শ্ৰীনগৰঃ জম্মু আৰু কাশ্মীৰৰ পুলৱামাত বৃহস্পতিবাৰে হোৱা এনকাউণ্টাৰত নিৰাপত্তাৰক্ষীয়ে জইছ-ই-মহম্মদ সংগঠনৰ শীৰ্ষক সন্ত্ৰাসবাদী কমাণ্ডাৰ খালিদ ভাইৰ লগত তিনিজন সন্ত্ৰাসবাদীক গুলীয়াই হত্যা কৰে৷ পাকিস্তানৰ খালিদৰ লগতে পুলৱামাৰ নচিৰ পণ্ডিত আৰু বেটিয়াপ’ৰা শোপিয়াৰ উমৰ মীৰ এই সংঘৰ্ষত নিহত হোৱা বুলি জানিব পৰা গৈছে৷ লগতে এই সংঘৰ্ষত এজন জোৱান ছহিদ হয়৷

আজি পুৱাই পুলৱামাস্থিত দলিপ’ৰা এলেকাত নিৰাপত্তাৰক্ষী আৰু সন্ত্ৰাসবাদীৰ মাজত তুমুল সংঘৰ্ষ সংঘটিত হয়৷ য’ত স্থানীয় এজন নাগৰিকে নিজৰ প্ৰাণ হেৰুৱায়৷ সংঘৰ্ষৰ আৰম্ভণিতে নিৰাপত্তাৰক্ষীৰ তিনিজন সৈনিকৰ লগতে দুজন ককায়েক-ভায়েক মহম্মদ য়ুনিছ ডাৰ আৰু ৰইছ অহমদ ডাৰ গুৰুতৰভাৱে আঘাতপ্ৰাপ্ত হৈছিল৷ কিন্তু সৈনিকৰ জ্যেষ্ঠ বিষয়াই জনোৱা মতে ৰইছ অহমদ ছহিদ হয় আৰু বাকী আঘাতপ্ৰাপ্ত জোৱান কেইজনক সমীপৰ হাস্পতালত চিকিৎসাৰ বাবে ভৰ্তি কৰোৱা হয়৷

উল্লেখযোগ্য যে, ২০১৭ চনৰ কাশ্মীৰৰ পুলৱামাস্থিত লেথাপ’ৰা জোৱানৰ কেম্পত আক্ৰমণ কৰা সন্ত্ৰাসবাদী খালিদ ভাইক মাষ্টাৰমাইণ্ড বুলি কোৱা হয়৷ যোৱা ৮ বছৰ ধৰি জেইছ-ই-মহম্মদ সংগঠনৰ শীৰ্ষক কমাণ্ডাৰ খালিদৰ নেতৃত্বাধীন সন্ত্ৰাসে পুলৱামাৰ পৰিৱেশ ভয়ংকৰ কৰি তুলিছিল৷ খালিদক হত্যা কৰাক লৈ ভাৰতীয় জোৱানৰ বাবে ই এক সফলতা বিষয় হৈ পৰিছে৷  

সন্ত্ৰাসবাদীৰ আত্মগোপনৰ খবৰ পোৱাৰ পাছতেই উক্ত স্থানত এটা গৃহ ঘেৰাও কৰি তদন্তৰ অভিযান অব্যাহত ৰাখে৷ লগতে এই সংঘৰ্ষত সন্ত্ৰাসবাদীৰ সকলে তৈয়াৰ কৰা অস্ত্ৰ-শস্ত্ৰৰ লগতে বাৰুদ উদ্ধাৰ কৰা হয়৷ আনহাতে, দাক্ষিণাত্য জিলা সমূহত ইন্টাৰনেট সেৱাও বন্ধ কৰাৰ আদেশ দিয়ে৷