ছাইদুল ইছলাম, ডিফুঃ সমগ্ৰ ৰাজ্যৰ লগতে পাহাৰীয়া জিলাৰ কাৰ্বি আংলঙৰ বিভিন্ন প্ৰান্তত বানপানীৰ ত্ৰাস চলি থকাৰ সময়তে দুৰ্গত জনক সামান্য সহায়ৰ হাত আগবঢ়াবলৈ ডিফুৰ ৰাজপথত নামিল কাৰ্বি আংলং জিলা প্ৰেছ ক্লাবৰ সদস্য সকল৷
কালি পুৱাৰ ভাগত ডিফুস্থিত জিলা প্ৰেছ ক্লাবত সদস্য সকল সমবেত হৈ বন্যাৰ্ত সকলক কিঞ্চিত হ’লেও কিভাৱে সহায় কৰিব পাৰি তাৰ ওপৰত জৰুৰী আলোচনা হয়৷ দীৰ্ঘ আলোচনাৰ অন্তত জিলা প্ৰেছ ক্লাবৰ সদস্য সকলে এটি অস্থায়ী বাকছ তৈয়াৰ কৰি জিলা প্ৰেছ ক্লাবৰ সভাপতি কিৰি ৰংহাং আৰু সাধাৰণ সম্পাদক ডেনিয়েলচন বে'ৰ নেতৃত্বত ডিফু চহৰৰ দোকানে দোকানে সাহাৰ্য্য সংগ্ৰহ কৰিব ধৰে৷
ডিফুৰ ব্যৱসায়ী, অনুষ্ঠান-প্ৰতিষ্ঠান আৰু ব্যক্তিসকলে বৰঙণি আগবঢ়াই জিলা প্ৰেছ ক্লাবৰ প্ৰচেষ্টাক শলাগ লয়৷ কাইলৈও বৰঙণি সংগ্ৰহ অভিযান অব্যাহত থাকিব সেয়ে ইচ্ছুক সকলক সাধ্য অনুসৰি বন্যাৰ্ত সকলৰ বাবে বৰঙণি আগবঢ়াবলৈ জিলা প্ৰেছ ক্লাবে ৰাইজৰ প্ৰতি আহ্বান জনাইছে৷