কামপুৰঃ সুন্দৰী যুৱতী-মহিলাই মিঠা মাতেৰে অপোনাক লগ পাব বিচাৰিলে সাৱধান৷ কিয়নো মৌ-বৰষা সেই মাত আপোনাৰ প্ৰতি থকা আগ্ৰহ আৰু আকৰ্ষণৰ বাবে নহয়। মৌ-বৰষা তেনে মাতৰ আঁৰত নিহিত হৈ আছে আপোনাৰ দামী গাড়ীখন চুৰি কৰাৰ স্বাৰ্থ।
মিঠা মাতেৰে মোহিত কৰি মাতি নি তেনে যুৱতী-মহিলাই আপোনাক গতাই দিব গাড়ী চুৰৰ চক্ৰৰ হাতত। গাড়ী চুৰিৰ সৈতে জড়িত এগৰাকী মহিলাক আটক কৰাৰ পিছতে পোহৰলৈ আহিছে হিন্দী কথাছবিৰ দৰে এক কাহিনী।
গাড়ী চুৰিৰ সৈতে সততে পুৰুষৰ নাম সাঙোৰ খাই যদিও এইবাৰ আৰক্ষীৰ জালত পৰিছে মহিলা গাড়ী চোৰ৷ ৰাজ্যত গাড়ী চালকক হত্যা কৰি গাড়ী লৈ উধাও হোৱাৰ খবৰ প্ৰচাৰ হৈ থকাৰ মাজতে নগাঁও জিলাৰ কচুৱা আৰক্ষীয়ে গাড়ী চুৰি চক্ৰৰ লগত জড়িত এগৰাকী মহিলাক আটক কৰাৰ ঘটনাই সৃষ্টি কৰিছে চাঞ্চল্যৰ।
ধৃত মহিলাগৰাকী নাম জনৈক খাতুন বুলি জানিব পৰা গৈছে। কচুৱাৰ এগৰাকী গাড়ী চালকক হত্যা কৰি গাড়ী চুৰি কৰাৰ ঘটনাত জড়িত থকাৰ সন্দেহত আৰক্ষীয়ে মহিলাগৰাকীক আটক কৰে।
জানিব পৰা মতে, যোৱা ২৯ মে’ত কচুৱাৰ আলী হুছেইন নামৰ এজন চালকক মহিলাগৰাকীয়ে মৌ-বৰষা মাতেৰে মাতি নি গাড়ী চুৰি চক্ৰৰ হাতত গতাই দিছিল। গাড়ী চুৰি চক্ৰই অতি নৃশংসভাৱে চালকজনক হত্যা কৰি গাড়ী লৈ উধাও হৈছিল৷ পিছত পাঁচ দিনৰ অন্তত আলী হুছেইনৰ মৃতদেহ জুৰিয়াৰ বিল এখনত উদ্ধাৰ হয়।
নিশা কচুৱা আৰক্ষীয়ে অভিযান চলাই নগাঁও হেৰাপত্তিৰ পৰা মহিলাগৰাকীক আটক কৰে। ইতিমধ্যে মহিলাগৰাকীয়ে সমগ্ৰ ঘটনাৰ কথা স্বীকাৰ কৰা বুলি জানিব পৰা গৈছে৷ ইফালে ঘটনাৰ লগত জড়িত আন লোকসকলৰ নাম মহিলাগৰাকীক জেৰা কৰাৰ অন্তত ওলাই পৰিব বুলি আৰক্ষীয়ে জানিবলৈ দিছে।