পলিমা চেতিয়া বসুমতাৰী, কাজিৰঙাঃ কাজিৰঙা ৰাষ্ট্ৰীয় উদ্যান দৰ্শন কৰিবলৈ অহা দেশ-বিদেশৰ পৰ্যটকে দেওবাৰৰেপৰা আৰম্ভ হোৱা কহঁৰা বসন্ত উৎসৱত অংশগ্ৰহণ কৰি নাচনীৰ সৈতে প্ৰাণ খুলি কঁকাল ঘূৰাই ঘূৰাই নাচি আনন্দত মতলীয়া হৈ পৰা দেখা গ’ল।

বিগত বৰ্ষবোৰৰ দৰে এইবাৰো কাজিৰঙাৰ কহঁৰাবাসী ৰাইজে জাতি, ধৰ্ম, বৰ্ণ নিৰ্বিশেষে একত্ৰিত হৈ অনুষ্ঠিত কৰা এই বসন্ত উৎসৱে দেশ-বিদেশৰ পৰ্যটককো আকৰ্ষিত কৰিবলৈ সক্ষম হৈছে৷ বিশ্ব ঐতিহ্য ক্ষেত্ৰ কাজিৰঙা ৰাষ্ট্ৰীয় উদ্যানৰ লগতে অসমৰ বিভিন্ন জাতি-জনজাতিৰ বাৰে-ৰহনীয়া কলা-সংস্কৃতি এই পৰ্যটকসকলৰ সন্মুখত প্ৰদৰ্শন কৰি বিশ্ব দৰবাৰত প্ৰচাৰ কৰাৰ উদ্দেশ্যে আজিৰেপৰা কহঁৰা ৰুপজ্যোতি সংঘৰ প্ৰেক্ষাগৃহত ২৯ সংখ্যক কহঁৰা বসন্ত উৎসৱ আৰম্ভ কৰা হয়।

উৎসৱ উদযাপন সমিতিৰ সভাপতি ফটিক বৰাই জানিবলৈ দিয়া মতে, আজি পুৱা কহঁৰা চাৰিআলিৰপৰা দিৰিঙলৈকে মাৰাথান প্ৰতিযোগিতা অনুষ্ঠিত হয়। কাজিৰঙা আঞ্চলিক সাংবাদিক সন্থাৰ সভাপতি স্বপন নাথ, সমাজকৰ্মী পৰাণ চন্দ্ৰ ঘোষ আৰু ডায়েৰী প্ৰসাদ উপাধ্যায়ে পতাকা জোকাৰি এই মাৰাথান প্ৰতিযোগিতা অনুষ্ঠানিকভাৱে শুভাৰম্ভ কৰে। 

ইয়াৰ পাছত উদযাপন সমিতিৰ সভাপতি ফটিক বৰাই পতাকা উত্তোলন আৰু কাজিৰঙাৰ জ্যেষ্ঠ নাগৰিক কালিদাস উপাধ্যায়ে শ্বহীদ তৰ্পণ কৰাৰ পাছত বিভিন্ন জাতি জনগোষ্ঠীৰ কহঁৰা বসন্ত উৎসৱৰ অতি আকৰ্ষণীয় বাৰেৰহণীয়া সাংস্কৃতিক শোভাযাত্ৰা অনুষ্ঠিত হয়। 

কাজিৰঙা ৰাষ্ট্ৰীয় উদ্যানৰ কহঁৰা বনাঞ্চলৰ বন বিষয়া চেলিম আহমেদে আনুষ্ঠানিকভাৱে আৰম্ভ কৰা এই সাংস্কৃতিক শোভাযাত্ৰাত বিহু, ঝুমুৰ, বাঙালী, নেপালী, মিচিং, কাৰ্বি, কাজিৰঙা শংকৰদেৱ শিশু নিকেতন আদি কৰি বিভিন্ন জাতি-জনগোষ্ঠীৰ সাংস্কৃতিক দলৰ লগতে কাজিৰঙা ৰাষ্ট্ৰীয় উদ্যান দৰ্শন কৰিবলৈ অহা বহু কেইজন দেশ-বিদেশৰ পৰ্যটকেও অংশগ্ৰহণ কৰে।

উল্লেখ্য, আজিৰ সাংস্কৃতিক শোভাযাত্ৰাত প্ৰায় এক কিল’মিটাৰ দূৰত্বলৈকে দেশীয় পৰ্যটকৰ লগতে জৰ্ডান আৰু জিৰোচ নামৰ প্ৰাণচঞ্চলা দুগৰাকী ইউৰোপ মহাদেশৰ পৰ্যটকে বিহু আৰু ঝুমুৰৰ তালে তালে কঁকাল ভাঙি নাচি-বাগি আত্মহাৰা হৈ পৰে।

উদযাপন সমিতিৰ তৰফৰপৰা বিদেশী পৰ্যটক দুগৰাকীক অসমীয়াৰ আদৰৰ গামোচাৰে আদৰণি জনোৱা হয়। অন্যহাতে এই উৎসৱৰ লগত সংগতি ৰাখি ছাত্ৰ-ছাত্ৰীৰ মাজত চিত্ৰাংকণ, ৰচনা, কবিতা আবৃত্তি, কুইজ আদি প্ৰতিযোগিতা অনুষ্ঠিত কৰা হয়।

ইফালে, আজি সন্ধিয়া স্থানীয় শিল্পীৰদ্বাৰা গীত আৰু বিহু তথা হুঁচৰি প্ৰদৰ্শন কৰাৰো ব্যৱস্থা কৰা হৈছে বুলি সম্পাদক বিমল শৰ্মাই জানিব দিয়ে । উল্লেখ্য যে কাইলৈ "গঁড় আমাৰ জাতীয় সম্পদ’’,  "চোৰাং চিকাৰ বন্ধ হওক" শ্ল’গানেৰে ৰাজ্যখনৰ জনপ্ৰিয় শিল্পী বিপিন চাউদাঙৰ গীতৰ শৰাইৰে ৰাইজ তথা পৰ্যটকৰ মাজত সজাগতা সৃষ্টি কৰাৰ প্ৰয়াস কৰা হৈছে বুলি জানিব পৰা গৈছে।