বিগত কিছু বছৰত হঠাৎ বাঢ়িছে আকস্মিক মৃত্যুৰ সংখ্যা। শুই থাকোতে, খাই থাকোতে, খেলি থাকোতে অথবা শৰীৰ চৰ্চাৰ সময়তে হঠাৎ ঢলি পৰি যোৱা দুই-তিনিবছৰত মৃত্যুক সাৱটিছে কেইবাগৰাকীও প্ৰসিদ্ধ ব্যক্তিৰ লগতে অসংখ্য লোকে। এনে আকস্মিক মৃত্যুক লৈ সমগ্ৰ দেশজুৰি তীব্ৰ আতংকময় পৰিৱেশে বিৰাজ কৰাও পৰিলক্ষিত হৈছে। বিভিন্নজনে এনে মৃত্যুৰ কাৰণ হিচাপে ক’ভিড মহামাৰীৰ সময়ত চৰকাৰে প্ৰদান কৰা ক’ভিড-১৯ ভেকচিন বুলি দাবী কৰি আহিছে। ক’ভিড মহামাৰীৰ পৰৱৰ্তী সময়ছোৱাত উদ্বেগজনকভাৱে বৃদ্ধি পোৱা এই মৃত্যুৰ ঘটনাই স্বাভাৱিকতে বিগত সময়ত চৰকাৰে প্ৰদান কৰা ভেকচিনৰ ওপৰতো প্ৰশ্নৰ উত্থাপন কৰিছে।

উল্লেখ্য যে, ক’ভিডৰ পৰৱৰ্তী সময়ছোৱাত ক’ভিড-১৯ ভেকচিনৰ দুটা টীকা লোৱাটো বাধ্যতামূলক কৰিছিল ভাৰত চৰকাৰে। বাছ আস্থান, বিমান বন্দৰ, ৰে’লৱে ষ্টেছন আনকি আন আন ৰাজহুৱা স্থানতো বিচৰা হৈছিল ব্যক্তিৰ ভেকচিনৰ প্ৰমাণপত্ৰ। সেই সময়ত চৰকাৰী-বেচৰকাৰী কৰ্মক্ষেত্ৰতো বাধ্যতামূলক কৰা হৈছিল টীকাকৰণৰ প্ৰমাণপত্ৰ।

ভাৰতৰ ২০০ কোটি নাগৰিকক ভেকচিন প্ৰদান কৰি তেতিয়াই কৃতিত্ব লৈছিল প্ৰধানমন্ত্ৰী নৰেন্দ্ৰ মোদী আৰু কেন্দ্ৰৰ বিজেপি চৰকাৰে। বাটে-ঘাটে প্ৰধানমন্ত্ৰীক কৃতজ্ঞতা জনাই অঁৰা হৈছিল “থেংক ইউ মোদী জী” বেনাৰ। কিন্তু সচেতন মহলে তেতিয়াও এই ক’ভিড ভেকচিনৰ বৈধতাক লৈ প্ৰশ্ন উত্থাপন কৰিছিল। কিদৰে তৃতীয় পৰ্যায়ৰ পৰীক্ষা অবিহনে এই ভেকচিন মুকলি কৰা হ’ল তাক লৈও সন্দেহ ব্যক্ত কৰিছিল বিৰোধীয়ে।

ক’ভিডৰ পৰৱৰ্তী সময়ত ভাৰতত প্ৰদান কৰা ৮০ শতাংশ ভেকচিনেই আছিল ক’ভিশ্বিল্ড ভেকচিন। ভাৰতৰ ছেৰাম ইনষ্টিটিউটে অক্সফৰ্ড ইউনিভাৰ্চিটিৰ সৈতে যৌথভাৱে ক'ভিশ্বিল্ড নামেৰে প্ৰস্তুত কৰিছিল এষ্ট্ৰাজেনেকা ভেকচিন। ২০২১ চনত প্ৰথমবাৰৰ বাবে প্ৰস্তুত কৰা এষ্ট্ৰাজেনেকা ভেকচিন (ক’ভিশ্বিল্ড)ক লৈ নিৰ্মাণৰ সময়তে অলেখ প্ৰশ্নৰ অৱতাৰণা হৈছিল। বহু দেশে ২০২১ চনতেই এই ভেকচিন নিষিদ্ধ কৰিছিল। ক’ভিডৰ পিছৰ সময়ছোৱাত আকস্মিকভাৱে বৃদ্ধি পোৱা হৃদৰোগৰ সংখ্যাৰ আঁৰত এই ভেকচিন বুলি একাংশই দাবী কৰিছিল তেতিয়াই।

বিজনেছ ষ্টেণ্ডাৰ্ডৰ প্ৰতিবেদন অনুসৰি এই ভেকচিন সন্দৰ্ভত চিকিৎসা বিশেষজ্ঞসকলে উত্থাপন কৰা প্ৰশ্নসমূহ এতিয়া অধিক শক্তিশালী হৈছে। এষ্ট্ৰাজেনেকা সম্পৰ্কে দাবী কৰা হৈছে যে এই ভেকচিনৰ ফলত কিছু লোকৰ মৃত্যু হৈছিল আৰু বহু লোকে গুৰুতৰ ৰোগৰ সন্মুখীন হ’বলগীয়া হৈছিল। ব্ৰিটিছ ফাৰ্মাচিউটিকেল কোম্পানী এষ্ট্ৰাজেনেকাইও স্বীকাৰ কৰিছে যে তেওঁলোকৰ ভেকচিনৰ বিপজ্জনক পাৰ্শ্বক্ৰিয়া হ’ব পাৰে। ব্ৰিটিছ উচ্চ ন্যায়ালয়ত দাখিল কৰা নথি-পত্ৰত কোম্পানীটোৱে স্বীকাৰ কৰিছে যে তেওঁলোকৰ ভেকচিনে থ্ৰম্ব’চাইট’পেনিয়া চিনড্ৰম (টিটিএছ)নামৰ থ্ৰম্ব’ছিছৰ সৃষ্টি কৰিব পাৰে। 

এষ্ট্ৰাজেনেকা ভেকচিন কি?

উল্লেখ্য যে, এষ্ট্ৰাজেনেকা ভেকচিন ভাৰতত AZD1222 বা ক’ভিশ্বিল্ড নামেৰে জনাজাত। ই হৈছে ক’ভিড-১৯ৰ কাৰণ হোৱা SARS-CoV-2 ভাইৰাছৰ পৰা ৰক্ষা পাবলৈ প্ৰস্তুত কৰা ভাইৰেল ভেক্টৰ ভেকচিন। এই ভাইৰাছে কাম কৰাৰ ধৰণৰ কথা ক’বলৈ গ’লে ই চিম্পাঞ্জীত পোৱা সাধাৰণ চৰ্দি ভাইৰাছৰ (এডিন’ভাইৰাছ) দুৰ্বল সংস্কৰণ ব্যৱহাৰ কৰি কাম কৰে। ইয়াক SARS-CoV-2 ভাইৰাছৰ পৰা অহা এটা প্ৰটিনৰ জিন কঢ়িয়াই নিয়াৰ বাবে সংশোধন কৰা হৈছে। শৰীৰত বেজী দিয়াৰ পিছত এই ভেকচিনে মানুহৰ ৰোগ প্ৰতিৰোধ ক্ষমতাক উদ্দীপিত কৰি এন্টিব’ডি উৎপন্ন কৰি টি-চেল সক্ৰিয় কৰে, যাতে মানৱ শৰীৰে সংক্ৰমণ সৃষ্টি কৰা ভাইৰাছৰ বিৰুদ্ধে যুঁজিব পাৰে।

এষ্ট্ৰাজেনেকা ভেকচিনৰ বিকাশৰ কথা ক’বলৈ গ’লে অক্সফৰ্ড বিশ্ববিদ্যালয় আৰু ব্ৰিটিছ-ছুইডেনৰ ঔষধ কোম্পানী এষ্ট্ৰাজেনেকাৰ সহযোগত এই ভেকচিন প্ৰস্তুত কৰা হৈছে। অক্সফৰ্ডৰ গৱেষকসকলে কিছু বছৰ ধৰি এডিন’ভাইৰাছ ভেক্টৰ ব্যৱহাৰ কৰি ভেকচিন প্ৰস্তুত কৰি আহিছিল। ক’ভিড মহামাৰীৰ আগমনৰ পিছত কোম্পানীটোৱে দ্ৰুতগতিত কোৰোনা ভাইৰাছৰ প্ৰতিষেধক নিৰ্মাণৰ দিশত নিজৰ প্ৰচেষ্টা তীব্ৰতৰ কৰি তোলে।

পুনেস্থিত ফাৰ্মা কোম্পানী ছেৰাম ইনষ্টিটিউট অৱ ইণ্ডিয়াই ২০২১ চনৰ জানুৱাৰী মাহত এষ্ট্ৰাজেনেকা আৰু অক্সফৰ্ড ইউনিভাৰ্চিটিৰ সৈতে ভাৰত আৰু আন কিছুমান দৰিদ্ৰ দেশৰ বাবে ক’ভিশ্বিল্ড ভেকচিন নিৰ্মাণৰ চুক্তিত স্বাক্ষৰ কৰিছিল। এই অংশীদাৰিত্বৰ জৰিয়তে ভাৰত আৰু বিশ্বজুৰি বিপুল চাহিদা পূৰণৰ বাবে ছিৰামে ক’ভিশ্বিল্ড নামেৰে ভেকচিনটো গণ উৎপাদন কৰিবলৈ সক্ষম হৈছিল। ক’ভিশ্বিল্ড নিৰ্মাণৰ পিছত ভাৰত চৰকাৰ আৰু ৰাজ্য চৰকাৰৰ সহযোগত ভাৰতত ইয়াৰ বিতৰণৰ সুবিধা কৰি দিয়া হয় আৰু ভেকচিন জনসাধাৰণৰ মাজলৈ প্ৰেৰণ কৰা হয়।

বিশ্বৰ সৰ্ববৃহৎ টিকাকৰণ কাৰ্যসূচীৰ অংশ হিচাপে ২০২২ চনৰ ভিতৰত ভাৰতত ১.৭ বিলিয়নতকৈ অধিক ড’জ ক’ভিশ্বিল্ড প্ৰদান কৰা হৈছে। এষ্ট্ৰাজেনেকা ভেকচিনৰ সৰল সংৰক্ষণ আৰু ব্যাপক উপলব্ধতাই ভাৰত আৰু সমগ্ৰ বিশ্বতে টিকাকৰণ অভিযানত গুৰুত্বপূৰ্ণ ভূমিকা পালন কৰিছিল। এই ভেকচিন ভাৰতৰ বহু সংখ্যক সাধাৰণ লোকলৈ প্ৰেৰণ কৰা হৈছিল।

২০২১ চনতে নিষিদ্ধ কৰিছিল বহু দেশে

বিশ্ব স্বাস্থ্য সংস্থাই এষ্ট্ৰাজেনেকা ভেকচিনৰ পাৰ্শ্বক্ৰিয়াৰ তালিকা প্ৰস্তুত কৰিছে। ইয়াৰ ভিতৰত মৃদুৰ পৰা মধ্যমীয়া লক্ষণসমূহো অন্তৰ্ভুক্ত। এষ্ট্ৰাজেনেকা ভেকচিন লোৱাৰ পিছত দাবী কৰা পাৰ্শ্বক্ৰিয়াসমূহৰ ভিতৰত বেজী দিয়া ঠাইত অস্বস্তি অনুভৱ কৰা, অসুস্থতা অনুভৱ কৰা, ভাগৰুৱা হোৱা, জ্বৰ, মূৰৰ বিষ, অসুস্থতা অনুভৱ কৰা, গাঁঠি বা পেশীৰ বিষ, ফুলা, বেজী দিয়া ঠাইত ৰঙা পৰা, মূৰ ঘূৰোৱা, টোপনি অহা ,অত্যাধিক ঘাম ওলোৱা, পেটৰ বিষ আৰু অজ্ঞান হোৱা আদি পৰিলক্ষিত হয়। অৱশ্যে পৱৰ্তী সময়ত এয়া কোৱা হয় যে এই পাৰ্শ্বক্ৰিয়াসমূহ সাময়িক আৰু চিকিৎসালয়ত ভৰ্তিৰ প্ৰয়োজন নোহোৱাকৈয়ে সমাধান হয়।

এষ্ট্ৰাজেনেকা ভেকচিনৰ ওপৰত অধিক তীক্ষ্ণ দৃষ্টি নিক্ষেপ কৰাৰ পিছত বহু দেশত ইয়াক নিষিদ্ধ কৰা হয়। ২০২১ চনত প্ৰথমবাৰৰ বাবে ডেনমাৰ্কে দেশখনত এষ্ট্ৰাজেনেকা ভেকচিন নিষিদ্ধ কৰিছিল। ইয়াৰ পিছত আয়াৰলেণ্ড, থাইলেণ্ড, নেদাৰলেণ্ড, নৰৱে, আইচলেণ্ড, কংগো আৰু বুলগেৰিয়াইও ইয়াক নিষিদ্ধ কৰে। অন্যহাতে জাৰ্মানী, ফ্ৰান্স, ইটালী, স্পেইনকে ধৰি ইউৰোপীয় দেশসমূহেও ২০২১ চনত এষ্ট্ৰাজেনেকাৰ ক’ভিড-১৯ ভেকচিন ব্যৱহাৰ বন্ধ কৰি দিয়ে। দেশ কেইখনত এই ভেকচিন প্ৰদানৰ পিছত ৰোগীৰ শৰীৰত তেজ জমা হোৱাৰ কেইবাটাও ঘটনা ধৰা পৰাৰ পিছতে বন্ধ কৰি দিয়া হৈছিল এষ্ট্ৰাজেনেকাৰ টিকাকৰণ। কানাডা, ছুইডেন,লাটভিয়া আৰু স্লোভেনিয়াইও ২০২১ চনত ইয়াৰ ব্যৱহাৰ বন্ধ কৰি দিয়ে। ইয়াৰ পিছত এই ভেকচিন নিৰাপদ নহয় বুলি বিবেচনা কৰি অষ্ট্ৰেলিয়া,ইণ্ডোনেছিয়া আৰু মালয়েছিয়াত নিষিদ্ধ কৰা হয়।

ভেকচিনক লৈ কি নতুন বিতৰ্ক?

গ্ৰেট ব্ৰিটেইনৰ সংবাদ মাধ্যমত প্ৰকাশিত বাতৰি অনুসৰি জেমী স্কট নামৰ এগৰাকী ব্ৰিটিছ লোকে এষ্ট্ৰাজেনেকাৰ বিৰুদ্ধে ব্ৰিটেইনৰ এখন উচ্চ ন্যায়লয়ত গোচৰ তৰে। স্কটে অভিযোগ কৰে যে কোম্পানীটোৰ ক’ৰ’না ভেকচিনৰ বাবেই তেওঁ টিটিএছৰ বলি হৈছে। তেওঁ কয় যে তেওঁ ব্ৰেইন ডেমেজৰ বলি হ’বলগীয়া হৈছে। অন্যহাতে জেমী স্কটৰ উপৰিও আন এক ডজনৰো অধিক ব্যক্তিয়ে এই এষ্ট্ৰাজেনেকা ভেকচিনৰ পাৰ্শ্বক্ৰিয়াৰ সন্মুখীন হোৱা বুলি দাবী কৰি আদালতৰ দাৰস্থ হৈ কোম্পানীটোৰ পৰা ক্ষতিপূৰণ দাবী কৰে।

ফেব্ৰুৱাৰী মাহত ব্ৰিটেইনৰ আদালতত ৰুজু হোৱা এই গোচৰত এষ্ট্ৰাজেনেকাই আদালতক জনায় যে এই ভেকচিন অক্সফৰ্ড ইউনিভাৰ্চিটিৰ সহযোগত প্ৰস্তুত কৰা হৈছে। আনহাতে কোম্পানীটোৱে আদালতৰ সন্মুখত এই ভেকচিনৰ ফলত টি টি এছৰ দৰে পাৰ্শ্বক্ৰিয়া হব পাৰে বুলিও স্বীকাৰ কৰে। অৱশ্যে এনে পাৰ্শ্বক্ৰিয়া অতি বিৰল বুলিও কয় এষ্ট্ৰাজেনেকাই। কোম্পানীটোৱে জনোৱা মতে,ক’ৰ’না ভেকচিন নল’লেও টিটিএছ হ’ব পাৰে। কোম্পানীটোৱে দাবী কৰে যে ভেকচিন লোৱাৰ পিছতহে মানুহে টিটিএছত আক্ৰান্ত হৈছে বুলি কোৱাটো শুদ্ধ নহয়।

এষ্ট্ৰাজেনেকাই কয় যে এই ভেকচিন বহু স্বতন্ত্ৰ অধ্যয়নত অতি ফলপ্ৰসূ বুলি প্ৰমাণিত হৈছে। কোম্পানীটোৱে কয় যে এই অধ্যয়নসমূহৰ প্ৰতি গুৰুত্ব দিয়াটো গুৰুত্বপূৰ্ণ। এষ্ট্ৰাজেনেকাৰ মতে এই ভেকচিন ক্লিনিকেল ট্ৰায়েলত আৰু বিশ্বজুৰি গ্ৰহণ কৰা হৈছে। ইয়াৰ পৰা দেখা যায় যে এই ভেকচিনৰ দ্বাৰা মানুহ উপকৃত হৈছে। কোম্পানীটোৱে দাবী কৰে যে এই ভেকচিনৰ সহায়ত ক’ভিড-১৯ মহামাৰীৰ সময়ত বিশ্বজুৰি ৬০ লাখ লোকৰ জীৱন ৰক্ষা কৰা হৈছে।

উল্লেখ্য যে, থ্ৰম্ব’চাইট’পেনিয়া চিণ্ড্ৰমৰ সৈতে থ্ৰম্ব’ছিছ (টিটিএছ) ভেকচিনৰ সৈতে জড়িত এক বিৰল কিন্তু গুৰুতৰ ৰোগ। বিশেষকৈ এডিন’ভাইৰাছ ভেক্টৰ ভেকচিন যেনে এষ্ট্ৰাজেনেকা ভেকচিন আৰু জনছন এণ্ড জনছনৰ জনছন ভেকচিনৰ ফলত এই ৰোগ হোৱা বুলি দাবী উত্থাপন হৈ আহিছে। টি টি এছ অৱস্থাত প্লেটলেটৰ মাত্ৰা কম হোৱাৰ লগতে তেজৰ গোট গঠন হয়। এই অৱস্থা সাধাৰণতে মগজু বা পেটত তেজ জমা হোৱাৰ লগতে প্লেটলেটৰ সংখ্যা কম হোৱাৰ ফলত প্ৰকাশ পায়। টিটিএছৰ লক্ষণসমূহ হ’ল তীব্ৰ মূৰৰ বিষ, দৃষ্টিশক্তি ম্লান হোৱা, কথা কোৱাত অসুবিধা, বুকুৰ বিষ, পেটৰ বিষ, উশাহ লোৱাত কষ্ট পোৱা, ভৰি দুখন ফুলা আদি। টিটিএছ ভেকচিনত ব্যৱহৃত এডিন’ভাইৰাছ ভেক্টৰৰ প্ৰতি প্ৰতিৰোধ ক্ষমতাৰ প্ৰতিক্ৰিয়াৰ ফলত হোৱা বুলি ভবা হয়, যিয়ে প্লেটলেট সক্ৰিয় কৰি তেজ জমা হোৱাৰ কাৰণ হয়।

চিন্তাৰ কোনো কাৰণ নাই...

ভাৰতত প্ৰায় ২২১ কোটি ক’ভিড ভেকচিনৰ ড’জ লোকক প্ৰদান কৰা হৈছে। ভাৰতৰ ৯৩ শতাংশ লোকে ইতিমধ্যেই লাভ কৰিছে ক’ৰ’নাৰ প্ৰতিষেধক। ক’ভিড ভেকচিন নিৰীক্ষণ কৰা এপ ‘কোউইন’ৰ তথ্য অনুসৰি এ ই এফ আইৰোগীৰ সংখ্যা হৈছে ০.০০৭ শতাংশ। এই মাত্ৰাসমূহত ১৭০ কোটি ক’ভিশ্বিল্ডৰ মাত্ৰা অন্তৰ্ভুক্ত কৰা হৈছে। একে সময়তে বিশ্বত ২৫০ কোটিতকৈ অধিক ড’জ এষ্ট্ৰাজেনেকা প্ৰদান কৰা হৈছে। কিন্তু ২০২১ চনতেই ইউৰোপীয় চিকিৎসা সংস্থাই এষ্ট্ৰাজেনেকাৰ বাবে ২২২ জন লোকৰ তেজ জমা হোৱাৰ খবৰ দিছিল। উদাহৰণস্বৰূপে, সেই সময়ত লাখৰ ভিতৰত ১ জন বিপদত পৰিছিল। ভাৰতেও তেজ জমা হোৱাৰ বিষয়টোৰ বিষয়ে অৱগত আছিল আৰু ইয়াক নিৰীক্ষণ আৰু পৰ্যবেক্ষণ কৰা হৈছিল, কিন্তু এই ভেকচিনৰ ফলত লাভৰ পৰিসংখ্যা আছিল বৃহৎ আৰু লোকচান আছিল নগণ্য।

যিকোনো ভেকচিন ৰোল আউট হোৱাৰ পিছত এ ই এফ আই অৰ্থাৎ প্ৰতিষেধক দিয়াৰ পিছৰ পৰিঘটনা দেখা যায়। একেদৰে ভাৰত চৰকাৰে দীৰ্ঘদিন ধৰি ক’ৰ’নাৰ প্ৰতিষেধক পৰ্যবেক্ষণ কৰিছিল। ইয়াৰ বাবে এটা পৰ্টেল স্থাপন কৰাৰ লগতে এখন সমিতিও গঠন কৰা হয়। এতিয়া এষ্ট্ৰাজেনেকা সন্দৰ্ভত খবৰৰ পিছত ভাৰতৰ ক’ভিশ্বিল্ডৰ ওপৰত প্ৰশ্ন উত্থাপন হৈছে যদিও বিশেষজ্ঞসকলৰ মতে ইয়াৰ ইমান দীঘলীয়া প্ৰভাৱ নাই। যদি কোনো সমস্যা হয় তেন্তে হয় ভেকচিন দিয়াৰ লগে লগে দেখা দিয়ে, নহয় এমাহৰ পৰা ডেৰ মাহৰ পিছত ইয়াৰ প্ৰভাৱ দেখা দিবলৈ আৰম্ভ কৰে। ইয়াৰ প্ৰভাৱ দৃশ্যমান হ’লেও ভাৰতত টিকাকৰণৰ পিছত এ ই এফ আইৰ শতকৰা হাৰ ০.০০৭ শতাংশ। যাৰ বাবে বিশেষজ্ঞসকলে দাবী কৰে যে এতিয়া এই ভেকচিনক লৈ ভয় কৰিবলগীয়া একো নাই।

উল্লেখ্য যে, ভাৰত চৰকাৰে কৰ’না ভেকচিন প্ৰদান কৰাৰ পিছতে এ ই এফ আই পৰ্টেল সৃষ্টি কৰিছিল। ইয়াৰ সমান্তৰালকৈ এ ই এফ আই কমিটিও গঠন কৰা হয়। এই সমিতিখনে শেষবাৰৰ বাবে ২০২২ চনৰ মে’ মাহত প্ৰতিবেদন দাখিল কৰিছিল। এই প্ৰতিবেদনত কৰ’নাভেকচিন লোৱাৰ পিছত জটিলতাৰ অভিযোগ উত্থাপন কৰা সকলৰ বিষয়ে আছিল। প্ৰতিবেদন অনুসৰি, ভেকচিনৰ পাৰ্শ্বক্ৰিয়া কেৱল ক’ভিশ্বিল্ডৰেই নাছিল, আছিল স্পুটনিক,ক’ভাক্সিন আৰু কৰ্বেভেক্সৰ ক্ষেত্ৰতো। 

কি কয় কেন্দ্ৰীয় স্বাস্থ্যমন্ত্ৰীয়ে?

শেহতীয়াকৈ ব্ৰিটেইনৰ আদালতত এষ্ট্ৰাজেনেকাই ক’ভিশ্বিল্ডৰ পাৰ্শ্বক্ৰিয়া সন্দৰ্ভত কৰা স্বীকাৰোক্তি আৰু ক’ভিড ভেকচিনৰ বাবে দেশত হৃদৰোগত আক্ৰান্ত হোৱাৰ অভিযোগ সন্দৰ্ভত প্ৰতিক্ৰিয়া প্ৰকাশ কৰিছে কেন্দ্ৰীয় স্বাস্থ্য মন্ত্ৰী মনসুখ মাণ্ডবিয়াইও। তেওঁ ক’ভিড ভেকচিনৰ ফলত হৃদৰোগৰ সম্ভাৱনাৰ অভিযোগ খাৰিজ কৰি কয় যে,ভাৰতীয় চিকিৎসা গৱেষণা পৰিষদে এক বিশদ অধ্যয়ন চলাইছে য’ত দেখা গৈছে যে হাৰ্ট এটেকৰ কাৰণৰ সৈতেক’ভিড-১৯ ভেকচিনৰ কোনো সম্পৰ্ক নাই। ভেকচিনে হৃদৰোগৰ সম্ভাৱনাও বৃদ্ধি নকৰে আৰু হাৰ্ট এটেকৰো সৃষ্টি নকৰে। তেওঁ এনেবোৰ কথা বিশ্বাস নকৰিবলৈও সকলোকে আহ্বান জনায়।

সংবাদ সংস্থা এ এন আইৰ এক কাৰ্যসূচীত স্বাস্থ্য মন্ত্ৰীগৰাকীয়ে কয় যে সমগ্ৰ বিশ্বতে হাৰ্ট এটেকৰ সংখ্যা বৃদ্ধি পোৱাটো চিন্তনীয়। চিকিৎসকে কয় যে এজন ব্যক্তিৰ অস্বাস্থ্যকৰ জীৱনশৈলী আৰু মদ্যপান আৰু ধূমপানৰ দৰে অভ্যাস এই বিপদৰ কাৰক হ’ব পাৰে। এই ভেকচিনৰ দ্বাৰা হাৰ্ট এটেকৰ সম্ভাৱনা বৃদ্ধি পোৱাৰ কোনো প্ৰমাণ পোৱা নাই।এক প্ৰশ্নৰ উত্তৰত কেন্দ্ৰীয় স্বাস্থ্যমন্ত্ৰীগৰাকীয়ে কয় যে ক’ভিড-১৯ ভেকচিন সন্দৰ্ভত ভুল ধাৰণা সৃষ্টিৰ প্ৰচেষ্টা চলোৱা হৈছে। আজি কাৰোবাৰ যদি ষ্ট্ৰোক হয়, তেন্তে কিছুমানে ক’ভিড-১৯ৰ ভেকচিনৰ বাবেই বুলি ভাৱে। এই সন্দৰ্ভত আইচিএমআৰে এক বিশদ অধ্যয়ন চলাইছে, য’ত দেখা গৈছে যে এই ভেকচিনে হৃদযন্ত্ৰৰ স্বাস্থ্যৰ ওপৰত কোনো ধৰণৰ নেতিবাচক প্ৰভাৱ দেখা পোৱা নাই।

স্বাস্থ্যমন্ত্ৰীগৰাকীয়ে লগতে কয় যে,হাৰ্ট এটেকৰ বহু কাৰণ আছে,ইয়াৰ ভিতৰত বেয়া জীৱনশৈলী,অত্যধিক ধঁপাত সেৱন আৰু অত্যধিক মদ্যপান মূল কাৰণ হৈ আহিছে। বহু সময়ত ভুল তথ্য মানুহৰ মাজত বিয়পি পৰে আৰু কিছু সময়ৰ বাবে বিশ্বাসত পৰিণত হয়,অৱশ্যে ইয়াৰ বৈজ্ঞানিক প্ৰমাণ লাভ কৰাটো গুৰুত্বপূৰ্ণ।

News Next One হৈছে 'Crowdfunding’ৰ জৰিয়তে পৰিচালিত নিউজ ৱেবছাইট। যদিহে বাতৰিটো পঢ়ি উপকৃত হৈছে আৰু পিছলৈকো এনেধৰণৰ তথ্যসমৃদ্ধ অধিক বাতৰি পঢ়িব বিচাৰে তেন্তে তলৰ ফটোখনত ক্লিক কৰি আমাক ১০ টকা, ২০ টকা, ১০০ টকা যিয়ে যেনেকৈ পাৰে তেনেকৈ সহায় কৰক।

Click to Read ►অনুগ্ৰহ কৰি আমাক 'বন্ধ হৈ পৰা' অথবা 'বিক্ৰী যাবলগীয়া' হোৱাৰ পৰা ৰক্ষা কৰক!

ক’ভিড ভেকচিনৰ সৈতে ইলেক্টৰেল বণ্ডৰ সম্পৰ্ক, বিৰোধীৰ প্ৰশ্ন

উল্লেখ্য যে, ভাৰতৰ পুনেস্থিত ছেৰাম ইনষ্টিটিউটে অক্সফৰ্ড ইউনিভাৰ্চিটি আৰু এষ্ট্ৰাজেনেকাৰ সৈতে মিলি প্ৰস্তুত কৰিছিল সদ্য বিতৰ্কিত ক’ভিড ভেকচিন ক’ভিশ্বিল্ড। কিন্তু শেহতীয়াকৈ এষ্ট্ৰাজেনেকাই এই ভেকচিনৰ পাৰ্শ্বক্ৰিয়াক লৈ কৰা মন্তব্যৰ পিছতে এতিয়া প্ৰধানমন্ত্ৰী নৰেন্দ্ৰ মোদী আৰু বিজেপিক উভতি ধৰিছে ভাৰতৰ বিৰোধী ৰাজনৈতিক দলসমূহে।

২০২০ চনৰ ক’ভিড ভেকচিন প্ৰস্তুতৰ দায়িত্ব লাভ কৰাৰ পূৰ্বে ছেৰাম ইনষ্টিটিউটে বিজেপিক ৫২ কোটি টকাৰ ইলেক্টৰেল বণ্ড প্ৰদান কৰাৰ অভিযোগ উত্থাপন হৈছিল। বিৰোধীয়ে অভিযোগ কৰা মতে, বিজেপিক ইলেক্টৰেল বণ্ড প্ৰদান কৰাৰ বিনিময়তে ছেৰাম ইনষ্টিটিউটক ক’ভিড ভেকচিন প্ৰস্তুত কৰাৰ দায়িত্ব দিছিল প্ৰধানমন্ত্ৰী নৰেন্দ্ৰ মোদীয়ে। 

কোভিৰ পৰৱৰ্তী সময়ত ভাৰতীয়ক বিনামূলীয়া ভেকচিন ড’জ প্ৰদান কৰি তাৰ কৃতিত্ব লোৱা প্ৰধানমন্ত্ৰী নৰেন্দ্ৰ মোদীৰ বৰ্তমানৰ স্থিতিক লৈও প্ৰশ্ন কৰে কংগ্ৰেছে। সেই সময়ত বাটে-ঘাটে প্ৰধানমন্ত্ৰীক কৃতজ্ঞতা জনাই আঁৰি থোৱা থেংক মোদী জীৰ বেনাৰ এতিয়া ক’ত আছে বুলিও প্ৰশ্ন কৰে কংগ্ৰেছৰ জ্যেষ্ঠ নেতা বি এছ শ্ৰীনিৱাসে।

টুইটযোগে কংগ্ৰেছ নেতাগৰাকীয়ে নৰেন্দ্ৰ মোদীক প্ৰশ্ন কৰে, ‘ব্ৰিটেইনৰ আদালতত ক’ভিশ্বিল্ড ভেকচিন তৈয়াৰ কৰা কোম্পানীয়ে স্বীকাৰ কৰিছে যে তেওঁলোকে তৈয়াৰ কৰা ভেকচিনৰ ফলত বিৰল পাৰ্শ্বক্ৰিয়া টি টি এছ হ’ব পাৰে,যাৰ ফলত তেজ জমা হোৱাৰ লগতে হাৰ্ট এটেক আৰু ব্ৰেইনৰ ৰক্তক্ষৰণৰ সম্ভাৱনা বৃদ্ধি পায়। এতিয়া ক'ত আছে থেংক ইউ মোদী জীৰ বেনাৰ? কিয় মৌন হৈ আছে প্ৰধানমন্ত্ৰী আৰু স্বাস্থ্য মন্ত্ৰালয়?”

আন এটা টুইটত বি এছ শ্ৰীনিৱাসে ইলেক্টৰেল বণ্ডক লৈ প্ৰশ্ন কৰে, “ছেৰাম ইনষ্টিটিউটৰ পৰা বিজেপিয়ে ৫০ কোটি টকাৰ নিৰ্বাচনী বণ্ড লোৱাৰ কাৰণ এইটোৱেই আছিল নেকি?”কংগ্ৰেছ নেতাগৰাকীয়ে আৰু কয়, ‘এয়া ৰাজনীতিৰ কথা নহয় বৰঞ্চ মানুহৰ জীৱনৰ কথা। নিৰ্লজ্জভাৱে ভেকচিনৰ কৃতিত্ব লোৱা প্ৰধানমন্ত্ৰীয়ে, উত্তৰ দিব লাগিব। কাৰণ ভাৰতৰ আধাতকৈ অধিক জনসংখ্যাক এষ্ট্ৰাজেনেকাৰ ক’ভিশ্বিল্ড প্ৰদান কৰা হৈছে।”