কোকৰাঝাৰঃ কৰ'না ভাইৰাছক লৈ দেশজুৰি আতংকময় পৰিৱেশে বিৰাজ কৰাৰ সময়তে বিটিএডিত দেখা গৈছে এক সুকীয়া পৰিৱেশ। নিৰ্বাচনৰ দিন ঘোষণা হোৱাৰে পৰা মনোনয়ন পত্ৰ দাখিলকে আদি কৰি নিৰ্বাচন সংক্ৰান্তীয় একাধিক কাৰ্য-কলাপৰ বাবে সমবেত হোৱা দেখা গৈছে অসংখ্যাজনক। বুধবাৰৰ দিনটোতো কোকৰাঝাৰত দেখা গ'ল একেই পৰিৱেশ। বিপিএফৰ দূৰ্গ হিচাপে খ্যাত কোকৰাঝাৰ জিলাৰ কেবাটাও পৰিষদীয় সমষ্টিত আজি সমৰ্থকক লৈ মনোনয়ন দাখিল কৰে বিজেপিৰ প্ৰাৰ্থীসকলে।
ফকিৰাগ্ৰাম সমষ্টিৰ পৰা বিজেপি প্ৰাৰ্থী অৰূপ কুমাৰ দে আৰু ছালাকাটি সমষ্টিৰ বিজেপি প্ৰাৰ্থী কবিতা বসুমতাৰীয়ে আজি হাজাৰ হাজাৰ সমৰ্থকক লৈ পৰস্পৰাগত নৃত্য বাদ্যৰে বিশাল সমদল কৰি নিজ নিজ মনোনয়ন পত্ৰ দাখিল কৰে।বিজেপিৰ দ্বাৰা ঘোষিত ২৬ জনীয়া তালিকাৰ ভিতৰৰ কোকৰাঝাৰ জিলাৰ ফকিৰাগ্ৰাম সমষ্টিৰ পৰা বিজেপি প্ৰাৰ্থী অৰূপ কুমাৰ দেৰ সমৰ্থকসকলে তিতাগুৰীৰ প্ৰাৰ্থীৰ বাসভৱনৰ পৰা বিশাল শোভাযাত্ৰা কৰি কোকৰাঝাৰ সদৰ চহৰ পৰিভ্ৰমণ কৰি মনোনয়নপত্ৰ দাখিল কৰে ।
বিপিএফৰে মিত্ৰতা অস্বীকাৰ বিজেপিৰ প্ৰাৰ্থীৰ
বিজেপিক এইবাৰ বিটিএডিবাসীয়ে আদৰি লৈছে। এই মন্তব্য বিজেপিৰ প্ৰাৰ্থী অৰূপ কুমাৰ দেৰ। নিজৰ বিজয় সন্দৰ্ভত নিশ্চয়তা প্ৰদান কৰি বিজেপিয়ে সকলোকে লৈ আগবাঢ়ি যোৱাৰ নীতিৰ বাবেই বিটিচিত বিজেপিৰ বিজয় নিশ্চিত বুলিও দাবী কৰে প্ৰাৰ্থীগৰাকীয়ে। 'বিটিচিত এইবাৰ বিজেপিয়ে চৰকাৰ গঠন কৰিব। আমি সম্পূৰ্ণৰূপে আশাবাদী।'-দেই কয়।
আনহাতে ছালাকাটি সমষ্টিৰ বিজেপি প্ৰাৰ্থী কবিতা বসুমতাৰীয়ে বিটিচিত বিপিএফ-বিজেপিৰ মিত্ৰতা নাই বুলি দাবী কৰিছে। 'দিছপুৰৰ মিত্ৰতাৰ কথা সুকীয়া। ইয়াত বিপিএফৰ সৈতে আমাৰ কোনো মিত্ৰতা নাই। প্ৰধানমন্ত্ৰী মোদী ডাঙৰীয়াই বিটিএডিৰ বাবে বহুত উন্নয়নৰ কাম কৰিছে। শান্তি চুক্তি কৰিছে। গতিকে সকলোৱে এইবাৰ বিটিচিত বিজেপি চৰকাৰ বিচাৰিছে।'-বসুমতাৰীৰ মন্তব্য।
ইপিনে আজি মনোনয়নৰ অন্তিম দিনা ফকিৰাগ্ৰাম সমষ্টিত ১৩ গৰাকী, বনৰগাওঁ সমষ্টিত এগৰাকী আৰু বাওখুংগ্ৰী সমষ্টিত ৩ গৰাকী প্ৰাৰ্থীয়ে মনোনয়ন পত্ৰ দাখিল কৰে।