27 Mar

কেন্দ্ৰত বিজেপি চৰকাৰ, ৰাজ্যও যদি বিজেপিৰ শাসনলৈ আহে, তেন্তে ৰাইজৰ লাভঃ শ্বাহ

By NNO WEB BUREAU 0 Comments

ডিজিটেল ডেস্কঃ কৰ্ণাটকত সমাগত বিধানসভাৰ নিৰ্বাচন৷ নিৰ্বাচনৰ দিন যিমানেই চমু চাপিছে সিমানেই আকৰ্ষণীয় হৈ পৰিছে নেতা-পালিনেতাৰ বাক-বিতণ্ডাৰ যুঁজ৷ ভোটাৰক আকৃষ্ট কৰিব পৰাকৈ ৰাজনৈতিক দলসমূহে চলাইছে ন ন কুচ-কাৱাজ৷ সাধাৰণ ৰাইজক মোহিত কৰিবলৈ নেতাসকলে দিছে সমস্যা পূৰণৰ ন ন আশ্বাস৷ 

বিজেপিৰ অধ্যক্ষ অমিত শ্বাহে কৰ্ণাটকত নিৰ্বাচনী প্ৰচাৰ চলায়৷ প্ৰচাৰৰ সময়ত শ্বাহে কটাক্ষ কৰিবলৈ নেৰিলে বিৰোধী ৰাজনৈতিক দলসমূহক৷সোমবাৰে অধ্যক্ষ শ্বাহে বিএছ য়েডিয়ুৰাপ্পাৰ জিলাৰ এক ৰেলীত  অংশ লৈ আক্ৰমণৰ লক্ষ্য কৰি লয় সিদ্ধাৰামাইয়া নেতৃত্বাধীন চৰকাৰক৷ সিদ্ধাৰামাইয়া চৰকাৰে ৰাজ্যখনৰ সাধাৰণ জনতাৰ পক্ষে কোনো ফলপ্ৰসূ কাম কৰা নাই৷ 

বৰ্তমান কৰ্ণাটকত মোডী ধুমুহা বলিবলৈ আৰম্ভ কৰিছে৷ আগন্তুক নিৰ্বাচনত কোনোৱে বিজপিক প্ৰতিহত কৰিব নোৱাৰে বুলি মতপোষণ কৰে অমিত শ্বাহে৷ কৰ্ণাটকৰ নিৰ্বাচনী প্ৰচাৰত বিজেপিৰ  প্ৰতি ৰাইজৰ উৎসাহ দেখি সুখী হয় শ্বাহ৷ ৰাজ্যখনত বিজেপিৰ উৎসাহজনক স্থিতি প্ৰত্যক্ষ কৰি শ্বাহে পূৰ্বতে ব্যক্ত কৰা ‘মোডী ধুমুহা’ক ‘চুনামী’ আখ্যা দিয়ে৷ 

উল্লেখ্য যে, কৰ্ণাটকৰ বিধানসভা নিৰ্বাচনত আগন্তুক মুখ্যমন্ত্ৰী পদৰ প্ৰাৰ্থী হিচাপে বিএছ য়েডিয়ুৰাপ্পাৰ নাম উল্লেখ কৰে বিজেপিৰ অধ্যক্ষগৰাকীয়ে৷ নেতৃত্বাধীন চৰকাৰক কটাক্ষ কৰি কয়, ৰাজ্যখনৰ বিকাশৰ দিশটো যোৱা পাঁচ বছৰত সিদ্ধাৰামাইয়া চৰকাৰৰ বাবেই স্থবিৰ হৈ পৰিল৷ আনহাতে কংগ্ৰেছৰ অধ্যক্ষ ৰাহুল গান্ধীকো আক্ৰমণ কৰিবলৈ নেৰিলে অমিত শ্বাহে৷ 

ৰাহুল গান্ধীয়ে কৰ্ণাটকত নিৰ্বাচনী প্ৰচাৰ চলাই ৰাজ্যখনত কংগ্ৰেছে শাসনলৈ আহিব বুলি মন্তব্য কৰে৷ কিন্তু শ্বাহে ৰেলীত অংশ লৈ বিজেপিৰ প্ৰতি ৰাইজৰ আস্থা দেখি ৰাহুলৰ ব্যক্তব্যক মিছা প্ৰমাণিত কৰে৷ ২০১৪চনৰ নিৰ্বাচনৰ ফলাফললৈ লক্ষ্য কৰিবলৈ কৈ শ্বাহে কয়, বিজেপিয়ে কেন্দ্ৰক শাসন কৰি থকাৰ পাছত যদি ৰাজ্যতো বিজেপিৰে চৰকাৰ গঠিত হয় তেন্তে ৰাজ্যৰ সাধাৰণ জনতা উপকৃত হ’ব৷