ৰঙিয়াঃ সুদীৰ্ঘ ১৩ বছৰৰ অন্তত ৰঙিয়া বিধান সভা সমষ্টিৰ বিধায়কে মন্ত্ৰিত্ব লাভ কৰিলে৷ প্ৰাক্তন মুখ্যমন্ত্ৰী প্ৰফুল্ল কুমাৰ মহন্তৰ চৰকাৰৰ দুয়োটা কাৰ্যকালত ৰঙিয়া বিধানসভা সমষ্টিৰ পৰা বিধায়ক ৰূপে নিৰ্বাচিত হোৱা থানেশ্বৰ বড়োৱে শিক্ষা, ৰাজহ আদি মন্ত্ৰিত্ব লাভ কৰিছিল৷ তাৰ পাছতে তৰুণ গগৈ চৰকাৰৰ কাৰ্যকালত ভুৱনেশ্বৰ কলিতাই দুটা বছৰৰ বাবে উদ্যোগ মন্ত্ৰী হিচাপে কাৰ্যনিৰ্বাহ কৰিছিল৷ সুদীৰ্ঘ ১৩ বছৰ কাল মন্ত্ৰিত্ব লাভ নকৰাৰ সমষ্টিৰ ৰাইজৰ বাবে যোৱা বুধবাৰৰ দিনটোত ভাল খবৰটো আহে৷ বুধবাৰে্ মুখ্যমন্ত্ৰী সৰ্বানন্দ সোণোৱালে ঘোষণা কৰা ৭ জনীয়া মন্ত্ৰিত্বৰ তালিকাত ৰঙিয়াৰ বিধায়ক ভৱেশ কলিতাৰ নাম অন্তৰ্ভুক্ত কৰা হয়৷
তাৰ এদিন পিছতে বৰ্তমানৰ ৰঙিয়াৰ বিধায়ক ভৱেশ কলিতাই বৃহস্পতিবাৰে ৰাজ্যিক স্বতন্ত্ৰ মন্ত্ৰী হিচাপে শপত লয়৷ ভৱেশ কলিতাই জলসিঞ্চন বিভাগৰ মন্ত্ৰিত্ব লাভ কৰাৰ খবৰে ৰঙিয়াত ৰাইজ তথা বিজেপিৰ নেতা-কৰ্মী উৎফুল্লিত হৈ পৰে৷ মন্ত্ৰিত্বৰ শপত লোৱাৰ পিছতে ৰাজ ভৱনৰ পৰা ভোটাৰ তথা জনগণৰ ওচৰলৈ দৌৰ দিয়ে৷ ভৱেশ কলিতাই বৃহস্পতিবাৰে দিনৰ তিনি বজাত ৰঙিয়া সমষ্টিৰ ৰঙিয়া চহৰত প্ৰৱেশ কৰাৰ লগে লগে বিজেপি দলৰ লগতে ৰঙিয়া সমষ্টিৰ লোকে ৰঙিয়া চহৰৰ প্ৰৱেশ দ্বাৰৰ পৰা নতুন মন্ত্ৰী গৰাকীক আঁদৰি আনে।
ফটকা-ফুটাই, ফাকু খেলি দলীয় কৰ্মকৰ্তাসকলে মন্ত্ৰীগৰাকীক আঁদৰি আনে৷ ৰঙিয়া বিজেপিৰ মুখ্য কাৰ্যালয়ৰ পৰা ৰঙিয়াৰ ঐতিহাসিক হৰদত্ত বিৰদত্ত ভৱনত উপস্থিত হয় কলিতাই। কেইবাশতাধিক লোকৰ উপস্থিতিত নতুন মন্ত্ৰীগৰাকীক ৰাইজে সম্বৰ্ধনা যাচে৷ বিজেপিৰ ৰঙিয়া নগৰ সমিতিৰ সভাপতি দীপেন চক্ৰৱৰ্তীৰ পৰিচালনাত অনুষ্ঠিত সভাত মন্ত্ৰীগৰাকীক বিজেপিৰ উত্তৰ কামৰূপ জিলা সমিতি, ৰঙিয়া নগৰ মণ্ডল সমিতি, ৰঙিয়া ব্লক মণ্ডল সমিতি, ৰঙিয়া মহিলা মৰ্চা, যুৱ মৰ্চা, ৰঙিয়া এছ টি মৰ্চা, বজৰংগ দল, ৰঙিয়া পৌৰ সভাৰ লগতে ৰঙিয়া সমষ্টিৰ দলটোৰ কেইবাটাও সমিতিয়ে মন্ত্ৰীগৰাকীক ফুলাম গামোচা, শৰাই, আৰনাই আদিৰে সম্বৰ্ধনা যাচে।
সভাত মন্ত্ৰীগৰাকীয়ে তেওঁক প্ৰদান কৰা বিভাগটো ভালদৰে চলাই নিয়াৰ পোষকতা কৰি ৰঙিয়াৰ ৰাইজে তেওঁক দিয়া মৰমৰ বাবে শলাগ লয়। ৰঙিয়াৰ ৰাইজে এনেদৰে সহায়ৰ হাত আগবঢ়াব বুলি আশা প্ৰকাশ কৰে। বিধায়ক হৈ থকা কালত ৰঙিয়াৰ ৰাস্তা-ঘাটকে ধৰি আন আন উন্নয়নৰ কামসমূহ যিধৰণে কৰি গৈছে তাতোকৈ অধিক সক্ৰিয় হৈ ৰাজ্যৰ লগতে ৰঙিয়াৰ উন্নয়ন কৰি যাহ বুলি মন্ত্ৰী কলিতাই উল্লেখ কৰে। ৰঙিয়াৰ বিধায়ক তথা মন্ত্ৰী গৰাকীয়ে দলিয় কৰ্মকৰ্তাসকলৰ সৈতে ৰঙিয়া চহৰৰ মাজেৰে সমদল কৰি ৰঙিয়া ৰাইজৰ সম্বৰ্ধনা গ্ৰহণ কৰে।