সাম্প্ৰতিক সময়ৰ বহু গল্পকাৰৰ গল্প বহু পঢ়ুৱৈয়ে সহজে বুজি নাপায় বুলি কোৱা শুনা যায়। হয়তো নৱতম লেখন শৈলী, বিষয়বস্তু আৰু প্ৰকাশ ভঙ্গীৰ ওপৰত সম্পৰীক্ষা আদিৰ বাবে তেনে কিছু বাধা আহি পৰে। পিছে পঞ্চানন হাজৰিকাৰ গল্প পঢ়ুৱৈৰ বাবে সৃষ্ট এনে বাধাৰ উৰ্দ্ধত। আজিৰ ‘কিতাপ কথা’ত পঞ্চানন হাজৰিকাৰ গল্প সংকলন “আন্ধাৰতকৈ উদাস বতাহতকৈ স্বাধীন”। লিখিছে নিশা ভূঞাই।
♦ ক’ভিড-১৯ মহামাৰীয়ে আৱৰি ৰখা তথা লকডাউনত জীৱন আৱদ্ধ হৈ পৰা সাম্প্ৰতিক সময়ছোৱাত শেহতীয়াভাৱে গ্ৰন্থ সম্পৰ্কীয় এক সমীক্ষা চলোৱা হৈছিল। সামাজিক মাধ্যম ফেচবুকত কিতাপ বিষয়ক এটি জনপ্ৰিয় গোটে চলোৱা এই সমীক্ষাত অধিকাংশ পঢ়ুৱৈয়ে উপন্যাস পঢ়ি সবাতোকৈ অধিক ভালপোৱাৰ তথ্য প্ৰকাশ হয়। ব্যক্তিগতভাৱে আমি নিজেও সাহিত্যৰ অন্য ধৰা সমূহতকৈ উপন্যাসৰ প্ৰতি অধিক আকৰ্ষণ অনুভৱ কৰো। তথাপিও কেইগৰাকীমান বিশেষ গল্পকাৰৰ গল্পৰ সোৱাদৰ পৰা অৱশ্যেই নিজকে আঁতৰাই ৰাখিব নোৱাৰি।
