খেৰণিঃ খেৰণি থানাৰ অন্তৰ্গত খেৰণিৰ চাৰিআলিত আজি এক ভয়াৱহ পথ দুৰ্ঘটনা সংঘটিত হয়৷ জানিব পোৱা মতে এএছ-০১-ডিচি-১৭৪৯ নম্বৰৰ মালবাহী ট্ৰাক এখন খেৰণি চাৰিআলিত নিয়ন্ত্ৰণ হেৰুৱাই খাৱৈত বাগৰি পৰে৷

খাৱৈত বাগৰি পৰা ট্ৰাক খন উমৰাংছ’ৰ পৰা চিমেন্ট ফেক্টৰীৰ সামগ্ৰী কঢ়িয়াই আনি থকা অৱস্থাত সংঘটিত হয় এই ঘটনা৷ খাৱৈত বাগৰি পৰা ট্ৰাকখনৰ তলৰ পৰা ৰাইজ তথা আৰক্ষীয়ে এজন লোকক সংকটজনক অৱস্থাত উদ্ধাৰ কৰে৷

ট্ৰাকখনৰ চালক দুৰ্ঘটনাৰ পাছতেই পলায়ন কৰাৰ বিপৰীতে চিকিৎসালয়লৈ প্ৰেৰণ কৰা লোকজন হেণ্ডিমেন বুলি সন্দেহ কৰিছে ঘটনাস্থলিত থকা ৰাইজৰ লগতে আৰক্ষীয়ে৷ ট্ৰাকখন দুৰ্ঘটনা পতত হোৱাৰ লগে লগে এটি উৰা বাতৰিয়ে হুৱা-দুৱা লগায়৷

আজি শিক্ষামন্ত্ৰী ড০ হিমন্ত বিশ্ব শৰ্মাই নিৰ্বাচনী প্ৰচাৰৰ বাবে খেৰণিলৈ আহিছিল৷ শৰ্মাৰ নিৰ্বাচনী প্ৰচাৰৰ সভা সমাপ্ত হোৱাৰ পাছতে খেৰণি চাৰিআলিত নিয়ন্ত্ৰণ হেৰুৱাই খাৱৈত বাগৰি পৰা ট্ৰাকখন কোনো লোকে নিৰ্বাচনী সভালৈ অহা গাড়ী দুৰ্ঘটনাত পতিত হোৱা বুলি প্ৰচাৰ কৰাত হুৱা-দুৱা লাগে যদিও কিছু সময় পাছতে ওৰহিৰ ওৰ ওলাই৷