লালুকঃ লখিমপুৰ জিলাৰ লালুকত নিশা সংঘটিত এক গুলীচালনাৰ ঘটনাই চাঞ্চল্যৰ সৃষ্টি কৰিছে। এই গুলীচালনাৰ ঘটনাত গুলজাৰ হুছেইন নামৰ এজন যুৱ ব্যৱসায়ী নিহত হোৱাৰ বাতৰি পোৱা গৈছে।
ঘটনাৰ বিৱৰণী মতে, লালুকৰ সমীপৰ যুৱনগৰ তিনি আলিত নিশা প্ৰায় ৯ বজাত অচিনাক্ত দুৰ্বৃত্তই যুৱ ব্যৱসায়ীজনলৈ লক্ষ্য কৰি নিচেই সমীপৰ পৰা তিনি জাই গুলী চলাই পলায়ন কৰে।
ফলত যুৱনগৰৰ মফিজ খানৰ পুত্ৰ তথা যুৱ ব্যৱসায়ী গুলজাৰ হুছেইন খানক (৪০) ঠাইতে ঢলি পৰে৷ নিশা আকস্মিক ভাৱে গুলীৰ শব্দ শুনি কাষৰ ৰাইজ বাহিৰলৈ ওলাই অহাত পথৰ ওপৰতে গুলজাৰ হুছেইন খানক প্ৰত্যক্ষ কৰে।
ততাতৈয়াকৈ গুলীৱিদ্ধ গুলজাৰক লালুক চিকিৎসালয়লৈ নিয়া হয় যদিও অতি সংকটজনক হৈ পৰাত লখিমপুৰলৈ উন্নত চিকিৎসাৰ বাবে প্ৰেৰণ কৰে৷ কিন্তু আদবাটতে মৃত্যু ঘটে যুৱকজনৰ।
ঘটনাৰ খবৰ পোৱা মাত্ৰকে আৰক্ষী ঘটনাস্থলীত উপস্থিত হৈ তদন্ত আৰম্ভ কৰিছে৷ ইফালে আকস্মিকভাৱে সংঘটিত হোৱা গুলীচালনাৰ এনে ঘটনাত শংকিত হৈ পৰিছে অঞ্চলটোৰ ৰাইজ৷