জয়ন্ত মুদৈ, নগাঁওঃ বিশিষ্ট শিক্ষাবিদ-গল্পকাৰ-কবি-নাট্যকাৰ-অভিনেতা-হাস্যব্যংগ লেখক-সমালোচক তথা ৰহদৈ কবি মঞ্চৰ সভাপতি কৃষ্ণ মোহন শৰ্মাই জীৱনৰ ছয়াশীটা সফল বৰ্ষ উকলি কাইলৈ ৫ মাৰ্চত স্বাগতম জনাব অন্য এটি বৰ্ণাঢ্য বৰ্ষক।
এই উপলক্ষে ৰহদৈ কবি মঞ্চই সেইদিনা তেওঁৰ নগাঁও জিলাৰ বেবেজীয়াৰ সমীপৰ ফুলগুৰিৰ পূব শালমৰাস্থিত বাসভৱন 'প্ৰৱৰালয়'ৰ প্ৰাংগণত ওপজা দিনৰ ওলগ জনোৱাৰ লগতে কাব্যধ্বনি আৰু অন্তৰংগ আলাপ অনুষ্ঠানৰ দিহা কৰিছে।
অনিৰ্বায কাৰণবশতঃ এইবেলি হ’বলগা চতুৰ্থবাৰ্ষিক বিশেষ বক্তৃতানুষ্ঠানটো স্থগিত ৰখা হৈছে যদিও ওপজা দিনতে পূৰ্বৰেপৰা দি অহা প্ৰেৰণা-বঁটা এইবাৰ উদীয়মান কবি গছপৰাৰ লতামণি শৰ্মা আৰু বঢ়মপুৰ গোমোঠাগাঁৱৰ মীনাক্ষি বৰদলৈলৈ আগবঢ়োৱা হ’ব বুলি পৰিয়ালৰ তৰফৰ পৰা অচ্যুত প্ৰৱৰ শৰ্মাই জনাইছে।
অসমৰ ভালেকেইজন বিশিষ্ট লেখক-সাহিত্যিক উপস্থিত থাকিব লগা উক্ত অনুষ্ঠানত সাহিত্যানুৰাগীৰ উপস্থিতি উদ্যোক্তাসকলৰ হৈ সম্পাদক তপন কুমাৰ হাজৰিকাই কামনা কৰিছে।