ডিজিটেল ডেস্কঃ চাৰি হাজাৰ টকাৰ বাবে সন্তানৰ চিকিৎসা কৰিব নোৱাৰি সন্তানক নিজ হাতেৰে হত্যা কৰি এগৰাকী মহিলাই আত্মহত্যা কৰাৰ ঘটনাই চাঞ্চল্যৰ সৃষ্টি কৰিছে তামিলনাডুত৷

তামিলনাডুৰ নামাক্কাল জিলাৰ বেলুকুৰুচি চহৰত মঙলবাৰে পুৱা চাঞ্চল্যকৰ এই ঘটনা সংঘটিত হয়৷ মাতৃয়ে নিজ হাতে ৬ মহীয়া পুত্ৰ সন্তানক হত্যা কৰি নিজেও অাত্মহত্যা কৰাৰ ঘটনাই তামিলনাডুৰ ৰাজনৈতিক মহলত হৈ-চৈৰ সৃষ্টি কৰিছে৷

জানিব পৰা মতে, ডেংগুত আক্ৰান্ত ৬ মহীয়া পুত্ৰৰ চিকিৎসাৰ খৰচ বহন কৰিব নোৱাৰাত এনেধৰণৰ পদক্ষেপ হাতত তুলি ল’লে ৩২ বছৰীয়া মহিলাগৰাকীয়ে৷ দেওবাৰে সন্ধিয়া বেলুকুৰুচিৰ পি আনবুকদি নামৰ মহিলাগাৰকীৰ ৬ মহীয়া সন্তান চাৰভিন হঠাৎ অসুস্থ হৈ পৰে৷ সোমবাৰে কেচুৱাটোক আনবুকদি আৰু পিতৃ পেৰিয়াস্বামীয়ে শালম চহৰৰ এখন বেচৰকাৰী হস্পিতাললৈ লৈ যায়৷ চিকিৎসকে চাৰভিনৰ তেজ পৰীক্ষা কৰাত কেচুৱাটোৰ দেহত ডেংগুৰ বিজাণু ধৰা পৰে৷

হস্পিতাল কৰ্তৃপক্ষই কেচুৱাটোৰ চিকিৎসাৰ খৰছ ৪০০০ টকা ভৰিব লাগিব বুলি কয়৷ চিকিৎসালয়ৰ খৰছ বহন কৰিব নোৱাৰাত বিনা চিকিৎসাই সোমবাৰে নিশা ১১ বজাত কেচুৱাটোক পিতৃ-মাতৃয়ে নিজ গৃহলৈ উভতাই আনে৷ দৰিদ্ৰ পৰিয়ালটোৱে কেচুৱাটোক ঘৰলৈ উভতাই আনি দুখত ভাঙি পৰে৷

আনবুকদি উপায়বিহীন হৈ নিশা ৩ বজাত স্বামী টোপনিত লালকাল হৈ থকা অৱস্থাত ঘৰৰ ওচৰৰ এটি কুঁৱাত জাপ দি আত্মহত্যা কৰে৷ পুৱতি নিশা প্ৰায় ৩-৪৫ বজাত স্বামী পেৰিয়াস্বামীয়ে সাৰ পাই পত্নী আৰু পুত্ৰক বিচনাত নেদেখি ওচৰ চুবুৰীয়াক খবৰ দিয়ে৷ ওচৰ চুবুৰীয়াৰ সহায়ত বিচাৰ-খোচাৰ কৰাত ঘৰৰ ওচৰৰ এটি কুঁৱাত কেচুৱাটো সহ পত্নীৰ মৃতদেহ উদ্ধাৰ হয়৷