গোৰেশ্বৰঃ ঘৰলৈ কেতিয়া ঘূৰি আহিব গোৰেশ্বৰৰ ধনজিৎ? বহিঃৰাজ্যত কাম কৰিবলৈ গৈ এবছৰ ধৰি ঘৰলৈ নহা ধনজিতক পৰিয়ালৰ লোকসকলে আকৌ দেখা পাবনে? পিতৃ ধনজিতক বিচাৰি ব্যাকুল হৈ পৰা দুই বছৰীয়া কন্যাক কোনে সান্ত্বনা দিব!
বাক্সা জিলাৰ গোৰেশ্বৰ থানা অন্তৰ্গত গোৰেশ্বৰ চহৰৰ ২ নং ৱাৰ্ড নিবাসী প্ৰয়াত সত্য ভৰালীৰ কনিষ্ঠ পুত্ৰ ধনজিৎ ভৰালী। কৰ্মসংস্থাপন বিচাৰি আপোন ঘৰখন, আপোন গাঁওখন এৰি এদিন ঢাপলি মেলিছিল দিল্লীলৈ।বহিঃৰাজ্যত কাম কৰিবলৈ গৈ দুষ্ট চক্ৰৰ কবলত পৰিছিল ২০১৬ চনৰ ২ জুলাইত। স্থানীয় দুই বন্ধু দীপক চৌহান আৰু বীৰবল চৌহানে ধনজিৎ ভৰালীক পকা মিস্ত্ৰীৰ কাম কৰিবলৈ লৈ গৈছিল ৷
যোৱা ৫ জুলাইৰ পৰা দিল্লীত নিৰুদ্দেশ হয় যুৱকজন। দুই বন্ধু ২০১৬ চনৰ ৭ জুলাইত ঘৰলৈ উভতি আহে যদিও ধনজিৎ আজিলৈ উভতি নাহিল। দুই বন্ধুৱে বিভ্ৰান্তিকৰ কথাৰে ধনজিতৰ পৰিয়াল তথা ৰাইজক ধনজিত দিল্লীৰ পাহড়গঞ্জ এলেকাৰ পৰা সন্ধানহীন হৈছে বুলি কৈ দায় সাৰে। এই বিষয়ে গোৰেশ্বৰ আৰক্ষী থানাত ৮ জুলাইত দুই বন্ধুৰ বিৰুদ্ধে অভিযোগ উত্থাপন কৰি এজাহাৰ দাখিল কৰে যদিও আজি এবছৰৰ পিছতো কোনো ব্যৱস্থা গ্ৰহণ নকৰিলে আৰক্ষীয়ে।
ধনজিতৰ পৰিয়ালৰ লগতে গণতান্ত্রিক মহিলা সমিতিৰ গোৰেশ্বৰ আঞ্চলিক সমিতিৰ সহযোগত স্থানীয় ৰাইজে আজি গোৰেশ্বৰ থানা ঘেৰাও কৰি ৰাজহ চক্ৰ বিষয়াৰ কাৰ্যালয়ত বিক্ষোভ প্ৰদৰ্শনৰ অন্তত স্মাৰক পত্ৰ প্ৰদান কৰে৷ আজি এবছৰ ধৰি যুৱকজনৰ সন্ধান উলিয়াব নোৱাৰা গোৰেশ্বৰ আৰক্ষী আৰু স্থানীয় প্ৰশাসনৰ বিৰুদ্ধে ক্ষোভ ব্যক্ত কৰে মহিলাসকলে৷
মহিলাসকলে ধনজিৎ ভৰালীৰ সন্ধান দিয়ক, আৰক্ষী প্ৰশাসন হায় হায়, অভিযুক্তক ৰক্ষণাবেক্ষণ দিয়া আৰক্ষী নিমাত কিয় আদি শ্ল’গানেৰে থানা চৌহদ উত্তাল কৰি তোলে। ৰাজহ চক্ৰ বিষয়া আৰু গোৰেশ্বৰ আৰক্ষী থানাৰ ভাৰপ্ৰাপ্ত আৰক্ষী বিষয়াক একোখনকৈ স্মাৰক পত্ৰ প্ৰদান কৰে। স্থানীয় ৰাইজে অভিযুক্ত যুৱক দুজনক আৰক্ষীয়ে ধনৰ লেনদেনৰ বিনিময়ত আজিলৈ আটক কৰা নাই বুলি কয়।
স্মাৰক পত্ৰত অভিযুক্ত দুয়োজনকে জেৰা কৰি প্ৰকৃত সত্য উদঘাটন কৰাৰ লগতে দুষ্ট চক্ৰৰ হাতৰ পৰা যুৱকজনক মোকোলাই অনাৰ দাবী জনায়। এটি দুবছৰীয়া কন্যা সন্তানৰ লগতে পত্নী আৰু পৰিয়াল বৰ্গই এতিয়াও ধনজিৎ ভৰালীৰ অপেক্ষাত অধীৰ আগ্ৰহেৰে বাট চাই ৰৈছে। গোৰেশ্বৰ আঞ্চলিক আক্ৰাছুৱে শীঘ্ৰে তদন্ত কৰি দোষীক শাস্তি বিহিবলৈ দাবী উত্থাপন কৰিছে।