ছিউলঃ মোবাইল নিৰ্মাণৰ জগতখনৰ সৰ্ববৃহৎ কোম্পানী ছেমছাঙো সোমাই পৰিছে দুৰ্নীতিৰ মেৰপেছত৷ দক্ষিণ কোৰিয়াৰ স্মাৰ্টফোন প্ৰস্তুতকাৰী কোম্পানীটোৰ মুৰব্বী জে ৱাই লীয়ে দেশখনৰ ৰাষ্ট্ৰপতিগৰাকীক উৎকোচ দিয়াৰ অভিযোগৰ ভিত্তিত জেললৈ যাবলগা হৈছে৷
ছিউলৰ এখন জেলত কেৱল এখন মেজ আৰু এটা টিভিৰে ১০ দিন কটাব লাগিব দক্ষিণ কোৰিয়াৰ আটাইতকৈ ধনী পৰিয়ালৰ সন্তান ৪৮ বৰ্ষীয় লীয়ে৷ দুৰ্নীতিয়ে শেহতীয়াভাবে তোলপাৰ লগোৱা ৰাষ্ট্ৰ দক্ষিণ কোৰিয়াত ৰাষ্ট্ৰপতি পাৰ্ক জিন-হাইৰ দুৰ্নীতিৰ অভিযোগৰ ফলত দেশজুৰি হোৱা প্ৰতিবাদৰ পৰিপ্ৰেক্ষিতত ডিচেম্বৰ মাহত সংসদত অনাস্থা প্ৰস্তাৱযোগে কাৰ্যবাহী ক্ষমতা হেৰুৱাবলগা হৈছিল দেশখনৰ ৰাষ্ট্ৰপতিগৰাকীয়ে।
দুৰ্নীতিৰ অভিযোগ সংক্ৰান্তত ৰাষ্ট্ৰপতিক লীয়ে উৎকোচ দিয়াৰ কথা পোহৰলৈ আহিছে৷ ৰাষ্ট্ৰপতি পাৰ্কৰ এগৰাকী ঘনিষ্ঠ সহযোগীক লীয়ে দিছিল ৪০ মিলিয়ন ডলাৰ৷
এই অভিযোগমৰ্মে ভালেকেইদিন জেৰা কৰা হৈছিল কেলেংকাৰীৰ অন্যতম অভিযুক্ত লীক৷ প্ৰথম অৱস্থাত প্ৰমাণৰ অভাৱত লীক আটক কৰিব পৰা হোৱা নাছিল যদিও সম্প্ৰতি ছেমছাঙৰ মূৰব্বীগৰাকীৰ বিৰুদ্ধে আদালতত দাখিল হোৱাৰ পিছত লীক গ্ৰেপ্তাৰ কৰাৰ নিৰ্দেশ জাৰি কৰে ন্যায়ালয়ে৷