গোৰেশ্বৰঃ বাক্সা জিলাৰ গোৰেশ্বৰত আজি আন্তঃৰাষ্ট্ৰীয় যোগ দিৱস পালন কৰা হয়। বাক্সা জিলা পতঞ্জলি যোগ সমিতিৰ উদ্যোগত আৰু গোৰেশ্বৰ শাখা পতঞ্জলি যোগ সমিতিৰ লগতে গোৰেশ্বৰ আৰ্মী কেম্পৰ সহযোগত বেঙেনাহাটী সত্ৰ ৰাজহুৱা সভাগৃহত যোগ দিৱস পালন কৰা হয়।
গোৰেশ্বৰত অনুষ্ঠিত সহ-যোগ শিক্ষক প্ৰশিক্ষণ শিবিৰৰ শিক্ষক সকলে বিভিন্ন কলা কৌশল প্ৰদৰ্শন কৰে। স্থানীয় ভাৰপ্ৰাপ্ত আৰক্ষী বিষয়াৰ লগতে ইএম মহেশ্বৰ বসুমতাৰীয়ে যোগ দিৱসত অংশ গ্রহণ কৰে। আনহাতে শুৱাগপুৰতো পালন কৰা হয় ৩য় সংখ্যক আন্তঃৰাষ্ট্ৰীয় যোগ দিৱস।
বাক্সা জিলা প্ৰভাৰী গংগা আচাৰ্য্যৰ তত্বাৱধানত শুৱাগপুৰ ৰাজহুৱা প্ৰেক্ষাগৃহত পুৱা ৭ বজাৰপৰা অনুষ্ঠিত হোৱা অনুষ্ঠানত অঞ্চলটোৰ কেইবাখনো বিদ্যালয়ৰ ছাত্ৰ-ছাত্ৰী, নাগৰিকৰ লগতে বিটিচিৰ কাৰ্যবাহী বিষয়া গণেশ কছাৰী উপস্থিত থাকি যোগ প্ৰশিক্ষণ গ্ৰহন কৰে।
ইয়াৰ উপৰি ডাবখিলা প্ৰাথমিক বিদ্যালয়ত যোগ প্ৰশিক্ষক তুলসী ৰাম খৰেলে স্থানীয় ভালেমান লোকক যোগ প্ৰশিক্ষণ দিয়াৰ লগতে বৰ্ষীয়ান নাগৰিক ১০৯ বছৰ হোৱা কৃষ্ণ ডেকাৰ দ্বাৰা বৃক্ষ ৰোপন কৰোৱা হয়। ইপিনে গোৰেশ্বৰ চিআৰপিএফৰ কেম্পতো প্ৰজাপিতা ব্ৰহ্মকুমাৰী ঈশ্বৰীয় বিশ্ববিদ্যায়ৰ সহযোগত যোগ দিৱস পালন কৰা হয়।