গুৱাহাটীঃ বিশ্ব নাৰী দিৱস উপলক্ষে শুকুৰবাৰে মৰিগাঁও জিলাৰ ভৈৰাগুড়ি গাঁৱত আন্তৰ্জাতিক মানৱাধিকাৰ তথা দুৰ্নীতি নিবাৰক সংস্থাৰ উদ্যোগত আৰু মৰিগাঁও মহাবিদ্যালয় মহিলা মঞ্চৰ সহযোগত এক চকু চিকিৎসা শিবিৰৰ লগতে আলোচনা-চক্ৰ অনুষ্ঠিত হয়৷

এই উপলক্ষে গুৱাহাটীৰ প্ৰাগজ্যোতি আই কেয়াৰৰ তৰফৰপৰা এক বিনামূলীয়া চকু পৰীক্ষা শিবিৰ অনুষ্ঠিত হয়৷ এই শিবিৰত প্ৰায় ডেৰ শতাধিক ৰোগীয়ে অংশ লয়৷

প্ৰাগজ্যোতি আই কেয়াৰৰ পংকজ বুজৰবৰুৱাই তেওঁলোকৰ চিকিৎসালয়ৰ তৰফৰপৰা এক বিশেষ সুবিধা আগবঢ়োৱাৰ কথা ঘোষণা কৰে ৷ সেই অনুসৰি তেওঁলোকে আজি জটিল ৰোগ ধৰা পৰা সকলো ৰোগীকে তেওঁলোকৰ চিকিৎসালয়ত বিনামূলীয়া অস্ত্ৰোপচাৰৰ ব্যৱস্থা কৰা হ’ব বুলি ঘোষণা কৰে৷

নাৰী দিৱস উপলক্ষে আয়োজিত  আলোচনা-চক্ৰত আন্তৰ্জাতিক মানৱাধিকাৰ তথা দুৰ্নীতি নিবাৰক মানৱাধিকাৰ সংস্থাৰ হৈ মহিলাৰ অধিকাৰ সম্পৰ্কে বক্তব্য ৰাখে সংগঠনৰ মহিলা তথা শিশু কোষৰ সভাপতি মনালিছা গগৈয়ে৷

আনহাতে সংগঠনৰ ৰাজ্যিক সভাপতি শংশাক ভৰত, সাংগঠনিক সম্পাদক বেদান্ত ডেকা আৰু শংকৰ পদ্দাৰেও বক্তব্য ৰাখে৷ আনহাতে মৰিগাঁও মহাবিদ্যালয়ৰ মহিলা মঞ্চৰ তৰফৰপৰা প্ৰবক্তা হেমা শৰ্মা আৰু মাইনু গোস্বামীয়ে মহিলাৰ শিক্ষা, স্বাস্থ্য সম্পৰ্কে বক্তব্য আগবঢ়ায়৷

আলোচনা-চক্ৰত তিৱা স্বায়ত্ত্বশাসিত পৰিষদৰ স্বাস্থ্য বিভাগৰ কাৰ্যবাহী সদস্য গৰাকীয়েও অংশগ্ৰহণ কৰে৷ 

গাঁওখনক ইতিমধ্যে মৰিগাঁও মহাবিদ্যালয়ৰ তৰফৰপৰা এডপটেড ভিলেজ হিচাপে ঘোষণা কৰি বিভিন্ন ধৰণৰ সেৱা আগবঢ়াই আহিছে৷