Printer-friendly version

অঞ্জনজ্যোতি শৰ্মা, ওদালগুৰিঃ বতৰৰ বিধি পথালি তথা ওদালগুৰি চহৰত নেৰানেপেৰাকৈ অব্যাহত থকা বৰষুণৰ ফলত ওদালগুৰি আঞ্চলিক ছাত্ৰ সন্থাৰ উদ্যোগত আৰু ওদালগুৰিৱাসী ৰাইজৰ সহযোগত  অহা ৩ মে' শুক্ৰবাৰে অনুষ্ঠিত হবলগীয়া পঞ্চম বাৰ্ষিক সদৌ ওদালগুৰি জিলা ছাত্ৰ সন্থাৰ কেন্দ্ৰীয় ৰঙালী বিহু আৰু জনগোষ্ঠীয় সাংস্কৃতিক সমাৰোহখনিৰ দিন সলনি কৰিবলৈ বাধ্য হৈছে। 

আজি সংবাদমাধ্যমলৈ এক বিবৃতি প্ৰেৰণ কৰি অভ্যৰ্থনা সমিতিৰ সাধাৰণ সম্পাদক বিতোপন দাসে কয় যে সমাৰোহখনিৰ বাবে যাৱতীয় সকলো ধৰণৰ কাম সম্পূৰ্ণ হৈ উঠিছিল। কিন্তু বিগত প্ৰায় দেওবাৰৰ পৰা ওদালগুৰি চহৰত চলি থকা নেৰা নেপেৰা বৰষুণৰ ফলত উদযাপনস্থলীৰ মুকলি পথাৰত বৰষুণৰ পানী জমা হোৱাৰ পৰিপ্ৰেক্ষিত পথাৰখনত জনগোষ্ঠীয় সাংস্কৃতিক সমাৰোহখনি অনুস্থিত কৰিব নোৱাৰাৰ সিদ্ধান্ত গ্ৰহণ কৰে। ফলত আগন্তুক ৩ মে'ৰ পৰিৱৰ্তে ১৪ মে'ত উক্ত স্থানতে পঞ্চম বাৰ্ষিক সদৌ ওদালগুৰি জিলা ছাত্ৰ সন্থাৰ কেন্দ্ৰীয় ৰঙালী বিহু আৰু জনগোষ্ঠীয় সাংস্কৃতিক সমাৰোহখনি আয়োজন কৰা হব বুলি অভ্যৰ্থনা সমিতিয়ে জানিবলৈ বিবৃতিযোগে দিছে। 

উল্লেখ্য যে উক্ত জনগোষ্ঠীয় সাংস্কৃতিক সমাৰোহখনিত উপস্থিত থকাৰ কথা আছিল আছুৰ মূখ্য উপদেষ্টা সমুজ্জ্বল কুমাৰ ভট্টাচাৰ্য্য, সভাপতি দিপাংক কুমাৰ নাথ, সাধাৰণ সম্পাদক লুৰীণজ্যোতি গগৈসহ বিশিষ্ট সাংবাদিক অদীপ ফুকনৰ লগতে সাংস্কৃতিক ক্ষেত্ৰখনৰ লগত জৰিত কেইবাগৰাকীও কণ্ঠশিল্পী আৰু অভিনেত্ৰী।