সাংবাদিক ভাস্কৰজ্যোতি মেধিক আনুষ্ঠানিকভাৱে অনুপ্ৰেৰণা বঁটা প্ৰদান

 | by NNO Digital Bureau  |  0
Printer-friendly version

জয়ন্ত মুদৈ,নগাঁও

 

নগাঁওঃ নগাঁৱৰ যুৱ সাংবাদিক ভাস্কৰজ্যোতি মেধিক "অনুপ্ৰেৰণা বঁটা ২০১৯" আনুষ্ঠানিকভাৱে প্ৰদান কৰা হয়। গুৱাহাটীৰ তাৰকাগৃহ প্ৰেক্ষাগৃহত বুধবাৰে বিয়লি অনুষ্ঠিত হোৱা এক গাম্ভীৰ্যপূৰ্ণ অনুষ্ঠানত সাংবাদিক গৰাকীক এই বঁটা প্ৰদান কৰা হয়। 

ৰাজ্যখনৰ লগতে উত্তৰ-পূৰ্বাঞ্চলৰ শিক্ষা, স্বাস্থ্য, সমাজসেৱা আদিকে ধৰি বিভিন্ন ক্ষেত্ৰলৈ আগবঢ়োৱা বৰঙণিৰ বাবে আন কেইবাগৰাকী ব্যক্তিৰ লগতে সাংবাদিকতাৰ ক্ষেত্ৰত আগবঢ়োৱা অৱদানৰ বাবে সাংবাদিক ভাস্কৰজ্যোতি মেধিক এই বঁটা প্ৰদান কৰা হয়। ৰাজ্যখনৰ অন্যতম সামাজিক আৰু স্বেচ্ছাসেৱী অনুষ্ঠান অনুপ্ৰেৰণাই এই বৰ্ষৰপৰা সাংবাদিকতাৰ ক্ষেত্ৰত বঁটা আগবঢ়াইছে৷

বিশিষ্ট সাংবাদিক নৰেন হাজৰিকাৰ সঞ্চালনাত অনুষ্ঠিত বঁটা প্ৰদান অনুষ্ঠানত মেঘালয়ৰ বিশিষ্ট সাংবাদিক, চলচ্চিত্ৰ নিৰ্মাতা বাজাৰি, বিশিষ্ট মনোৰোগ বিশেষজ্ঞ ডাঃ জয়ন্ত দাস, প্ৰবীন ক্ৰীড়াবিদ তৈয়বু নেছা, আৰতি কলিতা আদি উপস্থিত থাকে। অনুপ্ৰেৰণাৰ সম্পাদক দীপজ্যোতি শইকীয়াই আঁত ধৰা এই অনুষ্ঠানত বঁটা গ্ৰহণ কৰি সাংবাদিক গৰাকীয়ে অনুপ্ৰেৰণা বঁটাই তেওঁৰ কৰ্ম সম্পাদনত অনাগত দিনত প্ৰেৰণা যোগাই যাব বুলি মন্তব্য কৰে৷ 

উল্লেখ্য যে, ২০০৩ চনৰপৰা সংবাদ সেৱা আগবঢ়াই অহা সাংবাদিক ভাস্কৰজ্যোতি মেধি বিভিন্ন সামাজিক কাম-কাজৰ লগত জড়িত হোৱাৰ লগতে বৰ্তমান নগাঁও প্ৰেছ ক্লাবৰ সাধাৰণ সম্পাদক হিচাপে কাৰ্যনিৰ্বাহ কৰি আছে। বেবেজীয়াৰ সমীপৱৰ্তী হাতীচোং মেধীচুক নিৱাসী প্ৰয়াত ৰবীন্দ্ৰ মেধি আৰু ৰীনা শইকীয়াৰ পুত্ৰ ভাস্কৰজ্যোতি মেধিয়ে এই বঁটা লাভ কৰাত স্থানীয় বেবেজীয়া প্ৰেছ ক্লাব আৰু জাজৰি প্ৰেছ ক্লাবে অভিনন্দন জ্ঞাপন জনাইছে ৷