অভিজিৎ তালুকদাৰ, তামুলপুৰঃ তামুলপুৰ আৰক্ষীৰ বৃহৎ সফলতা৷ দেওবাৰে নিশা তামুলপুৰ আৰক্ষী থানাৰ এটা দলে ৰঙিয়া-ভূটান ৰাষ্ট্ৰীয় ঘাইপথৰ দ্বাৰকুছিত নিয়মীয়া তালাচী চলাই থাকোতে এখন এএছ২৫চিচি৯২০৫ নম্বৰৰ মেজিক ভেনত অহা ছয়জন লোকক সন্দেহ বশতঃ গাড়ীখনৰপৰা নমাই তালাচী চলায়৷
এই লোক কেইজন ক্ৰমে অম্বৰ আলী (পিতা, চান্দ মহম্মদ), উষ্মাদ আলী (পিতা, লালচান্দ আলী), নাওচাৰ আলী (পিতা, নুৰমহম্মদ আলী), ৰাহুল আলী (পিতা, বিল্লাল আলী), খুৰছেদ আলী (পিতা, নুৰমহম্মদ আলী) আৰু ফুলচান্দো আলী (পিতা, চাকাদ আলী)৷
এই ছয়জন লোক নলবাৰী জিলাৰ মুকালমুৱাৰ বুলি আৰক্ষীক অৱগত কৰে৷ লোককেইজনক আৰক্ষীয়ে তালাচী চলোৱাৰ লগতে মেজিকখনত চুৰিকাৰ্যত ব্যৱহৃত সা-সামগ্ৰী উদ্ধাৰ হোৱাত আৰক্ষীৰ সন্দেহ ঘনীভূত হয়৷
তেতিয়া তামুলপুৰ থানালৈ লোককেইজনক মেজিক গাড়ীখনেৰে লৈ আহে আৰু তামুলপুৰৰ আৰক্ষী বিষয়া অসীম বৰা, গান্ধীবাৰী আৰক্ষী চকীৰ ভাৰপ্ৰাপ্ত বিষয়া ৰাজেন বড়োৰ নেতৃত্বত তদন্ত আৰম্ভ কৰে৷ তদন্তৰ সময়ত ধৃত লোককেইজনৰ স্বীকাৰোক্তিৰ ভিত্তিত নিশাই গুৱাহাটীলৈ ৰাওনা হয় তামুলপুৰ আৰক্ষীৰ থানাৰ দল এটা৷
পুৱতি নিশা লোককেইজনৰ স্বীকাৰোক্তিৰ ভিত্তিত গড়চূক আৰক্ষী থানাৰ সমীপতে থকা এখন ভঙাছিগা লোৰ সামগ্ৰীৰ গুডাম ঘৰত তালাচী চলাই ২৪ টাকৈ চুৰি ম’বাইল টাৱাৰৰ বেটাৰী, এখন হিৰোহোন্দা গ্লেমাৰ বাইক (এএছ০১এভি৩৭৪২), মোবাইল ছয়টাৰ লগতে চুৰি কাৰ্যত ব্যৱহৃত এখন মাৰুতি পিক আপ ভেন (এছ০১জেচি৭৬৭৪) এখন জব্দ কৰিবলৈ সক্ষম হয়৷
তালাচি চলাই জব্দকৃত সামগ্ৰীখিনি আজি পুৱা তামুলপুৰ থানাৰ ভাৰপ্ৰাপ্ত আৰক্ষী বিষয়া অসীম বৰাৰ নেতৃত্বত যোৱা আৰক্ষীৰ দলটোৱে তামুলপুৰ থানলৈ লৈ আহে। উল্লেখযোগ্য যে এই লোকেইজনে মুকালমুৱাৰপৰা গাড়ীৰে তামুলপুৰৰ দ্বাৰকুছি অঞ্চললৈ আহি নিশা ম’বাইল টাৱাৰৰপৰা বেটাৰী চুৰি কৰি গুৱাহাটিৰ গড়চুক আৰক্ষী থানৰৰ সমীপত থকা নাজি খান আৰু হুছেইন আলীৰ গুডামত কিচুদিন ধৰি চুৰি বেটাৰী বিক্ৰি কৰি আহিছিল৷
আজি তামুলপুৰ আৰক্ষীৰ অভিযানত বেটাৰী চুৰিৰ নাটকখন ধৰা পৰে।