ডিজিটেল ডেক্সঃ শুকুৰবাৰে অনুষ্ঠিত হোৱা ৰাজ্যসভা নিৰ্বাচনত বহুজন সমাজ পাৰ্টি (বি এছ পি)ৰ প্ৰাৰ্থীজনক ক্ৰছ ভোটিঙৰ জড়িয়তে বিজেপিয়ে পৰাজিত কৰাৰ পাছত প্ৰতিক্ৰিয়া প্ৰকাশ কৰিছে মায়াৱতীয়ে৷

নিৰ্বাচনটোত বিজেপিয়ে প্ৰশাসন যন্ত্ৰৰ অপব্যৱহাৰ আৰু চৰকাৰী সন্ত্ৰাস সৃষ্টি কৰাৰ অভিযোগ নেত্ৰীগৰাকীৰ৷ দলৰ এই পৰাজয়ে বি এছ পি আৰু সমাজবাদী পাৰ্টিৰ মিত্ৰতাত কোনো প্ৰভাৱ নেপেলায় বুলিও তেওঁ স্পষ্ট কৰি দিয়ে৷

♦ বিজেপিয়ে মোৰ মেজাজ গৰম বুলি ভাবিছে আৰু এই পৰাজয়ে বি এছ পি-সমাজবাদী পাৰ্টিৰ মিত্ৰতাত আউল লগাব বুলি ভাবিছে৷ কিন্তু বিজেপিৰ এই কৌশল ফলৱৰ্তী নহ’ব৷ 

♦ ৰাজ্যসভাৰ আসনত জয়ী হৈ বিজেপিয়ে লাড্ডু খাইছে৷ কিন্তু যিমানেই সুস্বাদু মিঠাই নাখাওক, দলটোৱে গোৰখপুৰ আৰু ফুলপুৰ উপনিৰ্বাচনৰ লজ্জাজনক পৰাজয়ৰ তিক্ততা আঁতৰাব নোৱাৰে৷

♦ গোৰখপুৰ আৰু ফুলপুৰৰ ফলাফল বিজেপিৰ বাবে ইমানেই বিস্ফোৰক আছিল যে দলটোৱে চকুৰে সৰিয়হ ফুল দেখি গৈছে, দিনতে আকাশত তৰা দেখিছে৷

♦ কিছুসংখ্যক বিধায়কক গোচৰ আৰু তদন্তৰ ভয় দেখুৱাই ক্ৰছ ভোটিং কৰোৱা হ’ল৷ কিন্তু যি সকলক এনে ভাবুকিয়ে তলাব নোৱাৰিলে, তেওঁলোকক শুভেচ্ছা জনাইছো৷

♦ গোৰখপুৰ আৰু ফুলপুৰৰ ফলাফলক সমগ্ৰ দেশে আদৰণি জনোৱাৰ পাছতো বিজেপিয়ে বেয়া অভ্যাস এৰিব পৰা নাই৷