কোকৰাঝাৰঃ বিটিএডিত মটৰচাইকেল চোৰে চুৰি কাৰ্য্য অব্যাহত ৰখাৰ মাজতে আৰক্ষীয়ে মটৰচাইকেল চোৰৰ বিৰুদ্ধে অভিযান আৰম্ভ কৰিছে৷ বিটিএডিৰ চাৰিখন জিলাত বিভিন্ন সময়ত মটৰচাইকেল চুৰি হৈ অহাৰ মাজতে কোকৰাঝাৰ জিলাত মটৰচাইকেল চুৰি কৰি সন্ত্ৰাসৰ সৃষ্টি কৰা তিনিটা গভাইত চোৰক অৱশেষত আৰক্ষীয়ে গ্ৰেপ্তাৰ কৰিবলৈ সক্ষম হৈছে৷
গোপন সুত্ৰৰ পম খেদি ছালাকাটি আৰক্ষীয়ে কোকৰাঝাৰ জিলাৰ বিভিন্ন অঞ্চলত অভিযান চলাই গ্ৰেপ্তাৰ কৰা গভাইত চোৰ তিনিটা হ'’ ক্ৰমে- চৌটাকিৰ হাসমত আলি (২০), কোকিলা মাছপাৰাৰ তফিজ উদ্দিন (২২), আৰু চৌটাকিৰ সাহেব আলি (২১)৷
গভাইত চোৰ কেইটাক আটক কৰাৰ লগতে আৰক্ষীয়ে তিনিখনকৈ ছুপাৰ স্প্লেণ্ডাৰ মটৰচাইকেলো জব্দ কৰিবলৈ সক্ষম হৈছে৷ আৰক্ষীয়ে জানিবলৈ দিয়া মতে দীৰ্ঘদিন ধৰি জিলাখনত মটৰচাইকেল চুৰি কৰি সৰ্বসাধাৰন লোকৰ মাজত সন্ত্ৰাসৰ সৃষ্টি কৰি অহা চোৰৰ বৃহৎ দলটোক গ্ৰেপ্তাৰ কৰিবলৈ আৰক্ষীয়ে যৎপৰোনাস্তি চেষ্টা অব্যাহত ৰাখিছিল৷
সেইমতে আজি এক গোপন সুত্ৰৰ পমখেদি জিলাখনৰ ছালাকাটিৰ বিভিন্ন অঞ্চলত অভিযান চলাই তিনিটা গভাইত চোৰক গ্ৰেপ্তাৰ কৰিবলৈ সক্ষম হোৱা বুলি আৰক্ষীয়ে জানিবলৈ দিয়ে৷ ধৃত চোৰ তিনি গৰাকীক আৰক্ষীয়ে মাৰাথন জেৰা অব্যাহত ৰাখিছে আৰু তেওঁলোকৰ সৈতে এক চোৰৰ দল জড়িত থকা বুলিও আৰক্ষীয়ে সদৰি কৰিছে৷
উল্লেখ্য যে কোকৰাঝাৰ সদৰ থানাত ইতিমধ্যে ৰুজু হোৱা গোচৰ নং ৫১০/১৬ মৰ্মে তদন্ত মৰ্মে আৰক্ষীয়ে আজি গভাইত চোৰ তিনিটাক গ্ৰেপ্তাৰ কৰে। এই অভিযান অব্যাহত ৰাখিব বুলি আৰক্ষীয়ে জনায়৷