জাজৰিঃ বৰিবজাৰ আৰক্ষী চকীৰ অন্তৰ্গত জাজৰি শিমলুতলৰ এঘৰ গৃহস্থিত যোৱা শুকুৰাবাজৰে দিনৰ পোহৰতে চুৰি কাণ্ড সংঘটিত হোৱা ঘটনাই তীব্ৰ চাঞ্চল্যৰ সৃষ্টি হৈছে।
জানিব পৰা মতে যোৱাকালি বিয়লি প্ৰায় ৪.৩০ মান বজাত জাজৰি শিমলুতল নিৰ্বাসী নৱ মহন্তৰ ঘৰত কোনো নথকাৰ সুযোগ লৈ ঘৰৰ সন্মুখৰ দৰ্জা ভাঙি ভিতৰত প্ৰৱেশ কৰে আৰু গডৰেজ ভাঙি নগদ ধন, প্ৰায় ৩০ হেজাৰ টকা মূল্যৰ সোন-ৰূপৰ অলংকাৰ আৰু কিছু কাঁহৰ বাচন বৰ্তন লৈ যায়।
উল্লেখ্য যে, দৌল উৎসৱৰ আনন্দ উলাহৰ মাজতে জাজৰি-ধিং মূল গড়কাপ্টানি পথৰ কাষতে থকা জনবহুল ঠাইৰপৰা দিনৰ ভাগতে এনে চুৰি কাণ্ড সংঘটিত হোৱাটোৱে স্থানীয় ৰাইজক বাৰুকৈয়ে চিন্তিত কৰি তুলিছে। ইতিমধ্যে ভুক্তভুগি মহন্তই স্থানীয় বড়িবজাৰ আৰক্ষী চকীত এটা গোচৰ ৰুজু কৰিছে। স্থানীয় ৰাইজে অতি সোনকালেই চুৰক কৰায়ত্ব কৰিবলৈ আৰক্ষীক দাবী জনাইছে।