সপোন ৰহমান শইকীয়া, মৰিয়নীঃ মৰিয়নী জংচনৰ কাষতে লাগি থকা ৰে’ল ডিজেল ষ্টেটতৰ বাবে তৈয়াৰ কৰা গৃহ এটাত বৰ্তমান তিতাবৰ মহকুমাৰ বিভিন্ন স্থানত নিয়োজিত হৈ থকা অতিৰিক্ত CRPFৰ জোৱানসকল থকা গৃহটোত এডাল প্ৰাপ্তবয়স্ক কেকো সাপ জোৱানসকলে প্ৰত্যক্ষ কৰাত ৰে’ল বিভাগক খবৰ দিয়ে৷

পৰৱৰ্তী সময়ত তাত মৰিয়নী আঞ্চলিক তাই আহোম ছাত্ৰ সন্থাৰ সদস্যসকল উপস্থিত হয়। লগতে ৰে’ল বিভাগ আৰু CRPFৰ জোৱানৰ উপস্থিতিত মৰিয়নী আঞ্চলিক বন বিষয়া কাৰ্যলয়ৰপৰা যোৱা এটা বন কৰ্মীৰ দলে সাপটো উদ্ধাৰ কৰি গিৱন হোলোঙাপাৰা সংৰক্ষিত বনাঞ্চলত সুৰক্ষিত অৱস্থাত নি মুকলি কৰি দিয়ে৷ বন বিভাগৰ তৰফৰপৰা তাতক্ষণিকভাৱে লোৱা এই পদক্ষেপক মৰিয়নী জ্যেষ্ঠ নাগৰিককে ধৰি তাই আহোম ছাত্ৰ সন্থাই ধন্যবাদ জনাইছে৷