বিশ্বনাথ চাৰিআলিঃ দৰিদ্ৰতাই কোঙা কৰা বিহালীৰ বিহমাৰীৰ এটা কাৰ্বি পৰিয়াল। পৰিয়ালটোৰ মূৰব্বী কাবন ইংতিপি নামৰ মহিলাগৰাকীৰ দুটা সন্তান। হাজিৰা কৰি অতি কষ্টৰে দুয়োটি সন্তানকে পোহপাল দি আহিছে মহিলা গৰাকীয়ে। 

এটি ভগা জুপুৰীত বাস কৰা এই পৰিয়ালটোলৈ এতিয়া নামি আহিছে ঘোৰ অমানিশা। মহিলাগৰাকীৰ কন্যা কুমাৰী দেৱী ছিংনাৰপী আক্ৰান্ত হৈছে এক জটিল ৰোগত। শেহতীয়াকৈ চিকিৎসকে বিভিন্ন পৰীক্ষা-নীৰিক্ষাৰ অন্তত জানিবলৈ দিছে যে যুৱতীগৰাকীৰ ব্ৰেইনত আছে তিনিটাকৈ টিউমাৰ, লগতে ভৰিতো আছে এটা টিউমাৰ।

পূৱ বিহালী উচ্চতৰ মাধ্যমিক বিদ্যালয়ৰ দশম শ্ৰেণীৰ এই গৰাকী মেধাবী ছাত্ৰী আছিল চলিত বৰ্ষৰ এগৰাকী মেট্ৰিক পৰীক্ষাৰ্থী। পিছে পৰীক্ষাৰ এডমিট কাৰ্ড আনিও ৰোগৰ বাবে পৰীক্ষাত বহিবলৈ সক্ষম নহ'ল ছাত্ৰীগৰাকী। ক্ৰমশঃ শাৰীৰিকভাৱে দুৰ্বল হৈ পৰিছে ছাত্ৰীগৰাকী। লাহে লাহে হ্ৰাস পাবলৈ ধৰিছে শ্ৰৱণ শক্তি আৰু স্মৃতি শক্তি।

নিজৰ অসহায় অৱস্থাৰ কথা কৈ আৱেগিক হৈ পৰা ছাত্ৰীগৰাকীৰ দুচকুৰে বৈ আহিল চকুলো। একমাত্ৰ ভৰসা মাক কাবন ইংতিপি। কিন্তু নিজ কন্যাক উন্নত চিকিৎসাৰে সুস্থ কৰি তুলিবলৈ অসমৰ্থ কাবান। যাৰ বাবে মৃত্যুৰ দিশে গতি কৰা যুৱতীগৰাকীয়ে চকুলোৰে নেদেখা হৈছে বাট।

গাঁৱৰ ৰাইজে এখন পত্ৰিকা চপাই যুৱতীগৰাকীৰ চিকিৎসাৰ বাবে ধন সংগ্ৰহ কৰিছে যদিও সেইয়া পৰ্যাপ্ত নহয়। ইয়াৰ মাজতে গাঁওবাসীৰ সহযোগত মঙগলবাৰে বিয়লি  যুৱতীগৰাকীক চিকিৎসাৰ বাবে  নিয়া হয় গুৱাহাটীলৈ । কিন্তু বৰ্তমানেও  চিকিৎসাৰ সম্পূৰ্ণ খৰছ যোগাৰ হোৱা নাই পৰিয়ালটোৰ।

উপায়ন্তৰ হৈ সমূহ অসমবাসী তথা চৰকাৰৰ পৰা সহায় বিচাৰিছে দৰিদ্ৰ পৰিয়ালটোৱে। কোনো লোকে ছাত্ৰীগৰাকীক সহায় কৰিব বিচাৰিলে 94357-13650 অথবা 87519-67723 নম্বৰত যোগাযোগ কৰিব পাৰে।

বৰ্তমানলৈকে কোনোধৰণৰ চৰকাৰী সাহায্য লাভ নকৰা বুকুত অযুত সপোন থকা ছাত্ৰীগৰাকী উন্নত চিকিৎসাৰে সুস্থ হৈ উঠিবনে? লাভ কৰিবনে অসমবাসীৰ পৰা এধানি সহায়? অসুস্থ চিংনাৰপীক সহায়ৰ হাত আগবঢ়াবলৈ সক্ষমসকলৰ হৃদয়ত জাগি উঠিবনে মানৱতা?