মাস্ক শেষ, ফাঁচীবজাৰত টেনশ্যন! গুৱাহাটীত ক’ত কেনেকৈ বিয়পিছে কৰ’নাতংক?

গুৱাহাটীঃ সমগ্ৰ দেশৰ লগতে ভাৰতৰ প্ৰায়বোৰ ঠাইতে এতিয়া কৰ’নাতংক৷ কোনোৱে যদি ঘৰৰ ভিতৰৰ পৰা ওলোৱা নাই, কোনোৱে মুখত মাস্ক লগাই ভয়ে ভয়ে নিজৰ কামৰ বাবে বাহিৰলৈ ওলাইছে৷ একাংশই আকৌ মাস্ক, ছেনিটাইজাৰ বিচাৰি দোকানে দোকানে হাবাথুৰি খাইছে৷ ফেচবুক চাইছে, হোৱাটছএপ চাইছে, আত্মীয়-স্বজনলৈ ফোন কৰিছে। মুঠৰ ওপৰত সকলোৰে মুখমণ্ডলত উদ্বিগ্নতাৰ চাপ। কি হ’ব? কি কৰিব? উপায় নাইকিয়া হৈছে৷

এই পৰ্যন্ত ভাৰতত ১৪৭জনৰো অধিক লোক কৰ’নাত আক্ৰান্ত হোৱাৰ লগতে ৩ জনৰ মৃত্যু হৈছে৷ অঘোষিত হ’লেও দেশত এতিয়া জৰুৰী অৱস্থা সদৃশ পৰিস্থিতি৷ অসমত বৰ্তমান সময়লৈকে এজনো লোক আক্ৰান্ত হোৱা নাই যদিও স্ৱাস্থ্য বিভাগ তথা অসম চৰকাৰে গ্ৰহণ কৰিছে বিশেষ সতৰ্কতামূলক ব্যৱস্থা৷