ডিজিটেল ডেস্কঃ নাগালেণ্ডক লাগে এতিয়া পাকিস্তানৰ সহায়! ভাৰতৰ পৰা সাৰ্বভৌমত্ব লাভৰ ক্ষেত্ৰত নাগালেণ্ডক লাগে চিৰ বৈৰী ৰাষ্ট্ৰখনৰ সহায়। এগৰাকী নগা যুৱতীয়ে সমগ্ৰ নাগালেণ্ডবাসীৰ হৈ এতিয়া শৰণাপন্ন হৈছে পাকিস্তানৰ ওচৰত। কেৱল সিমানেই নহয় নগা যুৱতীগৰাকীয়ে ফেচবুকত উপলব্ধ এটি ভিডিঅ’ ক্লিপত ভাৰতৰ ৰাষ্ট্ৰীয় পতাকা জ্বলাই দিয়া দেখা গৈছে।

ছ'চিয়েল মিডিয়াত ভাইৰেল হৈ পৰা ১ মিনিট ৩২ ছেকেণ্ডৰ ভিডিঅ’টোত যুৱতীগৰাকীয়ে NSCN-IM-এ দাবী কৰি অহা 'নাগালিম’ৰ পতাকাৰ দৰে বেকগ্ৰাউণ্ডৰ সমুখত থিয় হৈ ভাষণ দি থকা দেখা গৈছে।

যুৱতীগৰাকীৰ ফটোখন নাইকিয়া হৈ পৰাৰ লগে লগে স্ক্ৰীণত দেখা গৈছে প্ৰধানমন্ত্ৰী নৰেন্দ্ৰ মোদী, নাগা বিদ্ৰোহী আৰু জনজাতীয় ছাত্ৰ-ছাত্ৰীৰ ফটো। তাৰ পিছতে এগৰাকী পাকিস্তানী মহিলাই নিজ দেশৰ ৰাষ্ট্ৰীয় পতাকা হাতত লৈ স্বাধীন নাগালিমৰ সমৰ্থনত প্লে-কাৰ্ড প্ৰদৰ্শন কৰা দেখা গৈছে। লগতে দেখা গৈছে কাশ্মিৰী আৰু শিখসকলৰ প্ৰতিবাদ। সেই সময়তে মোদীয়ে খাপৰ পৰা এখন তৰোৱাল উলিয়াই লোৱা দৃশ্যও ভিডিঅ’ ক্লিপটোত সন্নিবিষ্ট কৰা হৈছে। 

আৰক্ষীয়ে যুৱতীগৰাকী নাগা যুৱতী হয় নে নহয় সেই সম্পৰ্কে অনুসন্ধান অব্যাহত ৰাখিছে। অৱশ্যে যুৱতীগৰাকীৰ মুখাৱয়বলৈ চালে নাগা যেনেই অনুমান হয়। একাংশ লোকে অৱশ্যে যুৱতীগৰাকীক চীনা বুলি দাবী কৰি ভিডিঅ'টোক চীনৰ চাতুৰালি আখ্যা দিছে। সেয়া হ'লেও Alila Chophy Naga নামৰ যুৱতী এগৰাকীয়ে নিজৰ ফেচবুক পেজত ভিডিঅ'টো তেওঁৰ বুলি দাবী কৰা দেখা গৈছে। কমেণ্ট বক্সত বহুতে ফেক বুলি কৈ অহা পেজটোৰ এবাউটত উল্লেখ আছে এইদৰে "An artist-cum activist fighting to expose Indian brutalities in occupied Nagaland."

ভিডিঅ’টোত যুৱতীগৰাকীয়ে কৈছে, 'প্ৰিয় পাকিস্তানীসকল, প্ৰথমে আপোনালোক সকলোকে মোৰ তৰফৰ পৰা স্বাধীনতা দিৱসৰ শুভকামনা জনালো। মই ক’ব বিচাৰো যে আমি নগাসকলেও আপোনালোকৰ দৰেকৈ ১৪ আগষ্টত স্বাধীনতা দিৱস উদযাপন কৰো, কিয়নো আমি ব্ৰিটিছসকলৰ পৰা একেটা দিনতে স্বাধীনতা লাভ কৰিছিলো। কিন্তু দুৰ্ভাগ্যজনকভাৱে আপোনালোকে স্বাধীনতা লাভ কৰিলে যদিও আমি ভাৰতৰ পৰাধীন হৈ ৰ’লো যিয়ে নেকি ব্ৰিটিছসকলৰ পিছত আমাৰ জন্মভূমি পুনৰ দখল কৰি ল’লে। সেই দিনৰ পৰা আজিলৈকে নগাসকলে ব্ৰাহ্মণ্যবাদী সন্ত্ৰাস চলোৱা ৰাষ্ট্ৰখনৰ বিৰুদ্ধে কাশ্মীৰি আৰু শিখসকলৰ দৰে স্বাধীনতাৰ হকে যুঁজ দি আহিছে। সি যি নহওক, আজি মই এই ঔপনিৱেশিক ৰাষ্ট্ৰখনৰ পতাকা জ্বলাই স্বাধীন নাগালিম লাভৰ ক্ষেত্ৰত আপোনালোকৰ সহায় বিচাৰিলো।’ 

তাৰ পিছতে যুৱতীগৰাকীয়ে ত্ৰিৰংগাখন জ্বলাই দি পুনৰ ক’বলৈ আৰম্ভ কৰে, 'আমি ভাৰতীয় নহয় আৰু নাগালেণ্ড ভাৰতৰ অংশ নহয়। আমি ১৫ আগষ্টত ক’লা দিৱস পালন কৰো। আমাৰ নিজা ইতিহাস আছে, সংস্কৃতি আছে, ভাষা আছে আৰু আছে নিজৰ দেশ, নিজৰ সৈন্য। আৰু আমি এতিয়া পূৰ্ণ স্বাধীনতা বিচাৰো।’

ইয়াৰ অন্তত ভিডিঅ’টোত ১৯৪৭ চনৰ ১৭ জুলাইত মহাত্মা গান্ধীয়ে নগা বিদ্ৰোহৰ সময়ত দিয়া ভাষণৰ এটি বিশেষ অংশ জিলিকি উঠা দেখা গৈছে। 

''মহাত্মা গান্ধীয়ে কৈছিলঃ স্বাধীনতা লাভৰ বাবে নগাসকলৰ অধিকাৰ আছে... যদি আপোনালোকে (নগা) সংযুক্ত ভাৰতত যোগ দিব নোখোজে তেন্তে সেয়া কৰিবলৈ কোনেও জোৰ দিব নোৱাৰে। মই নগাসকলৰ বাবে মোৰ জীৱন দিম আৰু ভাৰতীয় সেনাক মই ক’ম যে এজনো নগাক গুলী কৰাৰ আগতে মোক গুলীয়াই হত্যা কৰা। নাগালেণ্ড দখল কৰিবলৈ ভাৰতৰ কোনো অধিকাৰ নাই।’’

newindianexpress.comত প্ৰকাশিত বাতৰি মতে, নাগালেণ্ড আৰক্ষীয়ে এই পৰ্যন্ত ভিডিঅ’টো সন্দৰ্ভত কোনোধৰণৰ অভিযোগ লাভ কৰা নাই। ভিডিঅ’টো ভাৰতত নে ভাৰতৰ বাহিৰত নিৰ্মাণ কৰা হৈছে সেই বিষয়েও তেওঁলোকৰ হাতত কোনো তথ্য নাই বুলি জানিবলৈ দিছে নাগালেণ্ড আৰক্ষীয়ে।

ফেচবুকৰ সৈতে এই সন্দৰ্ভত যোগাযোগ কৰিছে নেকি বুলি সোধা প্ৰশ্নৰ উত্তৰত নাগালেণ্ড আৰক্ষীৰ এজন শীৰ্ষ বিষয়াই কয়, 'ফেচবুকৰ সৈতে জড়িত ভালেমান গোচৰ আমাৰ হাতত পৰি আছে। আমি তেওঁলোকৰ সৈতে যোগাযোগ কৰিছো যদিও এই পৰ্যন্ত কোনো তথ্য আমাৰ সৈতে শ্বেয়াৰ কৰা নাই। আমি ভাবো যে সমগ্ৰ বিষয়টো নাগালেণ্ড আৰক্ষীৰ পৰিৱৰ্তে কেন্দ্ৰ চৰকাৰে নিজৰ হাতলৈ নিব লাগে।’