নতুন দিল্লী/গুৱাহাটীঃ বিশ্বৰ প্ৰায় প্ৰতিখন দেশতে ভয়াৱহভাৱে সংক্ৰমিত হোৱা কৰ’না ভাইৰাছৰ বিৰুদ্ধে যুঁজিবলৈ সমগ্ৰ দেশতেই ২১ দিনীয়া ‘লকডাউন’ চলিছে৷ ফলত দেশখনৰ সকলোবোৰ কাম-কাজেই একপ্ৰকাৰ বন্ধ হৈ পৰাৰ লগতে মন্থৰ হৈ পৰিছে দেশৰ অৰ্থনীতিৰ গতি৷ এনে বিপৰ্যয়ৰ সময়তে বিৰোধী দল ভাৰতীয় জাতীয় কংগ্ৰেছৰ ভাৰপ্ৰাপ্ত সভাপতি ছোনিয়া গান্ধীয়ে প্ৰধান মন্ত্ৰী নৰেন্দ্ৰ মোদীৰ সিদ্ধান্তসমূহক সম্পূৰ্ণৰূপে সমৰ্থন জনাই এক পত্ৰযোগে বহুকেইটা প্ৰস্তাৱ আগবঢ়াইছে৷
ছোনিয়া গান্ধীয়ে প্ৰধানমন্ত্ৰীলৈ লিখা পত্ৰখনত বেংক তথা বিত্তীয় প্ৰতিষ্ঠানসমূহে গ্ৰাহকক প্ৰদান কৰা ঋণৰ বিপৰীতে আদায় লোৱা মাহিলি কিস্তি (EMI) পৰৱৰ্তী ৬ মাহলৈ ৰেহাই দিবলৈ পৰামৰ্শ আগবঢ়াইছে৷ ইয়াৰ লগতে এই ঋণসমূহৰ সুতো অহা ৬ মাহলৈ ৰেহাই দিবলৈ পৰামৰ্শ দিছে গান্ধীয়ে। কংগ্ৰেছ নেত্ৰীগৰাকীৰ লগতে বিজেপি নেতা কিৰিট ছোমাইয়ায়ো ৰিজাৰ্ভ বেংকৰ গৱৰ্ণৰলৈ চিঠি লিখি জনসাধাৰণক তেওঁলোকৰ ঋণসমূহৰ মাহিলি কিস্তি (EMI) পৰিশোধৰ ক্ষেত্ৰত কমেও তিনি মাহৰ সময় দিবলৈ আহ্বান জনাইছে বুলি জানিব পৰা গৈছে৷
