06 Apr

বিশেষ ৰাজ্যৰ দাবী, লোকসভাৰ অধ্যক্ষৰ কোঠাত ‘ধৰ্ণা’ টিডিপি সাংসদৰ, বিশ্ব মিত্ৰ হৈ আহিল শিৱসেনাই

By NNO WEB BUREAU 0 Comments

ডিজিটেল ডেস্কঃ অন্ধ্ৰপ্ৰদেশৰ আঞ্চলিক দল তথা ৰাজ্যখনৰ শাসকীয় দল টিডিপিৰ সাংসদে বিশেষ ৰাজ্য প্ৰদানৰ দাবীত সংসদৰ ভিতৰে-বাহিৰে প্ৰতিবাদ অব্যাহত ৰাখিছে৷

বৃহস্পতিবাৰে সাংসদৰ তীব্ৰ হৈ-হাল্লা, প্ৰতিবাদৰ বাবে লোকসভাৰ অধ্যক্ষ সুমিত্ৰা মহাজনে দিনটোৰ বাবে সদন স্থগিত ৰাখে৷ 

কিন্তু দেশৰ আন আন প্ৰান্তৰ বিভিন্ন দলৰ সাংসদসকল সদনৰ পৰা ওলাই আহে যদিও টিডিপিৰ সাংসদসকলে লোকসভাৰ ভিতৰতে অনশনত বহে৷ নিশালৈকে প্ৰতিবাদ সাব্যস্ত কৰাত চিকিৎসা কৰিব লগা হয় সাংসদসকলৰ৷ 

লোকসভাৰ মাৰ্চেলে প্ৰথমে সাংসদসকলক বুজনি দি সদনৰ পৰা উলিয়াই নিয়াৰ চেষ্টা কৰে যদিও সাংসদসকলে কোনো কাৰণত ওলাই যাবলৈ ৰাজি নহয়৷ তাৰ পাছত মাৰ্চেলে দাং কোলাকৈ উলিয়াই আনিবলৈ বাধ্য হয় সাংসদসকলক৷

মাৰ্চেলে দাঙি উলিয়াই অনাৰ পিছতে এয়া অন্ধ্ৰপ্ৰদেশৰ লোকক কৰা অপমান বুলি কৈ প্ৰতিশ্ৰুতি পূৰণ কৰিবলৈ দাবী জনাই চৰকাৰক৷ বৃহস্পতিবাৰে পুৱাৰে পৰা লোকসভাৰ চেন্ট্ৰেল হ’ল অনশনত বহিছিল টিডিপিৰ সাংসদে৷ নিশা দুই টিডিপিৰ সাংসদ আনা কাপেল্লে আৰু এম শ্ৰীনিৱাস ৰাওক চিকিৎসালয়ত ভৰ্তি কৰিব লগা হয়৷

আনহাতে শুকুৰবাৰে পুৱাৰে পৰা পুনৰ সদনলৈ আহি প্ৰতিবাদত নামে টিডপিৰ সাংসদসকলে৷ লোকসভাৰ অধ্যক্ষ সুমিত্ৰা মহাজনৰ চেম্বাৰত কলা বেজ পৰিধান কৰি অনশন কৰে সাংসদসকলে৷ পুৱা টিডপিৰ সাংসদসকলে চেম্বাৰত প্ৰৱেশ কৰি মজিয়াত বহি-শুই অনশন কৰে৷ সেই সময়ত অধ্যক্ষ কোঠাত নাছিল৷

শুকুৰবাৰে পুৱাও বিৰোধীৰ হৈ-হাল্লাৰ বাবে সংসদৰ কাম কাজ অনিৰ্দিষ্ট কাললৈ স্থগিত ৰাখে৷ ১৬ মাৰ্চৰ পৰা ৰাজ্যসভা আৰু লোকসভাত বিৰোধীৰ তীব্ৰ হৈ-হাল্লাৰ বাবে প্ৰায়ে সদন স্থগিত ৰাখিব লগা হৈ আহিছে৷ 

১৬ মাৰ্চত মোডী চৰকাৰৰ বিৰুদ্ধে অবিশ্বাস প্ৰস্তাৱৰ আৱেদন কৰিছিল ৱাইএছআৰ কংগ্ৰেছে৷ টিডিপিয়ে অন্ধ্ৰ প্ৰদেশক বিশেষ মৰ্যদা প্ৰদান কৰাৰ দাবীত প্ৰতিবাদ অব্যাহত ৰাখিছে যদিও কেন্দ্ৰীয় চৰকাৰে প্ৰতিশ্ৰুতি দি প্ৰতিশ্ৰুতি ভংগ কৰাৰ অভিযোগ উত্থাপন কৰি আহিছে৷ 

যাৰ বাবে মোডী চৰকাৰ আৰু এনডিএৰ পৰা ওলাই আহে টিডিপি৷ ইমানে নহয় চৰকাৰৰ বিৰুদ্ধে অনাস্থা প্ৰস্তাৱ দাখিল কৰিছিল লোকসভাত৷ 

আনহাতে সংসদ ভৱনলৈ নিতৌ নতুন নতুন ৰূপ ধাৰণ কৰি সদনলৈ আহি প্ৰতিবাদ সাব্যস্ত কৰি আহিছে অন্ধ্ৰপ্ৰদেশৰ চিত্তুৰ সমষ্টিৰ টিডিপিৰ সাংসদ এন শিৱসেনাই৷ কোনোবা দিনা যদি তেওঁ ভগৱান কৃষ্ণ, কোনোবা হৰিশ্চন্দ্ৰ, কৃষ্ণ, পূজাৰী, বাঁহী বজাই কৌৰৱ-পাণ্ডৱ হৈ বিভিন্ন ৰূপ লৈছে ৰজা হৰিশ্চন্দ্ৰৰ৷ 

এদিন স্কুলীয়া ছাত্ৰৰ দৰে সাজপাৰ পিন্ধি, আনদিনা আকৌ মহিলা ৰূপত সংসদত উপস্থিত হয় সাংসদগৰাকী৷ প্ৰত্যেক দিনাই সাংসদগৰাকীয়ে নতুন চৰিত্ৰ একোটাৰ জৰিয়তে প্ৰতিবাদৰ প্ৰতীকি অৰ্থ বহন কৰি প্ৰধানমন্ত্ৰী নৰেন্দ্ৰ মোডী কেন্দ্ৰীয় চৰকাৰক বিৰোধীতা কৰি আহিছে সাংসদ এন শিৱসেনাই৷ 

বিশেষ ৰাজ্য প্ৰদান কৰাৰ দাবীত এই অভিনৱ প্ৰতিবাদ সাব্যস্ত কৰি আহিছে৷ শুকুৰবাৰে সাংসদগৰাকীয়ে বিশ্বমিত্ৰ হৈ সংসদত প্ৰৱেশ কৰি মোডীক আক্ৰমণৰ লক্ষ্য কৰি লয়৷