খাৰুপেটীয়াঃ দৰং জিলা প্ৰশাসনৰ উদ্যোগত দৰং আৰু ওদালগুৰি জিলাৰ পৰা যাবলগীয়া হজ যাত্ৰীসকলক দুদিনীয়াকৈ প্ৰশিক্ষণ প্ৰদানৰ ব্যৱস্থা কৰা হৈছে৷ মঙলদৈৰ জিলা পুথিভঁৰাল প্ৰেক্ষাগৃহত দেওবাৰৰ পৰা অনুষ্ঠিত হয় প্ৰশিক্ষণ শিবিৰ।
প্ৰশিক্ষণ শিবিৰ মুকলি কৰে মঙলদৈ সমষ্টিৰ বিধায়ক গুৰুজ্যোতি দাসে। মুকলি অনুষ্ঠানত ছিপাঝাৰ সমষ্টিৰ বিধায়ক বিনন্দ শইকীয়া আৰু দৰং জিলা উপায়ুক্ত অশোক কুমাৰ বর্মন উপস্থিত থাকে৷
উপস্থিত লোকসকলে হজ যাত্ৰীসকলক শুভেচ্ছা জ্ঞাপন কৰাৰ পিছত হজ যাত্ৰীসকল প্ৰশিক্ষণ দিয়ে জিলা এনফৰ্চমেণ্ট বিষয়া সাহাব উদ্দিন তাপাদাৰে। হজ যাত্ৰী সকলক ভেকচিন প্ৰতিষেধক দিয়াৰ উপৰিও হজৰ নিয়ম প্ৰণালী সম্পৰ্কে প্ৰশিক্ষণ দিয়ে বেচিমাৰী উচ্চতৰ মাধ্যমিক বিদ্যালয়ৰ উচ্চ বৰ্গ সহায়ক আব্দুল হকে।
প্ৰশিক্ষণ শিবিৰত ৰাজ্যিক হজ কমিটিৰ অধ্যক্ষ নেকিবুৰ জামানে অংশগ্ৰহণ কৰে। উল্লেখ্য যে, দৰং আৰু ওদালগুৰি জিলাৰ মুঠ ১৯৩ গৰাকী হজ যাত্ৰীক শিবিৰটোত প্ৰশিক্ষণ দিয়া হৈছে৷