জয়ন্ত মুদৈ, নগাঁওঃ নগাঁও জিলাৰ বটদ্ৰৱা আৰক্ষী থানাৰ অন্তৰ্গত কদমনি পথাৰত শুকুৰবাৰে সংঘটিত হোৱা এক ভূমিকেন্দ্ৰিক বিবাদৰ ফলত এজন বৃদ্ধ গুৰুতৰভাৱে আহত হয়।
প্ৰাপ্ত আভিযোগ মতে, আব্দুল ছালাম, ইজাজুল হক, মজিবুৰ ৰহমান আৰু চান্দিৰ উদ্দিন নামৰ চাৰিজন লোকে চাদিকুল ইছলাম নামৰ লোকজনৰ ভূমিত দহ বছৰ ধৰি বেদখল কৰি ঘৰ সাজি আছে৷ উক্ত ভূমিত এখন জেওৰা দিয়াক লৈ দুই দলৰ মাজত কাজিয়াৰ সূত্ৰপাত হয়।
কাজিয়াত চাদিকুল ইছলামৰ বৃদ্ধ পিতৃ নুৰুল ইছলামক আব্দুল ছালাম, ইজাজুল হক, মজিবুৰ ৰহমান আৰু চান্দিৰ উদ্দিনে মাৰপিট কৰাৰ উপৰি মূৰত যাঠিৰে আঘাত কৰে। পাছত আহত বৃদ্ধগৰাকীক সংকটজনক অৱস্থাত পৰিয়ালৰ লোকে বটদ্ৰৱা ক্ষুদ্ৰ প্ৰাথমিক স্বাস্থ্য কেন্দ্ৰলৈ নিয়ে যদিও আঘাত গুৰুতৰ হোৱাৰ বাবে চিকিৎসকে নগাঁও ভোগেশ্বৰী ফুকননী অসামৰিক চিকিৎসালয়লৈ প্ৰেৰণ কৰে। ঘটনা সংক্ৰান্তত চাদিকুল ইছলামে বটদ্ৰৱা আৰক্ষী থানাত ইতিমধ্যে এজাহাৰ দাখিল কৰিছে।