ডিফুঃ সমগ্ৰ বিশ্বৰ লগতে কাৰ্বি আংলং জিলাৰ সদৰ চহৰ ডিফুতো পৱিত্ৰ ঈদ-উল-ফিটৰ কেন্দ্ৰীয়ভাৱে উদযাপন কৰা হয়৷
আজি পুৱা ৯-১৫ বজাত ডিফু মছজিদ প্ৰাংগণত ডিফু আৰু ইয়াৰ কাষৰীয়া অঞ্চলৰ মুছলমান ভক্ত প্ৰাণসকলৰ সোঁত বয়৷ প্ৰায় ৪ সহস্ৰাধিক লোকৰ অংশ গ্ৰহণ কৰা ডিফু মছজিদত ঈদৰ নামাজৰ ইমামতি কৰে ইমাম হাফিজ মৌলানা গিয়াছ উদ্দিন কাছিমীয়ে৷
নামাজৰ শেষত সামূহিক দোৱা অনুষ্ঠানত পূৰ্ব পূৰুষসকলৰ আত্মাৰ জান্নাতত নিশ্চিত স্থান, সকলো ধৰণৰ গুনাহ মাফ, বৈধ ইচ্ছাসমূহ পূৰণ কৰা, বিভিন্ন জাতি-জনগোষ্ঠীৰ মাজত শান্তি-সমপ্ৰীতি আৰু বিশ্ব শান্তিৰ বাবে আল্লাহৰ ওতৰত দোৱাৰ জৰিয়তে কাতৰ প্ৰাৰ্থনা জনায়৷
নামাজৰ শেষত খুৎবা শুনি মুৰ্দাসকলৰ বাবে বিশেষ দোৱা অনুষ্ঠিত হয়৷ আজি ঈদ-উল-ফিটৰৰ নামাজত জিলা উপায়ুক্ত আদিল খানেও অংশগ্ৰহণ কৰে৷ ইয়াৰ পিছত প্ৰতিজন মুছলমানে ইজনে সিজনক স্নেহালিংগন কৰি ঈদৰ শুভেচ্ছা জ্ঞাপন কৰে।