মহাৰাষ্ট্ৰত মালবাহী ৰেলৰ খুন্দাত খোজকাঢ়ি ঘৰমুৱা হোৱা ১৫ শ্ৰমিকৰ কৰুণ মৃত্যু

মুম্বাইঃ বিপদৰ ওপৰত বিপদ। এফালে কৰ’না আতংক, আনফালে বিশাখাপট্টনমত বিষাক্ত গেছ নিৰ্গত। তাৰ মাজতে শুকুৰবাৰে নিচেই পুৱাতে মহাৰাষ্ট্ৰৰ ঔৰংগাবাদত সংঘটিত হয় এক শোকাৱহ ৰেল দুৰ্ঘটনা। 

এই দুৰ্ঘটনাত এখন মালবাহী ৰেলে একেলগে ১৫ জনকৈ শ্ৰমিকক মহতিয়াই যায়। ফলত থিতাতে নিহত হয় আটাইকেইজন শ্ৰমিক। আহত হয় আন কেবাজনো। স্থানীয় প্ৰশাসনে শ্ৰমিককেইজন মধ্যপ্ৰদেশৰ পৰা ৰেলপথেৰে খোজকাঢ়ি ঘৰমুৱা হৈছিল বুলি জনাইছে।