ডিজিটেল ডেস্কঃ কংগ্ৰেছ অধ্যক্ষ ৰাহুল গন্ধীৰ টুইটাৰ একাউন্টৰ পৰা টুইট কৰা এটা ভিডিঅ’ই এতিয়া ৰাজনৈতিক মহলত চৰ্চা লাভ কৰা পৰিলক্ষিত হৈছে৷ ভিডিঅ’টোৰ যোগেৰে মোডী চৰকাৰৰ কাৰ্যকালত দেশৰ বিভিন্ন প্ৰান্তত বৃদ্ধি পোৱা দলিত সকলৰ ওপৰত হোৱা উৎপীড়নৰ উল্লেখ কৰা হৈছে৷ দেশৰ বেলেগ বেলেগ ঠাইত সংঘটিত হোৱা দলিত উৎপীড়নৰ দৃশ্যৰ ভিডিঅ’ বনাই ৰাহুল গান্ধীয়ে টুইট কৰিছে৷

কৰ্ণাটক বিধানসভা নিৰ্বাচনক লৈ বতাহ গৰম হৈ থকা সময়তে ৰাহুল গান্ধীয়ে কৰা এই টুইটে চৰ্চা লাভ কৰিছে৷ দলিতসকলৰ বিষয়ক লৈ কংগ্ৰেছে সদায় বিজেপিক আক্ৰমণ কৰি অহা পৰিলক্ষিত হয়৷ এই ভিডিঅ’টোৰ প্ৰথমতেই কৰ্ণাটকৰ মুখ্যমন্ত্ৰী পদৰ প্ৰাৰ্থী বি এছ য়েদেৰুপ্পাৰ এটি ভিডিঅ’ দেখিবলৈ পোৱা গৈছে৷ য’ত তেওঁ এটা দলিত পৰিয়ালৰ ঘৰত ভোজন কৰা দেখিবলৈ পোৱা গৈছে৷  

Central to the RSS/ BJP fascist ideology, is that Dalits & Adivasis must continue to exist at the bottom rung of society.

In this disturbing video, the dangers of this mindset and how it’s openly propagated by senior RSS/ BJP leaders is revealed. #AnswerMaadiModi pic.twitter.com/gX2NwL0q27

— Rahul Gandhi (@RahulGandhi) May 6, 2018

ভিডিঅ’টোৰ জৰিয়তে এয়া দাবী কৰা হৈছে যে য়েদেৰুপ্পাই যদিও এটা দলিত পৰিয়ালত আহাৰ খোৱা দেখিবলৈ পোৱা গৈছে, তেওঁ আচলতে বাহিৰৰ ৰেষ্টুৰেন্টৰ পৰা অনা বিলাসী আহাৰ হে গ্ৰহণ কৰিছে৷ বিজেপিৰ মুখ্যমন্ত্ৰী পদৰ প্ৰাৰ্থী য়েদেৰুপ্পাই দলিত প্ৰেম প্ৰদৰ্শন কৰি এখন মিছা নাটক ৰচনা কৰিছে বুলি ভিডিঅ’টোত দাবী কৰা হৈছে৷ 

ভিডিঅ’টোৰ দ্বিতীয়তে দেখিবলৈ পোৱা গৈছে কৰ্ণাটকৰ লোকসভা সাংসদ তথা কেন্দ্ৰীয় মন্ত্ৰী অনন্ত কুমাৰ হেগড়েক৷ হেগড়েয়ে এটা মন্তব্য কৰি আছে৷ যাৰ দ্বাৰা তেওঁ বাবা চাহেব ভীমৰাও আম্বেদকাৰে লিখি যোৱা সংবিধানখন সলনি কৰাৰ বিষয়ে মন্তব্য কৰিছে৷ কংগ্ৰেছে আম্বেদকাৰক অনাদৰ কৰাৰ গইনা লৈ বিজেপিক জবাবদিহী কৰিব বিছাৰিছে৷

ইয়াৰ উপৰিও কিছুদিন পূৰ্বে মধ্যপ্ৰদেশৰ আৰক্ষী ভৰ্তি পৰীক্ষাৰ সময়ত দলিত প্ৰাৰ্থী সকলৰ গাত এছচি লিখা ঘটনাক লৈ বিতৰ্কৰ সৃষ্টি হৈছিল৷ ভিডিঅ’টোত সেয়াও উল্লেখ কৰা হৈছে৷ 

সম্পূৰ্ণ ভিডিঅ’টোত সংঘ প্ৰধান মোহন ভাগৱত আৰু সংঘৰ নেতা মোনমোহন বৈদ্যৰ কিছু বিবৃতিৰ জৰিয়তে সমগ্ৰ সংঘ পৰিয়াল দলিত বিৰোধী বুলি প্ৰমাণ কৰিবলৈ চেষ্টা চলোৱা হৈছে৷ এই ভিডিঅ’টোৰ মাজাৰে কংগ্ৰেছে দাবী কৰিছে যে মোনমোহন বৈদ্যই দলিত আৰক্ষণ নীতি বন্ধ কৰাৰ বাবে মন্তব্য কৰিছিল৷ ইয়াৰ বিপৰীতে মোহন ভাগৱতে আৰক্ষণ পদ্ধতিক পৰ্যালোচনা কৰাৰ বিষয়ে মন্তব্য কৰিছিল৷ 

ইয়াৰ উপৰিও দেশৰ বিভিন্ন প্ৰান্তত দলিত সকলৰ বিৰুদ্ধে সংঘটিত হোৱা উৎপীড়নৰ দৃশ্য ভিডিঅ’টোত প্ৰকাশ কৰা হৈছে৷ 

কংগ্ৰেছে এই ভিডিঅ’ প্ৰচাৰেৰে কৰ্ণাটকৰ নিৰ্বাচনত বিজেপিক দলিত বিৰোধী বুলি প্ৰতিপন্ন কৰিব বিচাৰি নিৰ্বাচনী ৰণ কৌশল সৃষ্টি কৰিছে৷ এছচি-এছটি ধাৰাক লৈ উচ্চতম ন্যায়ালয়ে জাৰি কৰা সিদ্ধান্তৰ পিছতো ৰাহুল গান্ধীয়ে বিজেপিক দলিত বিৰোধী সজাবলৈ এৰা নাই৷ ৰাহুল গান্ধীয়ে অভিযোগ কৰিছে যে মোডী চৰকাৰে যি ধৰণে দলিত সকলৰ বিষয়ে চিন্তা কৰা উচিত আছিল, তেনে ধৰণে কৰা নাই৷ ভিডিঅ’টোত এই বিষয়েও উল্লেখ কৰিছে ৰাহুলে৷ 

ৰাহুল গান্ধীয়ে বিজেপিক দলিত বিৰোধী আখ্যা দি নিজৰ লাভ বিচাৰিছে৷ ভাৰতৰ বিভিন্ন প্ৰান্তত যথেষ্ট সংখ্যক দলিত সম্প্ৰদায়ৰ লোক থকাৰ বাবে ৰাহুল গান্ধীয়ে নতুন ৰণনীতি অনলম্বন কৰিছে৷ যদি দেশৰ দলিত আৰু মুছলমান সম্প্ৰদায়ৰ লোক সকল বিজেপি বিৰোধী হৈ পৰে, তেন্তে বিজেপিৰ জয়যাত্ৰা স্থগিত হৈ পৰাৰ সম্ভাৱনা নুই কৰিব নোৱাৰি৷ 

ৰাহুল গান্ধীয়ে টুইট যোগে কয় যে কৰ্ণাটকৰ এছচি-এছটি সম্প্ৰদায়ৰ লোকৰ ভিত্তিত তেওঁলোকৰ বিকাশৰ বাবে ৰাজ্য চৰকাৰে ধন ব্যয় কৰিছিল৷ ৰাহুলে এয়া বিপ্লবী পৰিকল্পনা বুলি আখ্যা দি সিদ্ধাৰামাইয়া চৰকাৰৰ প্ৰশংসা কৰে৷ য়েদেৰুপ্পাক দলিত প্ৰেমৰ ভুৱা প্ৰদৰ্শনকাৰী বুলি আখ্যা দিয়াৰ লগতে কংগ্ৰেছৰ সিদ্ধাৰামাইয়াক বিপ্লৱী মুখ্যমন্ত্ৰী বুলি অভিহিত কৰি ৰাহুল গান্ধীয়ে দলিত ভোটাৰসকলৰ কংগ্ৰেছপক্ষী কৰি তুলিবলৈ চেষ্টা চলোৱা পৰিলক্ষিত হৈছে৷