খেৰণিঃ ডিফু সংসদীয় সমষ্টিৰ বিজেপিৰ প্ৰাৰ্থী হৰেনছিং বে'ক উষ্ম আদৰণী পশ্চিম কাৰ্বি আংলঙৰ বৈঠালাংছ’ বিধানসভা সমষ্টিত৷ উৎফুল্লিত উৎসাহ-উদ্দীপনাৰে প্ৰথমে খেৰণি ফৰেষ্ট বজাৰত প্ৰাৰ্থীগৰাকীক আদৰণি জনালে সহস্ৰাধিক দলীয় নেতাকৰ্মীয়ে৷ 

বিশাল মটৰ চাইকেল, বাহন আদিৰ ৰে’লীৰে খেৰণি ফৰেষ্ট বজাৰৰপৰা বৈঠালাংছলৈ আদৰি অনা হৰেনছিং বে'ক খেৰণি, জেংখা, কলঙা, ডংকামোকাম, বৰথল আদি স্থানত উষ্ম আদৰণি জনাই সমষ্টিবাসীয়ে। আদৰণি অনুষ্ঠানত উপস্থিত থাকে কাৰ্বি স্বায়ত্ত পৰিষদৰ মুখ্য কাৰ্যবাহী সদস্য তুলিৰাম ৰংহাং, বিধায়ক ডঃ মানছিং ৰংপি, কাৰ্যবাহী সদস্যসকল আৰু পৰিষদীয় সদস্যসকল৷ 

সহস্ৰাধিক সমৰ্থকৰ আদৰণি গ্ৰহণ কৰি বে'য়ে এইদৰে কয় যে প্ৰধানমন্ত্ৰী নৰেন্দ্ৰ মোডীক পুনৰ দেশৰ প্ৰধানমন্ত্ৰী কৰাত সহায় কৰিব, লগতে Article (244)A স্বায়ত্ত শাসিত ৰাজ্য দাবী কাৰ্যসূচী, MOS আৰু MOU সম্পূৰ্ণৰূপে কাৰ্যকৰী কৰাৰ বাবে কাম কৰিব বুলি উল্লেখ কৰে হৰেনছিঙে। উল্লেখ্য যে, বিজেপিৰ প্ৰাৰ্থী হৰেনছিং বে'ৰ বিৰুদ্ধে মুকলি বিৰোধিতা কৰা অৰুণ টেৰাঙেও ফৰেষ্ট বজাৰত উপস্থিত হৈ অৱশেষত আদৰণি জনাই বিজেপিৰ প্ৰাৰ্থীগৰাকীক।