নগাঁওঃ নগাঁও জিলাৰ বটদ্ৰৱা আৰক্ষী থানাৰ অন্তৰ্গত ৰামপুৰ পাম গাঁৱৰ এগৰাকী বিবাহিত মহিলা বিগত চৈধ্য দিন ধৰি সন্ধানহীন হৈ থকাৰ পিছত মহিলাগৰাকীক অপহৰণ কৰাৰ সন্দেহত এজন যুৱকক আৰক্ষীয়ে আটক কৰিছে।
ঘটনাৰ বিৱৰণী মতে ৰামপুৰ পাম গাঁৱৰ এটি সন্তানৰ এগৰাকী মাতৃ যোৱা ১২ মাৰ্চৰ দিনা নিজ গৃহৰপৰা বটদ্ৰৱা ক্ষুদ্ৰ প্ৰাথমিক চিকিৎসালয়লৈ যোৱাৰ পিছৰে পৰা সন্ধানহীন হয়৷ পিছত মহিলাগৰাকীৰ পৰিয়ালৰ লোকে ১৪ মাৰ্চত নগাঁও জিলাৰ কচুৱা নিবাসী চুলমান আলী নামৰ লোকজনৰ ঘৰত থকাৰ সম্ভেদ পাইছিল।
অৱশ্যে ৰহস্যজনকভাৱে ১৫ মাৰ্চৰ দিনা লম্পট চুলমান আলীৰ ঘৰৰপৰা মহিলাগৰাকী পুনৰ নিৰুদ্দেশ হয়। কালি মহিলাগৰাকীৰ পৰিয়ালৰ লোকে কৌশলেৰে মৰিগাঁও জিলাৰ মৈৰাবাৰীৰপৰা চুলমান আলীৰক আৰক্ষীৰ সহযোগত আটক কৰে। ঘটনা সংক্ৰান্তত বটদ্ৰৱা আৰক্ষী থানাত ৩৬৬ ধাৰাত ৮৭/১৯ নম্বৰত গোচৰ ৰুজু কৰি চুলমান আলীক জেল হাজোতলৈ প্ৰেৰণ কৰে।
নিৰুদ্দিষ্ট মহিলা গৰাকীৰ পৰিয়ালৰ সদস্যই দিয়া অভিযোগ মতে চুলমান আলী পূৰ্বতেও বহু অপৰাধজনিত ঘটনাৰ লগত জড়িত। লগতে চুলমানে মহিলাগৰাকীক প্ৰলোভনেৰে অপহৰণ কৰি বিক্ৰী কৰাৰ সন্দেহ কৰিছে। অৱশ্যে আৰক্ষীৰ উচিৎ তদন্ততহে প্ৰকৃত তথ্য পোহৰলৈ আহিব৷