৰ ইনভেষ্ট আৰু কেতিয়া আহিব। প্ৰকল্প স্থাপন হ’লে ৮ ৰ পৰা ১৮ হাজাৰ লোকে সংস্থাপন পাব বুলি মন্তব্য কৰি প্ৰমোদ বড়োৱে কয় যে আমাৰ ল’ৰা-ছোৱালীবোৰ কাম কৰিবলৈ গুজৰাট, কেৰালা, হাৰিয়ানালৈ যায়। তাত তেওঁলোক বহু পৰিমাণে অসুৰক্ষিত। প্ৰকল্প স্থাপন হ’লে তেওঁলোকে ইয়াতেই কাম কৰিব পাৰিব। উজনি অসমত বহু উদ্যোগ হ’ল কিন্তু নামনিত উদ্যোগ নাই বুলিবই পাৰি বুলি মন্তব্য কৰি আজিৰ দিনত বিআৰপিএল বা ছালাকাটিৰ এনটিপিচিৰ প্ৰকল্প হোৱা হ’লেও একাংশই বিৰোধিতা কৰিলেহেঁতেন বুলি মন্তব্য কৰে।

কথাবোৰ বহুতেই বুজি পাইছে, বহুতেই বুজি পোৱা নাই বুলি উল্লেখ কৰি মুখ্যমন্ত্ৰীয়ে অসমৰ যিকোনো ঠাইত প্ৰকল্পটো দিব পাৰিলহেঁতেন৷ কিন্তু অঞ্চলটোৰ সামগ্ৰিক উন্নয়নৰ প্ৰতি লক্ষ্য ৰাখিয়ে আমাৰ ইয়াত প্ৰস্তাৱ দিছে আৰু তাৰ বাবে তেওঁ ধন্যবাদৰ পাত্ৰ বুলি মন্তব্য কৰে। ৰাইজৰ স্বাৰ্থত প্ৰকল্পৰ মেপ তিনিবাৰ সলোৱা হ’ল, কাৰো এবিঘাও মাটি যোৱা নাই৷ বৰং গাঁৱৰ ফালে ১৫০ বিঘা মান মাটি ৰাখি থোৱা হৈছে বুলি মন্তব্য কৰি প্ৰকল্পৰ স্থান বাতিল হোৱা নাই আৰু প্ৰকল্পটো অইন ঠাইৰ সলনি বড়োলেণ্ডতে ৰখাৰ পোষকতা কৰে প্ৰমোদ বড়োৱে।

গোৱালপাৰাঃ উচ্ছেদৰ প্ৰায় এটা সপ্তাহৰ অন্তত খবৰ ল’বলৈ গৈ উচ্ছেদিতৰ ৰোষত পৰিছে সাংসাদ ৰকিবুল হুছেইন৷ গোৱালপাৰাৰ হাচিলাবিলত উচ্ছেদিত হোৱা লোকসকলৰ আজি খবৰ ল’বলৈ গৈছিল ৰকিবুল হুছেইন৷ লগত গৈছিল সংখ্যালঘু বিধায়ক৷ কিন্তু ৰকিবুল হুছেইন আৰু কংগ্ৰেছৰ বিধায়কসকলক উভতি ধৰে একাংশ উচ্ছেদিত লোকে৷ সাংসদ ৰকিবুল হুছেইনৰ গাড়ীত বোক ছটিয়াই ক্ষোভ জাহিৰ কৰে৷

উচ্ছেদিতসকলৰ মতে, এটা সপ্তাহে কংগ্ৰেছৰ সাংসদ-বিধায়কসকলে খবৰ লোৱা নাছিল৷ এটা সপ্তাহৰ অন্তত খবৰ ল’বলৈ অহাত তেনেদৰে ক্ষোভ জাহিৰ কৰিছে৷ গোৱালপাৰা চহৰৰ সমীপৰ ৰাজহগাঁও হাচিলাবিলত ১৬ জুনত প্ৰশাসনে উচ্ছেদ অভিযান চলাইছিল। উচ্ছেদিত ৰাইজৰ মাজত সাহায্য বিতৰণ কৰিবলৈ আজি ধুবুৰীৰ সাংসদ ৰকিবুল হুছেইনৰ সৈতে কংগ্ৰেছ দলৰ এটি সঁজাতি দল উপস্থিত হয়।

সাংসদ ৰকিবুল হুছেইনে উচ্ছেদিত ৰাইজৰ মাজত সামগ্ৰী বিতৰণৰ সময়তে একাংশ উত্তেজিত ৰাইজে গ’-বেক ধ্বনিৰে উত্তাল পৰিৱেশৰ সৃষ্টি কৰে। উত্তেজিত ৰাইজে সাংসদগৰাকীৰ সৈতে যোৱা কংগ্ৰেছ দলৰ একাংশ বাহনত বোকা ছটিওৱাৰ লগতে শিলগুটি নিক্ষেপ কৰে। পৰিস্থিতি উত্তপ্ত দেখি ঘটনাস্থলী এৰি আহে সাংসদগৰাকীৰ লগতে কংগ্ৰেছ দলৰ সঁজাতি দলটোৱে। পিছত আৰক্ষী-প্ৰশাসনৰ উপস্থিতিত পৰিস্থিতি নিয়ন্ত্ৰণ হয়। ঘটনাস্থলী এৰি অহা সাংসদগৰাকীয়ে গোৱালপাৰা জিলা কংগ্ৰেছৰ কাৰ্যালয়ত উপস্থিত হৈ প্ৰতিক্ৰিয়া ব্যক্ত কৰে।

সাংসদগৰাকীয়ে কয় যে হাচিলাবিলৰ উচ্ছেদিত পৰিয়ালৰ কাষত কিছু সাহায্য বিতৰণ কৰিবলৈ আমি উপস্থিত হৈছিলো। সাহায্য বিতৰণ কৰি উভতি অহাত আমাৰ পিছফালে থকা কেইখনমান বাহনত একাংশই বোকা ছটিওৱাৰ লগতে শিলগুটি নিক্ষেপ কৰি আক্ৰমণ কৰে। গাড়ীত আক্ৰমণ কৰা ১০-১২ জনীয়া গ্রুপটো উচ্ছেদিত পৰিয়ালৰ নহয়। যদি উচ্ছেদিত ঘৰ-বাৰী হেৰুৱা লোক আক্ৰমণত জড়িত থাকিলহেঁতেন তেন্তে আমাৰ ক’বলগীয়া একো নাছিল৷

এয়া এক পৰিকল্পিত আক্ৰমণ বুলি অভিহিত কৰে সাংসদ হুছেইনে। এই আক্ৰমণত আমি অকণো দুখ পোৱা নাই। মুখ্যমন্ত্ৰী হিমন্ত বিশ্ব শৰ্মাই ‘সাপ হৈ খুটি বেজ হৈ জাৰিব বিচাৰিছে’ এয়া অসমৰ সকলো ৰাইজে জানে। হাচিলাবিল গাঁৱত চৰকাৰেই উচ্ছেদ অভিযান চলালে আৰু ইয়াৰে একাংশ উচ্ছেদিতক মুখ্যমন্ত্ৰীয়ে মাতি আনি কয় যে হাচিলাবিলত বিধায়ক এ কে ৰশ্বিদৰ কাৰণেই উচ্ছেদ চলোৱা হৈছে।

বিধায়কগৰাকীয়ে চেলেঞ্জ দিয়াৰ কাৰণেই মুখ্যমন্ত্ৰীয়ে হাচিলাবিলত উচ্ছেদ চলাইছে বুলিও মন্তব্য কৰে সাংসদ হুছেইনে। তেওঁ কয়, “মুখ্যমন্ত্ৰী এগৰাকীৰ মুখত যদি এনেধৰণৰ মন্তব্য তেন্তে আমি কোনখন ৰাজ্যত বসবাস কৰিছোঁ। দুখীয়া মানুহবোৰক পণবন্দী কৰি মুখ্যমন্ত্ৰীগৰাকীয়ে যি ধৰণে পাশা খেলিছে ইয়াৰ প্ৰত্যুত্তৰ ৰাইজে দিব আৰু নেদেখাজনেও দিব।”

“মুখ্যমন্ত্ৰীগৰাকীয়ে যিকোনো প্ৰকাৰে গাদীখন সুৰক্ষিত কৰি ৰাখিবৰ কাৰণে খিলঞ্জীয়া মানুহৰ ওপৰত এনেধৰণৰ অত্যাচাৰ আৰম্ভ কৰিছে সেয়া অসমৰ ৰাইজে বুজি পাইছে। মুখ্যমন্ত্ৰীগৰাকীয়ে যেতিয়াই দেখিলে যে উজনি অসমত মুখ্যমন্ত্ৰীৰ ৰাজনৈতিক পৰিবেশ বেয়া তেতিয়াই মুখ্যমন্ত্ৰীগৰাকীয়ে গোৱালপাৰাত আহি ধুঁৱলী-কুঁৱলী পৰিবেশৰ সৃষ্টি কৰি ৰাজনৈতিক মুনাফা আদায় কৰিব বিচাৰিছে। যিসকল লোকে আমাক আক্ৰমণ কৰিছে তেওঁলোকক আমি অকণো বেয়া পোৱা নাই।”- যিসকল লোকক চৰকাৰে উচ্ছেদ কৰিছে তেওঁলোকক পুনঃসংস্থাপনৰ ব্যৱস্থা গ্ৰহণ কৰিবলৈ কংগ্ৰেছৰ এটি সঁজাতি দলে জিলা আয়ুক্তক স্মাৰক-পত্ৰ প্ৰদান কৰিব বুলি উল্লেখ কৰি সাংসদগৰাকীয়ে এইদৰে কয়।

সাংসদগৰাকীয়ে আৰু কয় যে কেন্দ্ৰত যদি এইবাৰ চৰকাৰ সলনি হ’লহেঁতেন তেতিয়াহ’লে এইসকল লোক আজি উচ্ছেদিত হ’ব লগা নহ’লহেঁতেন। গতিকে এইসকল লোকে ২০২৬ চনলৈ ৰখিব লাগিব। সকলো মিলি গ’লে ২০২৬ চনলৈ ৰাখিব নালাগে বুুলিও কয় হুছেইনে৷ কিজানি অহা ছেপ্টেম্বৰ মাহত সম্ভৱতঃ মুখ্যমন্ত্ৰী হিমন্ত বিশ্ব শৰ্মাৰ ম্যাদ উকলিব আৰু তেতিয়া এই দুখীয়া লোকসকলে তেওঁলোকৰ ওপৰত চলা অত্যাচাৰৰ পৰা পৰিত্ৰাণ পাব বুলিও তাৎপৰ্যপূৰ্ণ মন্তব্য কৰে সাংসদ ৰকিবুল হুছেইনে।

কোকৰাঝাৰঃ বিটিচি নিৰ্বাচনত কংগ্ৰেছৰ মূল ইছ্যু হ’ব মাটি। আটাইতকৈ গুৰুত্বপূৰ্ণ হ’ল মাটি। মামীয়ে মাটি পাই আছে, মামাই মাটি পাই আছে, আদানিয়ে মাটি পাই আছে, আম্বানিয়ে মাটি পাই আছে কিন্তু সাধাৰণ মানুহে মাটি পোৱা নাই। এই মন্তব্য কৰিছে অসম প্ৰদেশ কংগ্ৰেছৰ সভাপতি গৌৰৱ গগৈয়ে।

আজি দুদিনীয়া ভ্ৰমণসূচীৰে কোকৰাঝাৰত উপস্থিত হোৱা গৌৰৱ গগৈয়ে সংবাদ মাধ্যমৰ আগত উক্ত মন্তব্য কৰি বিজেপি চৰকাৰৰ কাৰ্যকলাপৰ বিৰুদ্ধে তীব্ৰ বিষেদগাৰ প্ৰকাশ কৰে। গৌৰৱ গগৈয়ে কয় অৰুণোদয়ৰ নামত ১০০০-১২০০ টকা মহিলাসকলে পাইছে আনহাতে মুখ্যমন্ত্ৰী, মন্ত্ৰী, বিধায়কৰ পৰিয়ালে ১০ লাখ, ২০ লাখ, ৩০ লাখ টকীয়া আঁচনিৰ হিতাধিকাৰী হৈছে।

যি আঁচনি সাধাৰণ যুৱক, মহিলাৰ বাবে হ’ব লাগিছিল তাতেও মন্ত্ৰী, বিধায়ক সোমাই পৰিছে। নিজে কিমান ধনী হ’ব পাৰে সেয়াহে চিন্তা কৰিছে। এইবোৰ কাৰণতেই অহা নিৰ্বাচনত বিজেপিৰ পতন হ’ব বুলি ঘোষণা কৰিছে গৌৰৱ গগৈয়ে।

ইপিনে বিটিচি নিৰ্বাচনক লৈ কংগ্ৰেছ দল যথেষ্ট ছিৰিয়াছ বুলি সংবাদমাধ্যমৰ আগত মন্তব্য কৰে গৌৰৱ গগৈয়ে। ”কংগ্ৰেছ দলৰ প্ৰতি নতুন উৎসাহ দেখা গৈছে। বিটিচি নিৰ্বাচনৰ বাবে কষ্ট কৰিব লাগিব। হাতত অলপ সময় আছে। কষ্ট কৰিলে অপ্ৰত্যাশিত ফলাফল আহিব পাৰে। বিটিচিৰ প্ৰতিটো সমষ্টিৰ বাবে প্ৰাৰ্থী সাজু আছে।’’— আমাৰ দুখ কষ্ট দেখি ৰাইজে আমাক আগতকৈ বেছি মৰম কৰিব বুলি আশা প্ৰকাশ কৰি এইদৰে কয় গৌৰৱ গগৈয়ে।

তদুপৰি কোকৰাঝাৰলৈ আগমন সন্দৰ্ভত সাংবাদিকে সোধা এক প্ৰশ্নৰ উত্তৰত গৌৰৱ গগৈয়ে কয় যে ৰাইজৰ মাজত থাকিলেহে সঞ্জীৱিনী শক্তি পোৱা যায়। কংগ্ৰেছ ৰাইজৰ মাজত থাকি সঞ্জীৱিনী শক্তি লাভ কৰে। সেয়ে কংগ্ৰেছে কোকৰাঝাৰত ৰাইজৰ লগত থাকি সঞ্জীৱিনী লবলৈ আহিছে। কোকৰাঝাৰৰ ৰাইজৰ সমস্যা, সপোন আৰু আশা বুজিবলৈ আহিছো বুলি গৌৰৱ গগৈয়ে মন্তব্য কৰি ৰাইজৰ সপোন বাস্তৱত ৰূপায়ণৰ চেষ্টা কৰিম বুলি প্ৰতিশ্ৰুতি দিয়ে গৌৰৱ গগৈয়ে। আনহাতে মুখ্যমন্ত্ৰীয়ে প্ৰতিনিয়ত গৌৰৱ গগৈক সমালোচনা কৰা, বিভিন্ন কথাৰে আক্ৰমণ কৰা সন্দৰ্ভত সাংবাদিকে প্ৰতিক্ৰিয়া জানিব বিচৰাত গৌৰৱ গগৈয়ে মাথো কয়, “সবকো সন্মতি দে ভগবান, সকলোৰে মংগল হওঁক।”

উল্লেখ্য যে আজি পুৱা নামনিমুৱা ৰাজধানী এক্সপ্ৰেছযোগে কোকৰাঝাৰ ৰে’লৱে ষ্টেচনত গৌৰৱ গগৈ উপস্থিত হোৱাৰ পিছতে কংগ্ৰেছ কৰ্মীসকলে বিপুল আদৰণি জনায়। জনতাৰ ব্যাপক উৎসাহত ৰে’লৱে ষ্টেচনত বিৰ দি বাট নোপোৱা অৱস্থাৰ সৃষ্টি হয়। গৌৰৱ গগৈ জিন্দাবাদ ধ্বনিৰে কোকৰাঝাৰৰ আকাশ-বতাহ মুখৰিত হৈ পৰে। কোকৰাঝাৰ জিলা কংগ্ৰেছৰ কাৰ্যালয়তো গৌৰৱ গগৈক বিপুল আদৰণি জনোৱা হয়।

কোকৰাঝাৰত কংগ্ৰেছৰ দুৰ্দিন চলি থকাৰ সময়তে গৌৰৱ গগৈৰ আগমন সঞ্জীৱিনী বুলি বিবেচিত হৈছে আৰু এনে বিপুল উৎসাহ পূৰ্বতে দেখা নগৈছিল। আনহাতে গৌৰৱ গগৈয়ে জিলা কংগ্ৰেছৰ কাৰ্যালয়ত এক দলীয় বৈঠকতো মিলিত হয়। উক্ত বৈঠকত গৌৰৱ গগৈয়ে কয় যে সমষ্টিত কোনোবা এজনেহে টিকট পাব কিন্তু আমি সমষ্টিবাসীৰ ওচৰত হাতৰ চিনৰ বাবেহে প্ৰচাৰ কৰিম। হাতৰ চিনৰ প্ৰতি থকা মানুহৰ মৰমৰ বাবে আমি হাতৰ চিনত গুৰুত্ব দিব লাগিব।

বিটিআৰত এইবাৰ যুঁজ এখন হ’ব বুলি মন্তব্য কৰি গৌৰৱ গগৈয়ে ৰাইজৰ কাষ চাপি আশা-আকাংক্ষাৰ বুজ ল’বলৈ আহ্বান জনোৱাৰ লগতে ৰাইজৰ পৰামৰ্শ গ্ৰহণ কৰিবলৈও কংগ্ৰেছ কৰ্মীৰ প্ৰতি আহ্বান জনাইছে। আনহাতে দলীয় সভাতো গৌৰৱ গগৈয়ে আদানিক মাটি দিয়াৰ প্ৰসংগ উত্থাপন কৰি অকল ট্ৰাইবেলৰ মাটি, দুখীয়া মানুহৰ মাটিহে দান দিবলৈ পাইছে নেকি বুলি প্ৰশ্ন উত্থাপন কৰে। মুখ্যমন্ত্ৰী, মন্ত্ৰীৰ মাটি কিয় দান নিদিয়ে বুলি প্ৰশ্ন উত্থাপন কৰি গোটেই অসমৰে মাটিসমূহ যদি মুখ্যমন্ত্ৰী, মন্ত্ৰী, আদানি, আম্বানিৰ হয় তেনেহলে সাধাৰণ মানুহে থাকিব ক’ত বুলিও প্ৰশ্ন উত্থাপন কৰিছে গৌৰৱ গগৈয়ে।

ইফালে, দুদিনীয়া ভ্ৰমণসূচীৰে কোকৰাঝাৰত উপস্থিত হোৱা গৌৰৱ গগৈয়ে দলীয় বৈঠকৰ পিছতে কাৰ্যসূচী অনুসৰি বিয়লিৰ ভাগত আদানিক তিনিহেজাৰ বিঘা মাটি আৱণ্টন দিয়া বাশবাৰীত উপস্থিত হয়। বাশবাৰীত উপস্থিত হৈ গগৈয়ে মাটি-ভেটি হেৰুওৱাৰ আশংকাত প্ৰতিবাদৰত অঞ্চলটোৰ বড়ো জনগোষ্ঠীৰ লোকসকলক সাক্ষাৎ কৰি তেওঁলোকৰ হৈ যুঁজ দি যোৱাৰ আশ্বাস প্ৰদান কৰে।

স্থানীয় ৰাইজে গগৈৰ আগত দুখৰ কথা বিৱৰি কয় যে আমাৰ পূৰ্বপুৰুষে এই মাটিত বসবাস কৰি খেতি-বাতি কৰি আহিছে৷ এই মাটি ট্ৰাইবেল বেল্টৰ আৱেষ্টনীত আছে৷ ট্ৰাইবেল বেল্টৰ আৱেষ্টনীত থকা মাটি আমাৰ হাতৰ পৰা নি আদানিক গতাব খোজা হৈছে৷ আমি মাটি এৰি নিদিও৷ প্ৰতিবাদ কৰি যাম৷ প্ৰতিবাদ কৰি অহা লোকসকলৰ সৈতে বাৰ্তালাপ কৰি ৩,৬০০ বিঘা মাটি গৌতম আদানিক গতাবলৈ দিয়া নহ’ব বুলি কয় গৌৰৱ গগৈয়ে।

কাৰ্যসূচী অনুসৰি গৌৰৱ গগৈয়ে মহামায়া মন্দিৰ দৰ্শন কৰিব আৰু তুলসীবিলৰ এক জনসভাতো জনসভাতো অংশ গ্ৰহণ কৰে। কাইলৈ ৰাতিপুৱা ১০:৩০ বজাত গৌৰৱ গগৈয়ে জিলা কংগ্ৰেছৰ কাৰ্যালয়ত দলীয় বৈঠকত অংশ ল’ব আৰু তাৰপিছতে দুপৰীয়া ১২:০০ বজাত কোকৰাঝাৰ জিলাৰ বাওখুংগ্ৰী সমষ্টিত এক জনসভাত অংশ লৈ বিয়লি ৩:৪৫ বজাত ৰে’লযোগে গুৱাহাটীলৈ ৰাওনা হ’ব।

গুৱাহাটীঃ দেওবাৰে মুখ্যমন্ত্ৰী হিমন্ত বিশ্ব শৰ্মাৰ নেতৃত্বত অনুষ্ঠিত হয় অসম চৰকাৰৰ ৰাজ্যিক কেবিনেট। এই কেবিনেট বৈঠকত ‎চৰকাৰে কেইবাটাও গুৰুত্বপূৰ্ণ সিদ্ধান্ত গ্ৰহণ কৰে। কেবিনেট বৈঠক অনুষ্ঠিত হোৱাৰ পিছত হিমন্ত বিশ্ব শৰ্মাই এক ‎সংবাদমেলোযোগে কেবিনেটৰ সিদ্ধান্ত সমূহ ঘোষণা কৰে।

কেবিনেটে ‘শ্ৰদ্ধাঞ্চলি’ নামৰ এক নীতিত অনুমোদন জনায়। এই ‎নীতি অনুসৰি এতিয়াৰে পৰা অসমৰ বাহিৰত কাম কৰিবলৈ বা পঢ়া শুনা কৰিবলৈ গৈ মৃত্যু হোৱা লোকসকলৰ মৃতদেহ স-‎সন্মানেৰে অসমলৈ ঘূৰাই অনাৰ ব্যৱস্থা কৰা হ’ব। ইয়াৰ বাবে ৰাজ্য চৰকাৰে এক পুঁজি মুকলি কৰিব।

দৰিদ্ৰ লোকসকলে ‎বহিঃৰাজ্যৰ পৰা নিজৰ পৰিয়ালৰ মৃতদেহ ঘূৰাই আনিবলৈ সক্ষম নোহোৱাৰ বাবে এই সিদ্ধান্ত লোৱা হৈছে বুলি ঘোষণা ‎কৰে মুখ্যমন্ত্ৰীয়ে। অৱশ্যে চিকিৎসাৰ বাবে অন্য ৰাজ্যলৈ যোৱা আৰু চিকিৎসাৰ সময়ছোৱাত মৃত্যু হোৱা ব্যক্তিৰ ক্ষেত্ৰত এই ‎সুবিধা প্ৰযোজ্য নহ’ব বুলি মুখ্যমন্ত্ৰীয়ে স্পষ্ট কৰি দিয়ে। এই আঁচনিখন কেৱল কামলৈ বা পঢ়া-শুনা কৰিবলৈ ওলাই ‎যোৱাসকলৰ বাবেহে।

মুখ্যমন্ত্ৰীয়ে ঘোষণা কৰা অনুসৰি অসম আৰক্ষীৰ বিশেষ শাখাক এই নীতি ৰূপায়ণ আৰু নিৰীক্ষণৰ ‎দায়িত্ব অৰ্পণ কৰা হ’ব। বহিঃৰাজ্য কোনো লোকৰ মৃত্যু হ’লে পৰিয়ালসমূহে জৰুৰীকালীন নম্বৰ ১১২ত ফোন কৰিব ‎পাৰিব আৰু বিশেষ শাখাই তৎক্ষণাত এই প্ৰক্ৰিয়া আৰম্ভ কৰিব এবাৰ পৰিয়ালটোৱে ১১২ নম্বৰৰ সৈতে যোগাযোগ কৰাৰ ‎পিছত বিশেষ শাখাই সবিশেষ পৰীক্ষা কৰিব, আৰু এজন ডি আই জি পৰ্যায়ৰ বিষয়াই মৃতদেহটো সম্পূৰ্ণ সন্মানেৰে ‎অসমলৈ ঘূৰাই অনাটো নিশ্চিত কৰাৰ দায়িত্ব ল’ব।

ইয়াৰ উপৰিও এই কেবিনেটত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয়। আইচিডিএছৰ ছুপাৰ ভাইজ’ৰৰ পদ ৫০ ‎শতাংশ সংৰক্ষণ কৰা হ’ব বুলি মুখ্যমন্ত্ৰীয়ে ঘোষণা কৰে । ৰাজ্যিক কেবিনেটৰ সিদ্ধান্ত অনুসৰি গোৱালপাৰাৰ উৰপদ বিলক ‎বনাঞ্চললৈ ৰূপান্তৰ কৰা হ’ব। সংৰক্ষিত বনাঞ্চলৰ বাবে ৯০০০ বিঘা ভূমিত ইতিমধ্যে উচ্ছেদ কৰা হৈছে বুলি শৰ্মাই ‎সংবাদমেলত জানিবলৈ দিয়ে। অৱশ্যে এই সিদ্ধান্ত সম্পৰ্কে কিবা আপত্তি থাকিলে স্থানীয় ৰাইজে এমাহৰ ভিতৰত লিখিত ‎অভিযোগ দাখিল কৰিব পাৰিব।

ইয়াৰ উপৰিও গোৱালপাৰাৰ হাচিলা বিলকো বনাঞ্চললৈ ৰূপান্তৰিত কৰাৰ সিদ্ধান্ত গ্ৰহণ ‎কৰে ৰাজ্যিক কেবিনেটে। লগতে ষ্টেট মিনাৰেল এক্সপ্লোৰেচন ট্ৰাষ্ট গঠনৰ অনুমোদন জনায় কেবিনেটে। অসমত খনিজ ‎পদাৰ্থৰ অন্বেষণ কৰিবৰ বাবে এই ট্ৰাষ্ট গঠন কৰা হৈছে।

কেবিনেটে সিদ্ধান্ত গ্ৰহণ কৰে যে এতিয়াৰে পৰা ৰাষ্ট্ৰীয় স্বাস্থ্য অভিযান, সমগ্ৰ শিক্ষা অভিযান, আৰু শক্তি ‎বিভাগৰ কৰ্মচাৰীয়ে ‘আপোন ঘৰ’ আৰু ‘আপোন বাহন’ৰ সুবিধা লাভ কৰিব । চন্দ্ৰপুৰত নৱোদয় বিদ্যালয় স্থাপনৰ বাবে ‎ৰাজ্য চৰকাৰে ৪০ বিঘা মাটি আবন্টন দিব।

শেহতীয়াকৈ মধ্যাহ্ন ভোজনৰ ৰান্ধনীৰ দৰমহা বৃদ্ধি সম্পৰ্কেও ৰাজ্যিক ‎কেবিনেটে সিদ্ধান্ত গ্ৰহণ কৰে। কেবিনেটে ৰান্ধনীসকলৰ দৰমহা ২০০০ টকালৈ বৃদ্ধিত অনুমোদন জনায়। লগতে ৰাভা ‎হাছং উন্নয়ন পৰিষদ গঠনতো অনুমোদন জনায় দেওবাৰে অনুষ্ঠিত হোৱা ৰাজ্যিক কেবিনেটে।

জীব-জন্তুৰ আক্ৰমণত প্রাণ হেৰুওৱা প্রতিজন ব্যক্তিৰ বাবে ক্ষতিপূৰণ ৪ লাখ টকাৰ পৰা ৫ লাখ টকালৈ বৃদ্ধি কৰাত কেবিনেটে অনুমোদন জনাইছে। লগতে শস্যকেন্দ্রিক ক্ষতিপূৰণ প্ৰতি বিঘাত ৭,৫০০ টকাৰ পৰা ৮,০০০ টকালৈ বৃদ্ধিৰ ক্ষেত্রতো কেবিনেটে অনুমোদন জনাইছে। নিম্ন প্রাথমিক, উচ্চ প্রাথমিক আৰু মাধ্যমিক বিদ্যালয়ত নতুনকৈ নিযুক্তি পোৱা শিক্ষকসকলক প্রথম বার্ষিক বেতন বৃদ্ধি সুবিধাত কেবিনেটে অনুমোদন জনাইছে। সেয়া ২০২৫ চনৰ জুলাই মাহত প্ৰদান কৰা হ’ব। এই বৃদ্ধিৰ দ্বাৰা ২৬,০০০ৰো অধিক শিক্ষক উপকৃত হ’ব বুলি দাবী কৰে মুখ্যমন্ত্ৰীয়ে।

বিটিআৰৰ বাশবাৰীৰ মাটি নিদিয়ে আদানিক

কেবিনেট বৈঠকৰ অন্তত আয়োজন কৰা সংবাদমেলত বিটিআৰৰ বাসবাৰীত থাৰ্মেল পাৱাৰ প্ৰকল্পৰ বাবে আাদানিক মাটি দিয়াক লৈ চলি থকা বিতৰ্ক সন্দৰ্ভতো মুখ খুলিলে মুখ্যমন্ত্ৰী হিমন্ত বিশ্ব শৰ্মাই। মুখ্যমন্ত্ৰীয়ে কয়, “বিটিআৰত আদানিক মাটি দিয়া বা নিদিয়াৰ সন্দৰ্ভত এটা প্ৰক্ৰিয়া লুকাই আছে। অসমত আামি ৩ হাজাৰ মেগাৱট থাৰ্মেল পাৱাৰ উৎপাদনৰ বাবে উদ্যোগ স্থাপন কৰিম। এই উদ্যোগটোৰ বাবে নিবিদা স্থাপন হ’ব। নিবিদাত বহু কোম্পানীয়ে অংশগ্ৰহণ কৰিব। এই প্ৰকল্পটোত প্ৰায় ৪০ হাজাৰ কোটি টকা খৰচ হ’ব।”

তেওঁ আৰু কয়, “আমি ভাবিছিলোঁ যে জাগীৰোডৰ দৰে ডাঙৰ বিনিয়োগ যদি কোকৰাঝাৰত হয় তেন্তে ৰাইজে আাদৰণি জনাব আৰু তাত প্ৰায় এক লাখ মানুহে সংস্থাপন পাব। কিন্তু আমি এনেকুৱা বদনাম ল’ব খোজা নাই যে মানুহে ক’ব আামি ট্ৰাইবেলৰ মাটি ল’ব খুজিছোঁ। কিয়নো বড়ো সমাজে ইয়াৰ বিৰোধিতা কৰিছে। সেয়ে আমি বিকল্প ঠাইত এই প্ৰকল্পৰ কাম আৰম্ভ কৰাৰ সিদ্ধান্ত লৈছোঁ।”

বিকল্প ঠাইত কাম আৰম্ভ কৰিলেও উক্ত স্থানত আন কোনো চৰকাৰী প্ৰকল্প আৰম্ভ কৰাৰো ইংগিত দিয়ে মুখ্যমন্ত্ৰীয়ে। এই সন্দৰ্ভত তেওঁ কয়, “এই প্ৰকল্পৰ বাবে প্ৰয়োজনীয় ৪ হাজাৰ বিঘা মাটি মাত্ৰ ৮০ টা পৰিয়ালে লৈ থৈছে। এইটো হ’ব নোৱাৰে। গতিকে সেই ঠাই আদানিয়ে নললেও মেডিকেল কলেজ বা অন্যান্য অনুষ্ঠান কৰিব লাগিব। কিন্তু জনজাতীয় লোকৰ লগত সংঘাত কৰিব নিবিচৰাৰ বাবে আমি এই প্ৰকল্পটো গোৱালপাৰা বা ধুবুৰীত কৰিম। যদি আমাৰ পাৱাৰ প্লেন্ট নহয় তেন্তে ক’তোৱেই লাইট নজ্বলিব। বিটিআৰৰ ৰাইজে ভাল পাব বুলিহে আমি প্ৰকল্পটো তাত কৰিম বুলি ভাবিছিলোঁ।”